काठमाडौं- विभिन्न राजनीतिक दलका नेताहरुले अपांगता भएका व्यक्तिहरुलाई राजनीतिमा उचित सहभागिता गराउने प्रतिवद्धता जनाएका छन्। नेत्रहीन युवा संघ नेपालले बुधबार आयोजना गरेको अपांगता भएका व्यक्तिहरुको राजनीतिक सहभागिता विषयक अन्तरक्रिया कार्यक्रममा बोल्दै उनीहरुले यस्तो प्रतिवद्धता जनाएका हुन्।
कार्यक्रममा बोल्दै नेकपा एमालेका सचिव योगेश भट्टराईले लोकतान्त्रिक आन्दोलनमा महत्वपूर्ण योगदान दिएका अपांगता भएका व्यक्तिहरुलाई राजनीतिको मूलधारमा अपेक्षाकृत समेटिन नसकेको भन्दै अवका दिनमा ती कमजोरीहरुलाई सच्याउने बताए।
उनले पार्टीमा नयाँ नियमावली बन्ने चरणमा रहेको भन्दै त्यसमा अपांगता र अल्पसंख्यक व्यक्तिहरुलाई विशेषाधिकार सहितको व्यवस्था गर्ने बताए। उनले भने, 'हाम्रो पार्टी समावेशी समानुपातिक प्रणाली अनुसार सञ्चालन भइरहेको छ। आवश्यकता अनुसार नीति नियमहरुलाई थप संशोधन गरेर अघि बढ्ने दिशामा हामी सधैं सकारात्मक छौं।'
नेपाली कांग्रेसका सहमहामन्त्री बद्री पाण्डेले अपांगता भएका व्यक्तिहरुको राजनीतिक पहुँचका लागि आफ्नो पार्टी सकारात्मक रहेपनि त्यसलाई व्यवहारिक कार्यान्वयन गर्न मात्रै केही कमजोरी रहेको बताए। उनले भर्खरै सम्पन्न महाधिवेशनबाट आफ्नो पार्टीमा केन्द्रीय सदस्य पदमा अपांगता भएका व्यक्तिहरु निर्वाचित भएर आएको भन्दै पार्टीका बैठकमा प्रभावकारी हस्तक्षेप हुनसक्ने बताए।
जनता समाजवादीका केन्द्रीय सदस्य निर्मला यादवले आफ्नो पार्टीले अपांगता भएका व्यक्तिलाई राजनीतिको मूलधारमा ल्याउनका लागि आवश्यक नीति संसोधन गर्न सक्ने बताइन्। उनले संविधानमा समेत केही त्रुटी भएका कारण अपांङ्गता भएका व्यक्तिको अधिकार राजनीतिक हक अधिकार समेट्न नसकेको भन्दै त्यसमा पनि संसोधन गर्नुपर्ने बताइन्।
विवेकशील साझा पार्टीका प्रवक्ता शरदराज पाठकले आफ्नो पार्टीको नीति समतामूलक समृद्धि रहेको भन्दै अपांगता भएका व्यक्तिहरुलाई प्राथमिकताका साथ समेटेको दावी गरे। उनले आफ्नो कार्यालय अपांगमैत्री बनाइएको भन्दै नेतृत्व तहमा समेत अपांगताको प्रतिनिधित्व भएको बताए । उनले पार्टीलाई थप समावेशी बनाउनका लागि आफूहरु सधै लचिलो रहेको समेत दावी गरे।
कार्यक्रममा नेकपा समाजवादीका उपमहासचिव जगन्नाथ खतिवडा, जसपाका प्रकाश अधिकारीले आफ्ना धारणा राखेका थिए।
त्यसअघि नेत्रहीन युवा संघ नेपालका अध्यक्ष कलाधर भण्डारीले अपांगता भएका व्यक्तिको राजनीतिक सहभागिताका विषयमा प्रस्तुति राखेका थिए। उनले संविधान, दलहरुका दस्तावेजमा अपांगता शव्द राखिएपनि त्यसलाई व्यवहारिक रुपमा कार्यान्वयनमा नल्याईएको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791212224.jpg)
-1786602170.png)
-1791090469.jpeg)
