काठमाडौं– मकवानपुरमा तेस्रो लिङ्गी युवतीको बलात्कारपछि हत्या घटनाका ३ जना अभियुक्तलाई जिल्ला अदालतले आजीवन (जीवित रहे सम्मका लागि) कैदको सजाय सुनाएको छ।
घटनाका अन्य ३ अभियुक्तलाई १ देखि १६ वर्षसम्म कैद सजाय तोकिएको छ। मकवानपुर जिल्ला अदालतका न्यायाधीश डिल्लीरत्न श्रेष्ठको बिहीबारको इजलासले उक्त फैसला सुनाएको हो।
४ माघ २०७६ मा मकवानपुरको हेटौंडा उपमहानगरपालिका–५ क्याम्पडाँडा (कान्ति लोकपथ छेउमा) २९ वर्षीया युवती (तेस्रो लिङ्गी)को शव फेला परेको थियो। घटनाको अनुसन्धानका क्रममा उनको बलात्कारपछि हत्या गरेको खुलेको थियो।
बलात्कारपछि हत्या घटनामा प्रहरीले ६ जनालाई पक्राउ गरेको थियो। पक्राउ परेकाहरुले युवतीसँग ट्रकमा यौनसम्पर्क राखेको र पैसाको विषयमा विवाद हुँदा हत्या गरेर फालेको बयान दिएका थिए।
घटनामा संलग्न रहेकामध्ये हेटौंडा उपमहानगरपालिका–४ का २५ वर्षीय सुशील थापा मगर, २४ वर्षीय आशिष बल र २१ वर्षीय वुद्ध लामालाई आजीवन कैदको सजाय सुनाइएको हो। उनीहरुको हकमा जबरजस्ती करणी, कर्तब्य गरी ज्यान मारेको कसूर ठहर भएको हो।
यस्तै, शव लुकाएको आरोप लागेका सिमोन परियारलाई शव लुकाएको कसूरमा ४ वर्ष र डाँकाको कसूरमा ९ वर्ष कैद र ९० हजार रुपैयाँ जरिवाना तथा पीडितको परिवारलाई १ लाख रुपैयाँ क्षतिपूर्ति भराउने फैसला भएको श्रेस्तेदार तीर्थराज भट्टराईले जानकारी दिए।
घटनामा संलग्न रहेका एकजना नाबालकलाई १६ वर्ष ८ महिना कैद, ६० हजार रुपैयाँ जरिवाना र पीडित परिवारलाई २ लाख रुपैयाँ क्षतिपूर्ति भराउने फैसला भएको छ।
तेस्रो लिङ्गी युवतीको हत्यापछि अभियुक्तहरुले उनले बोक्ने मोबाइल समेत लगेका थिए। उक्त मोबाइल चलाउने डोलमाया तामाङलाई पनि अदालतले १ वर्ष कैद, ९० हजार रुपैयाँ जरिवाना र पीडित परिवारलाई १ लाख रुपैयाँ जरिवाना भराउने फैसला भएको छ।
अदालतले पीडित राहत कोषबाट पीडित परिवारलाई थप ५ लाख रुपैयाँ क्षतिपूर्ति भराउन समेत आदेश जारी गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768981471.jpg)
-1764146706.png)
