काठमाडौं- नेकपा (माओवादी केन्द्र)को जारी आठौं राष्ट्रिय महाधिवेशनअन्तर्गत पाँचौ दिनको बन्दसत्र सकिएको छ। भोलि (शनिबार) बिहान ११ बजेसम्मका लागि बन्दसत्र स्थगित गरिएको छ।
शनिबार विधान मस्यौदामाथि समूहगत छलफलबाट आएका सुझाव र जिज्ञासामाथि स्थायी कमिटी सदस्य देवप्रसाद गुरुङले जवाफ दिने शुक्रबार जारी विज्ञप्तिमा उल्लेख छ।
आजको बन्दसत्रमा अध्यक्ष पुष्पकमल दाहाल ‘प्रचण्ड’ले महाधिवेशनमा प्रस्तुत ‘२१औं शताब्दीमा समाजवादको नेपाली बाटो’ शीर्षकको वैचारिक तथा राजनीतिक दस्तावेजमाथि समूहगत छलफलबाट आएका सुझाव र जिज्ञासामाथि जवाफ दिएका थिए।
'अध्यक्ष प्रचण्डले आयोजक तथा प्रतिनिधिबाट प्राप्त सुझाव समावेश गरी दस्तावेज आवश्यक परिमार्जन गर्ने प्रतिबद्धतासहित उक्त दस्तावेज पारित गरिदिन आग्रह गर्नुभएपछि महाधिवेशनको सिंगो हलले सर्वसम्मतबाट अध्यक्ष प्रचण्डबाट प्रस्तुत वैचारिक तथा राजनीतिक दस्तावेज पारित गर्यो,' पार्टीको महाधिवेशन प्रचार तथा प्रकाशन उपसमितिले जारी गरेको विज्ञप्तिमा उल्लेख छ।
बन्दसत्रमा पार्टीको केन्द्रीय निर्वाचन आयोगका प्रमुख विष्णुपुकार श्रेष्ठ, केन्द्रीय अनुशासन आयोगका प्रमुख टंक राई र केन्द्रीय लेखा आयोगका प्रमुख पेशल खतिवडाले आयोगका प्रतिवेदनहरु प्रस्तुत गरेका थिए।
विज्ञप्तिको पूर्णपाठ:
प्रेस नोट
नेपाल कम्युनिष्ट पार्टी (माओवादी केन्द्र) को आठौं राष्ट्रिय महाधिवेशनको पाँचौ दिनको बन्द सत्रको कार्यक्रम कमलादीस्थित प्रज्ञा प्रतिस्ठानमा सम्पन्न भयो । शुक्रबार अपरान्ह १ बजेदेखि ५ बजेसम्म चलेको बन्द सत्रमा भएका कार्यक्रम बारे जानकारी गराउन यो प्रेस नोट जारी गरिएको छ ।
१. बन्द सत्रमा पार्टीको केन्द्रीय निर्वाचन आयोगका प्रमुख क. विष्णुपुकार श्रेष्ठ, केन्द्रीय अनुशासन आयोगका प्रमुख क. टंक राई र केन्द्रीय लेखा आयोगका प्रमुख क. पेशल खतिवडाले आयोगका प्रतिवेदनहरु प्रस्तुत गर्नुभयो ।
२. बन्द सत्रमा पार्टी अध्यक्ष क. पुष्पकमल दाहाल ‘प्रचण्ड’ले महाधिवेशनमा प्रस्तुत ‘२१ औं शताब्दीमा समाजवादको नेपाली बाटो’ शीर्षकको वैचारिक तथा राजनीतिक दस्तावेजमाथि समूहगत छलफलबाट आएका सुझाव र जिज्ञासामाथि जवाफ दिनुभयो । उहाँले दस्तावेजले पार्टीको क्रान्तिकारी विचार निर्माण प्रक्रिया सुरु गरेको, पार्टीलाई क्रान्तिकारी दिशामा लगेको र विचार संश्लेषणका लागि महान बहसको थालनी गरेको निष्कर्ष सुनाउनुहुँदै तीनै तहका आगामी निर्वाचनपछि पार्टीको विशेष महाधिवेशन आयोजना गरेर विचारको संश्लेषण गर्ने प्रस्ताव महाधिवेशन समक्ष राख्नुभयो ।
३. अध्यक्ष क. प्रचण्डले सुझाव र जिज्ञासामाथि जवाफ दिने क्रममा स्थायी कमिटी सदस्य क. राम कार्कीले राख्नुभएको पुरक प्रस्तावलाई स्वीकार गरेर दस्तावेजमा समावेश गर्ने र केन्द्रीय सदस्य क. लेखनाथ न्यौपानेले राख्नुभएको भिन्न मतलाई भिन्न मतकै रुपमा स्वीकारेको जानकारी गराउनुभयो । त्यसैगरी २४ वटै समूहगत छलफलबाट आएका महत्वपूर्ण निष्कर्षहरुलाई दस्तावेजमा समेट्ने जानकारी गराउनुभयो ।
४. अध्यक्ष क. प्रचण्डले आयोजक तथा प्रतिनिधिबाट प्राप्त सुझाव समावेश गरि दस्तावेज आवश्यक परिमार्जन गर्ने प्रतिबद्धतासहित उक्त दस्तावेज पारित गरिदिन आग्रह गर्नुभएपछि महाधिवेशनको सिंगो हलले सर्वसम्मतबाट गडगडाहट तालीका बीच अध्यक्ष क. प्रचण्डबाट प्रस्तुत ‘२१ औं शताब्दीमा समाजवादको नेपाली बाटो’ शीर्षकको वैचारिक तथा राजनीतिक दस्तावेज पारित गर्यो ।
५. बन्द सत्र भोलि (शनिबार) विहान ११ बजेसम्मका लागि स्थगित भएको छ । शनिबार विधान मस्यौदामाथि समूहगत छलफलबाट आएका सुझाव र जिज्ञासामाथि स्थायी कमिटी सदस्य क. देवप्रसाद गुरुङले जवाफ दिनुहुनेछ ।
१६ पुस, २०७८
प्रचार तथा प्रकाशन उपसमिति
आठौं राष्ट्रिय महाधिवेशन, नेकपा (माओवादी केन्द्र)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
