काठमाडौं– सत्ता गठबन्धनका प्रमुख तीन दलका शीर्ष नेताहरुबीच भेटवार्ता भएको छ। प्रधानमन्त्रीको सरकारी निवास बालुवाटारमा प्रधानमन्त्री एवम् नेपाली कांग्रेसका सभापति शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल 'प्रचण्ड' र नेकपा एकीकृत समाजवादीका अध्यक्ष माधवकुमार नेपालबीच बिहीबार भेटवार्ता भएको हो।
गठबन्धन दलले गठन गरेको उच्चस्तरीय राजनीतिक समन्वय समितिको बैठक स्थगित भएपनि शीर्ष नेताहरुबीच पौने एक घण्टा कुराकानी भएको छ। नेकपा माओवादी केन्द्रका अध्यक्ष दाहालका स्वकीय सचिव रमेश मल्लले तीन शीर्ष नेताहरुबीच भेटवार्ता भएको जानकारी दिए।
राजनीतिक समन्वय समितिको बैठक स्थगित भएपनि तीन नेताहरुबीच स्थानीय तहको निर्वाचन लगायतका विषयमा नै छलफल केन्द्रित रहेको बताइएको छ। नेकपा एकीकृत समाजवादीका अध्यक्ष माधवकुमार नेपाल कोरोना संक्रमणमुक्त भएपछि पहिलोपटक छलफलका लागि बालुवाटार पुगेका हुन्।
तीनै नेताहरुबीच आज स्थगित भएको समन्वय समितिको बैठक शुक्रबार बोलाउने सहमति भएको छ। शुक्रबार अपरान्ह ४ बजे बालुवाटारमा नै समन्वय समितिको बैठक बस्ने छ।
बैठक मुख्य रुपमा स्थानीय तहको निर्वाचन लगायतको पछिल्लो राजनीतिक घटनाक्रममै केन्द्रित हुने नेताहरुले बताउँदै आएका छन्। निर्वाचन आयोगले वैशाखभित्रमा नै स्थानीय तहको निर्वाचन गर्नुपर्ने भन्दै मिति सिफारिस गरिसकेको अवस्थामा गठबन्धन दलबीच सहमति जुट्न सकेको छैन।
नेकपा माओवादी केन्द्रका अध्यक्ष दाहालले मंगलबारको समन्वय समितिको बैठकमा वैशाखमा पहिले संघीय निर्वाचन गर्नुपर्ने र त्यसपछि प्रदेश र स्थानीय तहको निर्वाचन गर्नुपर्ने प्रस्ताव राखेपछि त्यो विषय अहिले चर्चामा देखिएको छ। यस विषयमा पनि सम्भवत: शुक्रबार बस्ने बैठकमा छलफल हुन सक्ने प्रधानमन्त्रीनिकट एक नेताले बताए।
२०७४ मा भएको स्थानीय तहको निर्वाचनमा निर्वाचित पदाधिकारीहरुको पदावधि जेठ ५ पछि सकिने र स्थानीय तह रिक्त हुने भन्दै आयोगले वैशाखमा निर्वाचन गराएर ३१ गते अगाडि नै शपथ ग्रहण गराइसक्नुपर्ने बताउँदै आएको छ।
तर, गठबन्धन दलले भने संविधान र स्थानीय निर्वाचन ऐन बाझिएको भन्दै आवश्यक छलफल गरेर स्थानीय तहको निर्वाचन केही समय सार्नुपर्ने बताउँदै आएका छन्। प्रमुख प्रतिपक्षी दल एमाले भने निर्वाचन आयोगले तोकेकै मितिमा स्थानीय तहको निर्वाचन हुनुपर्ने अडानमा छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।