सबै तस्बिर : निमेषजंग राई/नेपाल लाइभ।
काठमाडौं– अफ्रिकी राष्ट्र मरिससविरुद्धको दुई मैत्रीपूर्ण खेलमा नेपालले शतप्रतिशत जित निकालेको छ।
पहिलो खेलमा विमल घर्तीमगरको निर्णायक गोलमा १-० गोल अन्तरको जित निकालेको नेपालले दोस्रो खेलमा ९ खेलाडीमा सीमित मरिससविरुद्ध सोही नतिजालाई निरन्तरता दिएको हो।
त्रिपुरेश्वरस्थित दशरथ रंगशालमा मंगलबार सम्पन्न खेलमा नेपालका लागि एक मात्रै गोल सुजल श्रेष्ठले गरे। उनको यो तेस्रो अन्तर्राष्ट्रिय गोल हो।
प्रशिक्षक अबदुल्लाह अल्मुताइरीले किरणकुमार लिम्बुको कप्तानीमा दिनेश राजवंशी, देवेन्द्र तामाङ, तेज तामाङ, पुजन उपरकोटी, सुजल श्रेष्ठ, अन्जन बिष्ट, आशिष लामा, नवीन गुरुङ, एरिक विष्ट र दर्शन गुरुङलाई पहिलो रोजाइमा मैदान उतारेका थिए।
सुरुआतदेखि नै आक्रमक खेल प्रदर्शन गरेको नेपालले खेलको छैटौं मिनेटमा नै गोल गर्ने अवसर पाएको थियो। तर, दर्शनले पेनाल्टी बक्स बाहिरबाट गरेको प्रहार पोष्ट बार हुँदै आकासिएको थियो। त्यसको एक मिनेट पछि नै मरिससका लिन्स्ले ब्रोस्सलेले गरेको प्रहारले पोष्टको दिशा लिन सकेन।
तर, खेलको १०औं मिनेटमा नेपालले सुजलको गोलबाट अग्रता लियो। नवीनको कर्नरलाई मरिससका गोलरक्षक लोइक मिचेलले पञ्च गर्दै बचाएका थिए। आशिषले डिबक्स बाहिरबाट गरेको फितलो प्रहारलाई पुजन उपरकोटीलाई लाग्दै सुजलसम्म पुगेको थियो। उक्त बललाघ गोल लाइन नजिक रहेको सुजलले जाली चुमाए।
यस्तै, १२औं मिनेटमा मरिससले खेलमा फर्किने मौका गुमायो। पेनाल्टी बक्सम दर्शन गुरुङले हातले बल छोएपछि रेफ्री नवीन्द्र महर्जनले मरिससलाई पेनाल्टीको अवसर दिएका थिए। तर, मरिससका कप्तान एन्डी सोफीले दोस्रो बारतिर गरेको प्रहारलाई नेपाली गोलरक्षक किरणकुमार लिम्बुले ड्राइभ गर्दै बचाए।
३६औं मिनेटमा तेज तामाङले करिब ३० यार्डबाट गरेको सक्तिशाली प्रहार फ्रेममा पर्न सकेन। उनले पहिलो बारतर्फ गरेको प्रहार बाहिरिएको थियो। यस्तै, ४०औं मिनेटमा एड्रियन बोट्लरले किरण बिट भइसकेको अवस्थामा गरेको गरेको प्रहारले दिशा लिन सकेन। पहिलो हाफ शान्तिपूर्ण सकिएको खेलको दोस्रो हाफमा हात हालाहाल गर्दा मैदान निकै तनावपूर्ण रह्यो।
दुवै टोलीले मैदानभित्र अनुशासन कायम गर्न नसक्दा दुईपटक खेल केहीबेर रोकिएको थियो। ७१ मिनेटमा रेफ्री नवीन्द्रसँग बहस गर्दै हात हालाहाल गर्दा मरिससका बोट्लरले सिधै रातो तथा पुजनले दोहोरो पहेंलो कार्डसहित रातो कार्ड पाए भने त्यसपछि ८०औं मिनेटमा इमानुयल फोलचुन्डले पनि रातो कार्ड पाउँदै मैदान छाड्नु परेको थियो।
यस्तै, ९०औं मिनेटमा फ्लड लाइटमा समस्या आएपछि खेल केहीबेर रोकिएको थियो। पावर कम हुँदा लाइट पूर्ण क्षमतामा बल्न नसकेपछि रेफ्री नवीन्द्रले १० मिनेट खेल रोकेका थिए। त्यसपछि पनि समस्या समाधान नभएपछि रेफ्री नवीन्द्रले दुवै टोलीका खेलाडीहरु सल्लाह गरेर खेल पुन: सुरु गरेका थिए।
त्यसअघि ५२औं मिनेटमा मरिससले बनाएको मौकालाई किरणले विफल पार्दिए। ब्रारिस रास्डारिसिंङले गरेको कर्नर प्रहारलाई टप बारबाट किरणले पञ्च गर्दै क्लियर गर्दिए। ६३औं मिनेटमा मनिष डाँगीको हेडर पोष्ट माथिबाट बाहिरियो। दर्शनले करिब ३५ यार्डबाट गरेको फ्रिकिक प्रहारलाई मनिषले लो हेडर गरेका थिए। तर, मरिससका गोलरक्षक मिचेललाई कुनै समस्या भएन।
यस्तै, ६५औं मिनेटमा मनिषले नै नेपालको अग्रता दोब्बर बनाउने अर्को मौका गुमाए। सुजलले डिबक्स बाहिरबाट दिएको पासमा मरिससका डिफेन्डर बिट भइसकेको बेला मनिषले गोल लाइनबाट फिनिसिङ टच दिन सकेनन्।
६८औं मिनेटमा मरिससले पुन: खेलमा फर्किने अवसर गुमायो। कप्तान सोफीले हाइ रनिङमा डिबक्स भित्रबाट गरेको प्रहारलाई किरणले ड्राइभ गर्दै बचाए।
दोस्रो हाफको अतिरिक्त समयमा सुजलले सिक्स यार्डबाट गरेको प्रहार मरिससका गोलरक्षक मिचेलले बचाए। उक्त रिबाउन्ड बललाई मनिष र विमलले कोसिस गरेपनि सफल हुन सकेनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1771838848.png)
-1771837565.png)
-1764146706.png)
