काठमाडौं- नेकपा (माओवादी केन्द्र)को जारी बन्दसत्र आइतबार १ बजेसम्मका लागि स्थगित भएको छ।
केन्द्रीय निर्वाचन समितिले आजै बाट निर्वाचन प्रक्रिया सुरु गर्ने गरी निर्वाचन कार्यतालिका सार्वजनिक गरे पनि सहमतिको प्रयास गर्ने भन्दै बन्दसत्र स्थगित गरिएको हो।
शनिबारको बन्दसत्रमा भएका गतिविधिबारे पार्टीको महाधिवेशन प्रचार तथा प्रकाशन उपसमितिले विज्ञप्तिमार्फत् जानकारी दिएको छ।
प्रेस विज्ञप्तिको पूर्णपाठ:
प्रेस नोट
नेपाल कम्युनिष्ट पार्टी (माओवादी केन्द्र) को कमलादीस्थित प्रज्ञा भवनमा जारी आठौं राष्ट्रिय महाधिवेशनको १७ पुस २०७८ को बन्द सत्रको कार्यक्रम बारे जानकारी गराउन यो प्रेस नोट जारी गरिएको छ ।
१. बन्द सत्र अपरान्ह १ बजेबाट सुरु भयो । बन्द सत्रमा स्थायी कमिटी सदस्य क. देवप्रसाद गुरुङले विधान मस्यौदामाथि समूहगत छलफलबाट आएका सुझाव र उठेका जिज्ञासामाथि जवाफ दिनुभयो । उहाँले सुझावहरु समेटेर विधान परिमार्जन गर्ने र त्यसलाई आगामी केन्द्रीय कमिटीले अन्तिम रुप दिने जानकारी गराउनु भएपछि महाधिवेशनको बन्द सत्र हलले सर्वसम्मतले पार्टीको विधान पारित गर्यो । नयाँ विधान अनुसार अब पार्टीको केन्द्रीय कमिटी ५० प्रतिशत खुल्ला र ५० प्रतिशत पूर्ण समानुपातिक गरी मिश्रित निर्वाचन प्रणालीका माध्यमबाट चुनिनेछ । केन्द्रीय कमिटी २९९ सदस्यीय हुनेछ । यसअघि केन्द्रीय कमिटीले १० प्रतिशत मनोनित गर्ने भनिएकोमा बढाएर १५ प्रतिशत पुर्याइएको छ । महाधिवेशनले केन्द्रीय कमिटी, केन्द्रीय कमिटीले पोलिटव्यूरो, स्थायी कमिटी र पदाधिकारी चयन गर्नेछ । पोलिटव्यूरो, स्थायी कमिटी र पदाधिकारी समावेशी सिद्धान्तका आधारमा चयन हुनेछ ।
२. बन्द सत्रमा पार्टी अध्यक्ष क. प्रचण्डले केन्द्रीय कमिटी सहमतिबाटै चयनको लागि अधिकतम प्रयास गर्ने र सहमति हुन नसके लोकतान्त्रिक विधिबाट चयन गर्ने जानकारी गराउनुहुँदै केन्द्रीय कमिटी सहमतिबाट चयनका लागि महाधिवेशन आयोजक समितिमा छलफल गर्ने र सोको लागि अनुमति दिन बन्द सत्र समक्ष प्रस्ताव गर्नुभयो । बन्द सत्रले उक्त प्रस्ताव पारित गरेपछि सहमतिबाटै केन्द्रीय कमिटी चयनका लागि दिनभर छलफल चल्यो ।
३. बन्द सत्र साँझ पउने सात बजे पुनः सुचारु भयो । बन्द सत्रलाई संबोधन गर्नुहुँदै अध्यक्ष क. प्रचण्डले सहमतिबाटै केन्द्रीय कमिटी चयनका लागि राम्रो गृहकार्य भएको र थप गृहकार्य गर्नुपर्ने भएकोले बन्द सत्र भोलि (आइतबार) १ बजेसम्मका लागि स्थगितको प्रस्ताव गर्नुभयो । अध्यक्ष मण्डलले बन्द सत्र भोलि १ बजेसम्म स्थगित भएको हललाई जानकारी गरायो ।
४. बन्द सत्र भोलि (आइतबार) १ बजेसम्मका लागि स्थगित भएको छ ।
१७ पुस, २०७८
प्रचार तथा प्रकाशन उपसमिति
आठौं राष्ट्रिय महाधिवेशन, नेकपा (माओवादी केन्द्र)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1748593223.png)
-1748872907.png)
