काठमाडौं- मछिन्द्र फुटबल क्लबले एएफसी कप छनोटमा नेपालको प्रतिनिधित्व गर्ने भएको छ। आइतबार सहिद स्मारक ‘ए’ लिग अन्तर्गत सातौं चरणको खेलमा विभागीय टोली नेपाल पुलिस क्लबलाई १-० गोलअन्तरले हराउँदै डिफेन्डिङ च्याम्पियन मछिन्द्रले दोस्रोपटक एएफसी कप छनोटको ढोका खुला गरेको हो।
त्रिपुरेश्वरस्थित दशरथ रंगशालामा सम्पन्न खेलमा मछिन्द्रका लागि सुनिल बलले पहिलो हाफमा गरेको एक मात्रै गोल निर्णायक बनेको थियो।
खेलको २१औं मिनेटमा विशाल राईको फ्रिकिकमा ‘अनमार्क’ रहेका सुनिलले गरेको हेडरले जाली चुमेको थियो। जारी लिगमा सुनिलको यो पाँचौं गोल हो।
छैटौं चरणमा मर्स्याङ्दी मनाङमाथि इन्जुरी समयमा पनि सुनिलले निर्णायक गोल गरेका थिए। लिग च्याम्पियनले एएफसी कप खेल्नु पर्ने भएपछि समय अभावका कारण सातौं चरणमै एएफसी क्लब लाइसेन्स प्राप्त गर्ने ४ मध्ये अंक तालिकाको माथिल्लो स्थानमा रहने टोलीलाई एएफसी कपको छनोट खेलाउने अखिल नेपाल फुटबल संघ (एन्फा)ले घोषणा गरेको थियो। त्यसैले लिगको १३ मध्ये सातौं चरणको माथिल्लो टोलीले एएफसी कप छनोट खेल्नेछ।
अर्को दाबेदार मनाङले शनिबार पोखरा रंगशालामा ब्रिगेड ब्वाइज क्लब (बीबीसी)लाई १-० ले हराउँदै शीर्षस्थानमा पुनरागमन गरेसँगै मछिन्द्रलाई छनोटका लागि पुलिसविरुद्ध जित्नै पर्ने दबाब थियो। बराबरी वा हारले टोलीको एएफसी कप छनोटको सम्भावना टुंगिने थियो।
तर, छैटौं चरणमा मनाङलाई १-० ले हराएपछि मछिन्द्रको एसियाली फुटबल महासंघ (एएफसी)को आधिकारिक प्रतियोगिता पहिलोपटक खेल्ने सम्भावना बलियो भएको थियो।
मछिन्द्रको एएफसी कप छनोट यात्रा
१८ वर्षअघि ‘ए’ डिभिजन लिगमा बढुवा भएको मछिन्द्रले पहिलोपटक एएफसीको आधिकारिक प्रतियोगितामा नेपालको प्रतिनिधित्व गर्ने पक्का भएको छ।
गत सिजनमा लिग उपाधि जिते पनि एएफसी क्लब लाइसेन्स नहुँदा मछिन्द्रले एएफसी कप छनोट खेल्नबाट बञ्चित भएको थियो। सो सिजन त्रिभुवन आर्मी क्लबले लिग विजेताको रुपमा एएफसी कप छनोटमा नेपालको प्रतिनिधित्व गरेका थिए। आर्मी दोस्रो चरणसम्म पुगेको थियो।
पहिलो चरणमा न्यूरोड टिम (एनआरटी) लाई २-१ ले हराउँदै जारी लिगमा विजयी सुरुआत गरेको मछिन्द्र दोस्रो खेलमा आर्मीसँग बराबरीमा रोकिएको थियो।
यस्तै, तेस्रो खेलमा जावलाखेल युथ क्लबलाई २-० र चौथोमा हिमालयन शेर्पा क्लबलाई ३-० ले हराउँदै मछिन्द्र पाँचौं चरणमा संकटा क्लबसँग गोलरहित बराबरी रोकिएको थियो।
छैटौं खेलमा मनाङलाई १-० ले हराउँदै मछिन्द्रले एएफसी कप छनोटको सम्भावना बलियो बनाएको थियो। जारी लिगमा अपराजित ३ टोलीमध्ये एक हो मछिन्द्र। आर्मी र संकटा पनि सातौं चरणको समाप्तीसम्म अपराजित छन्।
जितसँगै ७ खेलमा १७ अंक जोडेको मछिन्द्र शीर्षस्थानमा उक्लिएको छ। समान खेलबाट १६ अंक जोडेको मनाङ दोस्रो स्थानमा छ। पुलिस भने ७ खेलमा ६ अंक जोड्दै १०औं स्थानमा छ।
पुलिसमाथि दबदबा
खेलको अधिकांश समय मछिन्द्र पुलिसविरुद्ध हाबी भएको थियो। उसले पहिलो हाफमा नै अग्रता लिएपछि दोस्रो हाफमा डिफेन्स खेल्दै बेलाबेलामा अट्याकिङ खेल्दै पुलिसका गोलरक्षक सत्रुधन चौधरीलाई व्यस्त बनाएका थिए।
यस्तै, पुलिस पनि खेलमा केही मौका बनाएपनि राम्रो फिनिसिङ गर्न नसक्दा ३ अंक गुमायो। २१औं मिनेटमा हेमन्त श्रेष्ठले नुर्लान नोभ्रुजोभलाई फउल गरेपछि विशाल राईले झन्डै ३५ यार्ड टाढाबाट गरेको फ्रिकिकलाई ‘अनमार्क’मा रहेका सुनिलले २ हेडरमार्फत् गोल गरेका थिए।
खेलको ४३औं मिनेटमा डिबक्स भित्रबाट विशालले गरेको सशक्त प्रहारलाई पुलिसका गोलकिपर सत्रुघनले पञ्च गरेको बल ६ यार्डभित्रबाट रक्षक सन्तोष हेमरमले ‘क्लियर’ गर्दा मछिन्द्रले अग्रता दोब्बर पार्न सकेन।
६८औं मिनेटमा मनिष डाँगीले गोरलक्षक सत्रुघनलाई बिट गर्दै गरेको प्रहार दोस्रो बारबाट बाहिरियो।
लगत्तै काउन्टर अट्याका कप्तान रामचन्द्र वाजीको पेनाल्टी बक्सभित्रको प्रहार आकासियो। ७६औं मिनेटमा सुमन लामाको फ्रिकिक पोलमा लागेर फर्कदा पुलिस बराबरीबाट चुक्यो। ७८औं मिनेटमा कप्तान सुजल श्रेठको प्रहार गोलरक्षक सुत्रुघनले पञ्च गर्दै बचाए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
