काठमाडौं- गत आइतबार काठमाडौंमा सुरु भएको नेकपा (माओवादी केन्द्र)को आठौं राष्ट्रिय महाधिवेशन धेरै हिसाबले औपचारिकता जस्तो मात्र देखिए पनि एउटा विषयले भने अर्थपूर्ण थियो। त्यो के भने पछिल्लो साढे तीन दशकदेखि पुष्पकमल दाहाल 'प्रचण्ड'को एकछत्र नेतृत्वमा चल्दै आएको पार्टी पहिलो पटक बहुपदीय अभ्यासमा जाँदै थियो। त्यसकै लागि माओवादीले विधानमा अध्यक्षसहित वरिष्ठ उपाध्यक्ष, उपाध्यक्ष र महासचिवलगायतका १५ जना पदाधिकारीको व्यवस्था गरेको थियो।
महाधिवेशनबाट हुने नेतृत्व चयनको कौतुहल पनि यसमै केन्द्रित थियो। अध्यक्षमा प्रचण्ड नै दोहोरिने निश्चित थियो, पदाधिकारीमा को आउलान् भन्ने खुल्दुली मात्र बाँकी थियो। त्यसमा पनि आफूपछिको शक्तिशाली पद महासचिवका लागि प्रचण्डको भरथेग कसलाई होला र महासचिवमा कसले बाजी मार्ला भन्ने विषय सबभन्दा धेरै चासोसाथ हेरिएको थियो।
माओवादीको महाधिवेशन यही चासो सम्बोधन नगरेरै सम्पन्न हुने तरखरमा लागेको छ। खासगरी महासचिव बन्न चाहने नेताहरुबीचको तीव्र प्रतिस्पर्धाकै कारण महाधिवेशनले बाँकी पदाधिकारी पनि टुंगो नलगाउने तयारी भएको हो। अध्यक्ष प्रचण्डनिकट एक नेताका अनुसार महाधिवेशनले अब केन्द्रीय समिति र अध्यक्ष मात्र टुंगो लगाउने सम्भावना ज्यादा छ।
शुक्रबार महाधिवेशनको पाँचौं दिनको बन्दसत्र सकिएकाले अब शनिबार केन्द्रीय समिति चयन गर्ने तयारी छ। सबै क्लस्टरलाई समेटेर २९९ सदस्यीय केन्द्रीय समिति चयन गर्ने र त्यसपछि सर्वसम्मत रुपमा अध्यक्ष चयन गर्ने माओवादीको तयारी छ।
अध्यक्ष प्रचण्डले आफ्नो राजनीतिक प्रतिवेदनमाथि उठेका प्रश्नहरुको जवाफ दिनेक्रममा शुक्रबार आसन्न तीन तहका निर्वाचन सकिएपछि विशेष महाधिवेशन गर्ने घोषणा गरेसँगै यो महाधिवेशनबाट पदाधिकारी चयन हुने सम्भावना लगभग अन्त्य भएको नेताहरुले बताएका छन्। प्रचण्डले तीन तहका निर्वाचन सकिएपछि अनुकुल समयमा विशेष महाधिवेशन गर्ने निर्णय गरेका छन्। प्रचण्डले विशेष महाधिवेशनको घोषणा पदाधिकारी चयनमा परेको कठिनाईलाई ध्यानमा राखेरै गरेको माओवादी नेताहरु बताउँछन्।
यहीकारण महाधिवेशनले केन्द्रीय समिति र अध्यक्ष मात्र चयन गर्ने उल्लेख गर्दै एक स्थायी समिति सदस्यले पदाधिकारीमा धेरै विवाद हुने देखेरै विशेष महाधिवेशनको विषय प्रवेश भएको बताए। ‘अध्यक्ष कमरेडले निर्वाचनपछि विशेष महाधिवेशन गर्ने भन्नु भएको छ। त्यो बेला अन्य पार्टीसँग समेत एकता भएर विशेष महाविधेशन हुन सक्छ’, ती स्थायी समिति सदस्यले भने, ‘यो महाधिवेशनबाट सर्वसम्मत पदाधिकारी चयनको प्रयास त हुन्छ, तर सर्वसम्मत हुने स्थिति नदेखिएकाले निर्वाचनमा सम्भवतः जाँदैन। बरु केन्द्रीय समितिबाट सर्वसम्मत अध्यक्ष चयनको घोषणा हुन्छ। केन्द्रीय समितिबाट स्थायी समितिसम्म घोषणा गर्ने काम हुन सक्छ, पदाधिकारी भने पछि मात्र टुंग्याउनेगरी।’
माओवादीले पार्टीमा अब अध्यक्षसहित १५ जना पदाधिकारी बनाउने निर्णय गरेको छ। जसमा एक वरिष्ठ उपाध्यक्षसहित ७ उपाध्यक्ष, एक महासचिव, दुई उपमहासचिव, तीन सचिव र एक कोषाध्यक्ष हुनेछन्। यी पदाधिकारीमध्ये सबभन्दा धेरै सकस महासचिवमा देखिएको छ। महासचिवमा वर्षमन पुन, जनार्दन शर्मा, पम्फा भुसाल, शक्तिबहादुर बस्नेत, गिरिराजमणि पोखरेल लगायत नेताहरुले दाबी गरेका छन्। तर, मुख्य प्रतिस्पर्धा पुन र शर्माबीचमै रहेकाले दुवैलाई मिलाउन पनि नसक्ने र एक जनालाई साथ पनि दिन नसक्ने अवस्थामा प्रचण्ड देखिएका छन्। त्यसमाथि पुन उपचारका लागि चीनमा रहेकाले महासचिवको टुंगो लगाउन प्रचण्डलाई सहज छैन।
अध्यक्षपछिको शक्तिशाली पद महासचिवमा देखापरेको सकसकै कारण प्रचण्डले विशेष महाधिवेशनको विषय ल्याएको देखिन्छ। 'अहिले पदाधिकारी टुंग्याउँदा पार्टीलाई एकजुट बनाएर अगाडि लैजाने सम्भावना नहुने देखियो', अर्का एक स्थायी समिति सदस्यले भने, 'अहिले यो विषय नै थाती राख्दा विवाद नबढ्ने, पार्टीलाई मिलाएर पनि लैजान सजिलो हुने भो।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
