काठमाडौं– नेकपा एमालेका नेता भीम रावलले भारतले नेपाली भूमि लिपुलेकमा सडक निर्माण (विस्तार) गर्ने घोषणा गर्दा सरकार किन मौन रहेको भन्दै प्रश्न गरेका छन्।
सामाजिक सञ्जालमा एक सन्देश लेख्दै रावलले लिपुलेक, कालापानी र लिम्पियाधुरा नेपाली भूमि भएका अकाट्य प्रमाण भएको र उक्त भूमिमा भारतले सडक निर्माण (विस्तार) गर्ने घोषणा गर्दा नेपाल सरकार चुप रहेको भन्दै आलोचना गरेका छन्।
प्रधानमन्त्री शेरबहादुर देउवा र एमाले अध्यक्ष केपी शर्मा ओलीबीच भएको भेटवार्तामा अमेरिकी परियोजना एमसीसीबारे छलफल हुने, तर नेपाली भूभाग अतिक्रमणमा परेकोबारे कुरा नगर्ने भन्दै आपत्ति जनाएका छन्।
'नेपालको लिपुलेकमा सडक अघि बढाउने भनी भारतीय प्रधानमन्त्री नरेन्द्र मोदीको सार्वजनिक भनाइमा नेपाल सरकार किन मौन? लिपुलेक, कालापानी र लिम्पियाधुरा नेपाली भूमि भएका अकाट्य प्रमाण छन्। एमसीसी सम्झौताबारे देउवा-ओली वार्ता गर्ने, तर देशको भूभाग अतिक्रमणमा परेकोबारे कुरा नगर्ने, लज्जास्पद चरित्र!' रावलले भनेका छन्।
नेपालसँग सीमा जोडिएको राज्य उत्तराखण्डको हल्द्वानीमा आयोजित एक र्यालीलाई सम्बोधन गर्दै भारतीय प्रधानमन्त्री नरेन्द्र मोदीले आफ्नो सरकारले लिपुलेकमा एउटा सडक बनाएको र हाल उक्त सडक विस्तार गर्ने काम चलिरहेको बताएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।