कांग्रेस उपसभापति गुरुङ, फाइल तस्बिर
काठमाडौं– नेपाली कांग्रेसको १४औं महाधिवेशनमा सभापतिमा पराजित भएका शेखर कोइराला पक्षले समीक्षा बैठक आयोजना गरेको छ। बुधबार सिंहदरबार नजिकैको एक होटलमा आयोजित भेलामा झन्डै २ सयको हाराहारीमा नेता तथा कार्यकर्ता सहभागी थिए। बैठकमा कोइरालाका साथै कोइराला पक्षबाट विजयी भएका उपसभापति धनराज गुरुङ, महामन्त्री गगन थापा, सहमहामन्त्रीद्वय बद्री पाण्डे र जीवन परियार लगायतका नेताहरु पनि उपस्थित थिए।
महाधिवेशनअघि नै पार्टीभित्रका गुटबन्दीको चर्को विरोध गरेको यो पक्षले महाधिवेशन सकिएको तेस्रो हप्तामै त्यसको समीक्षा र सभापति शेरबहादुर देउवाको एकलौटी विरुद्ध लड्ने रणनीति तय गर्न बैठक बोलाएको हो। सभापति देउवाले पछिल्ला दिनमा मनोनित गरेका केन्द्रीय सदस्य तथा राष्ट्रिय सभाका उम्मेदवारको सन्दर्भमा यो पक्ष असन्तुष्ट छ। कार्यक्रममा सम्बोधन गर्दै कोइरालाले भनेका थिए- 'पार्टीमा सभापतिज्यूले केही साथीहरुलाई केन्द्रीय सदस्यमा नियुक्ति गर्नुभएको छ। नियुक्ति पाउनुभएका सबै साथीहरु सक्षम र योग्य नै हुनुहुन्छ। तर, के 'मापदण्ड' अपनाएर उहाँहरु नियुक्त हुनुभएको हो? हामी जान्न चाहन्छौं। पार्टीमा न्यायोचित अवसरको वितरण र व्यवस्थापन हुन जरुरी छ, नभए कार्यकर्ता किन कांग्रेसमा बस्ने भनी प्रश्न उठ्न सक्छ।'
उनले पार्टीभित्र हुने सबै कार्यहरु न्यायसंगत, विधि र विधानसंगत, विवेकपूर्ण र व्यवहारिक तरिकाबाट निर्णय गर्न माग पनि गरेका छन्।
उपसभापति गुरुङले पनि कांग्रेसभित्र जिम्मेवारी दिँदा गुटगत अनुहार देखिँदैन भन्ने आफूहरुको धारणा रहेको बताए। तर, आफूहरुको समूहको बैठकलाई भने उनले उचित ठहर्याउने प्रयास गरे। 'छलफल नै गर्न पाइँदैन, छलफलै हुँदैन, कहीँ बस्ने हुँदैन, चिया खाएर बस्नुहुन्न, खाना खाएर बस्नुहुन्न भनेको त होइन नि। छलफल हुन्छ', पत्रकारहरुसँग कुरा गर्दै उनले भने।
उनले आफूहरुले गुटगत व्यवहारभन्दा पनि न्यायोचित व्यवस्थापनलाई जोड दिने बताए। 'विधि र विधान बमोजिम पार्टीलाई सञ्चालन गर्ने, पार्टीलाई रुपान्तरित गर्ने, सहमति र सहकार्यको बाटोमा लैजाने भन्ने बारेमा छलफल हुन्छ', उनले भने, 'गुट बनाउन, गुटलाई बलियो बनाउनको लागि होइन, सिंगो पार्टीलाई बलियो बनाउन गम्भीर भएर छलफल गर्छौं।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।