काठमाडौं- आइडिया स्टुडियो नेपालले सिजन ६ का लागि आवेदन खुला गरेको छ। सोचदेखि उद्योगसम्मको नारासहित कार्यक्रम आयोजना गर्दै आएको आइडिया स्टुडियोले सिजन ६ का लागि आवेदन खुलाएको हो।
सिजन ६ मा समावेश हुनका लागि आगामी माघ १७ गतेसम्म आवेदन दिनसक्ने आइडियाले जानकारी दिएको छ। 'आइडियाले सिजन ५ सम्म २५ सयभन्दा बढी नवीन व्यावसायिक विचारहरूलाई स्थान दिइसकेको छ। त्यसमध्ये १६० जना इन्क्युबेसन कार्यक्रममा गएका छन् भने ६० भन्दा बढी व्यवसायहरू सफलतापूर्वक सञ्चालनमा छन्,' संस्थाद्वारा जारी विज्ञप्तिमा उल्लेख छ।
सिजन ६ का लागि आवेदन दिन आइडियास्टुडियो डटओआरजी डटएनपीमार्फत् सम्पर्क गर्न सकिने जानकारी दिइएको छ।
आइडियाले नयाँ उद्यमीहरुको व्यापार अवधारणा उत्कृष्ट बनाउन सल्लाह दिने र उक्त विचारलाई एपीवान टेलिभिजनमार्फत् प्रसारण गरिने बताएको छ। त्यसमध्ये चार जनाको व्यवसायलाई (मेड इन नेपाल, सोसल इम्प्याक्ट, हाई फ्लाइङ र इनोभेसन) का लागि योग्य आइडियाहरूमा छनोट गरेपछि बीज लगानीका लागि योग्य हुने जनाएको छ।
आइडिया स्टुडियो नेपालका कार्यकारी अध्यक्ष डा. छिरिङ लामाले स्थापना भएदेखि नै आइडिया स्टुडियो नेपालले आफ्ना प्रमुख कार्यक्रमहरू मार्फत सातवटै प्रदेशमा १६ देखि ६७ वर्ष उमेर समूहका व्यक्तिहरूको व्यापक सहभागिता जुटाउन सफल भएको बताए। उनले भने, ‘आइडिया स्टुडियो सिजन ६ का लागि हामी आर्थिक लगानीको लागि मात्र नभइ ज्ञान, समय, स्रोत र विश्वासका हिसाबले पनि मानिसहरूलाई आफ्ना विचारलाई वास्तविकतामा ल्याउन प्रोत्साहन र सशक्त बनाउन मञ्च प्रदान गर्न तयार छौं।’
आइडियाले सन् २०१६ देखि सामाजिक सचेतना, व्यवसाय, उद्यमी र स्टार्टअपहरूका लागि प्रोत्साहन, स्रोत साधन, ठाउँ, एक्सपोजर, सिकाइ, नेटवर्किङ र लगानीका अवसरहरू उपलब्ध गराउने काम गर्दै आएको छ।
संस्थाको नीति साझेदारका रूपमा राष्ट्रिय युवा परिषद्, काठमाडौं विश्वविद्यालय स्कुल अफ म्यानेजमेन्ट (कुसुम) ज्ञान साझेदार, वर्ल्ड वाइल्डलाइफ नेपाल (डब्लुडब्लुएफ नेपाल) इको इम्प्याक्ट पार्टनर, आइडिया इम्प्याक्ट फन्ड लगानी साझेदार, प्रभु बैंक बैंकिङ पार्टनरको रूपमा रहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
