काठमाडौं- नेकपा माओवादी केन्द्रका अध्यक्ष पुष्पकमल दाहाल 'प्रचण्ड'ले आठौं महाधिवशनमा आफूले राखेको राजनीतिक प्रतिवेदनमाथि फरक मत र पुरक प्रतिवेदन पेस गरेकाहरुलाई वेवास्ता गरेका छन्।
प्रतिवेदनमाथि २५ वटा समूहमा भएको छलफलपपछि उठेको प्रश्नहरुको शुक्रबार जवाफ दिएका प्रचण्डले फरक प्रस्ताव राखेका लेखनाथ न्यौपाने, हरिबोल गजुरेल र पुरक प्रतिवेदन राखेका राम कार्कीको प्रतिवेदनबारे कुनै जवाफ दिएनन्।
एमसीसीदेखि आफ्नो खुमलटार निवाससम्म उठेको प्रश्नमा जवाफ दिएका प्रचण्डले फरक प्रतिवेदनमा जवाफ दिन उचित सम्झेनन्।
नेता न्यौपानले प्रतिवेदनमा फरक मत राख्दै प्रचण्डमा आत्मकेन्द्रित व्यक्तिवादी प्रवृत्ति देखिएको भन्दै आलोचना गरेका थिए। उनले एमालेमा देखिएको केपी शर्मा ओलीको बा प्रवृत्ति माओवादीमा पनि रहेको भन्दै आलोचना गरेका थिए।
त्यस्तै नेता राम कार्कीले सैद्धान्तिक कुरा उठाएर पुरक प्रतिवेदन पेस गरेका थिए। तर नेताहरुको प्रतिवेदन र फरकमत बारे प्रचण्डले उल्लेख गरेनन्।
तर उनले फरक प्रस्ताव राख्नेहरुका लागि विशेष महाधिवेशन आयोजना गर्ने बताए। उनले त्यसमा विचार र बहस गर्न पाइने बताए। तीन तहका निर्वाचन पछि विशेष महाधिवेशनमा जाने प्रचण्डको भनाइ थियो।
'प्रतिनिधि सभा, प्रदेश सभा र स्थानीय तहको निर्वाचन यही वर्षभित्र सक्नुपर्ने छ। उक्त निर्वाचनपछि विशेष महाधिवेशन गर्दै विचार र बहसलाई त्यहाँ पुगेर पूर्णता दिने' भन्दै उनले यो सुरुवातमात्र भएको र पूर्णता नभएको बताए । दस्तावेजमा पूर्वीय दर्शन र बुद्धका कतिपय प्रगतिशील विषय पनि समेट्ने भन्दै उनले अब केन्द्रीय सदस्यले काठमाडौं बस्न नपाउने र गाउँ गाउँ पुगेर संगठन विस्तार गर्नुपर्ने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768716527.png)
-1768712852.png)
-1764146706.png)
-1768395492.png)
