काठमाडौं- नेपाली कांग्रेसका सभापति शेरबहादुर देउवाले कार्य सम्पादन समितिमा जीवनबहादुर शाहीलाई समेट्दा दिलेन्द्रप्रसाद बडु बाहिरिनुपरेको छ।
केन्द्रीय सदस्यको वरीयताअनुसारकै व्यक्तिहरु समेट्दा ३६औं स्थानका बडु समितिमा परेनन्। जबकि, ३८औं स्थानमा रहेका शाही समेटिए। ३७ जनाको कार्यसम्पादन समिति गठन गर्दा ३६औं वरीयतामा रहेका बडुलाई हटाइएको छ। बडुको स्थानमा ३८औं स्थानमा रहेका शाहीलाई समेटिएको छ। बडु संघीय सरकारको कानुन, न्याय तथा संसदीय मामिलामन्त्रीसमेत छन्।
अन्यको हकमा भने वरीयता अनुसारका ३६ जना परेका छन्। वरीयताबाहिरबाट शाहीमात्रै एक जना परेका छन्। देउवानिकट शाही कर्णालीको बहालवाला मुख्यमन्त्री हुन्। अन्यको हकमा वरीयता अनुसार छनोट गरेका देउवाले बडुलाई विस्थापन गर्न शाहीलाई स्थान दिएका छन्।
विधानतः पदाधिकारी स्वतः कार्यसम्पादन समिति सदस्य हुने व्यवस्था छ। पदाधिकारीमा हुनेहरुलाई समेट्नैपर्ने बाध्यकारी व्यवस्थाले उनीहरु कार्यसम्पादन समितिमा परेका छन्। पदाधिकारी नरहेका तथा शाहीलाई स्थान दिनका लागि बडुलाई कार्यसम्पादन समितिमा राखिएको छैन।
३७ जनाको कार्यसम्पादन समिति गठन हुँदा नेता डा शेखर कोइरालापक्षमा चिनिएका आठ जनामात्रै छन्। नेता कोइरालासहित उपसभापति धनराज गुरुङ, महामन्त्री गगन थापा, सहमहामन्त्रीद्वय जीवन परियार र बद्री पाण्डे छन्। साथै, शेखरपक्षकै डा रामशरण महत, अर्जुननरसिंह केसी र बलबहादुर केसी पनि कार्यसम्पादन समितिमा परेका छन्। अन्यमा देउवाका निकट छन् वा उनलाई सभापति बनाउन सघाएकाहरु छन्।
देउवापक्षबाट सभापतिसहित उपसभापतिद्वय पूर्णबहादुर खड्का सहमहामन्त्रीहरु फरमुल्लाह मन्सुर, भीष्मराज आङदाम्बे, उमाकान्त चौधरी, महेन्द्र यादव, महालक्ष्मी उपाध्याय 'डिना' र किशोरसिंह राठौर छन्। विजयकुमार गच्छदार, गोपालमान श्रेष्ठ, चित्रलेखा यादव, डा प्रकाशशरण महत, सुनिलबहादुर थापा, बालकृष्ण खाण, ज्ञानेन्द्रबहादुर कार्की, उमा रेग्मी, रमेश रिजाल, डा नारायण खड्का, जिपछिरिङ लामा, एनपी साउद, जीवनबहादुर शाही र आनन्दप्रसाद ढुंगाना सभापति देउवानिकट हुन्। विश्वप्रकाश शर्माले सिंहको प्यानलबाट महामन्त्रीमा उठेर जित निकालेका थिए।
१४औं महाधिवेशनमा तटस्थ बसेर नेता रामचन्द्र पौडेल र शशांक कोइरालालाई सभापतिमा देउवालाई नै सघाउने अप्रत्यक्ष सहयोग गरेको आरोप लागेको थियो। प्रकाशमान सिंह र विमलेन्द्र निधिले दोस्रो चरणको मतदानमा देउवालाई सघाएका थिए। नेता कृष्णप्रसाद सिटौलाले कुनै पनि पदमा उम्मेदवारी नदिएर देउवासँग गठजोड बनाएका थिए। नेता सिंहको प्यानलबाट उपसभापतिको उम्मेदवार बनेकी सुजाता कोइराला दोस्रो चरणको मतदानमा देउवापक्षमा लागेकी थिइन्।
पार्टीमा केन्द्रीय कार्यसमितिपछिको बलियो संरचनाको रुपमा कार्यसम्पादन समिति रहेको हुन्छ। केन्द्रीय समितिको बैठक बस्न नसकेको समयमा यसै समितिको बैठकले निर्णय लिने गर्दछ। कार्यसम्पादन समितिको बैठकले गरेका निर्णय केन्द्रीय समितिले अनुमोदन गर्नुपर्ने हुन्छ।
शक्तिशाली संरचनाको रुपमा रहेको यस समितिको महिनामा एक पटक बैठक बस्नुपर्ने प्रावधान विधानमा रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787755120.jpg)
-1786602170.png)
-1786513116.png)
