काठमाडौं- राष्ट्रिय पुनर्निर्माण प्राधिकरणबाट भइरहेका विभिन्न कार्यहरु, श्रेष्ता तथा कागजात राष्ट्रिय विपद् जोखिम न्यूनीकरण तथा व्यवस्थापन प्राधिकरणलाई हस्तान्तरण गरिएको छ।
बिहीबार सिंहदरबारस्थित पुनर्निर्माण प्राधिकरण परिसरमा आयोजित ‘हस्तान्तरण तथा बहिर्गमन’ कार्यक्रममा बाँकी दायित्व तथा कागजात हस्तान्तरण गरिएको हो।
हस्तान्तरण कार्यक्रममा मन्तव्य राख्दै गृहमन्त्री बालकृष्ण खाँणले पुनर्निर्माणका क्रममा प्राधिकरणको अनुभव र दक्षतालाई अनुशरण गर्दै आगामी दिनका विपद् जोखिम व्यवस्थापनमा क्रियाशील हुन राष्ट्रिय विपद् जोखिम न्यूनीकरण तथा व्यवस्थापन प्राधिकरणलाई सुझाव दिए।
प्राधिकरणका प्रमुख कार्यकारी अधिकृत सुशील ज्ञवालीले पुनर्निर्माणका क्रममा प्राप्त अनुभव र सिकाइको जगमा तयार भएको विपद् जोखिमबाट सुरक्षित नेपाल निर्माणको अवधारणा व्यवस्थित रुपमा अगाडि बढ्ने विश्वास व्यक्त गरे।
त्यस्तै, राष्ट्रिय विपद् जोखिम न्यूनीकरण तथा व्यवस्थापन प्राधिकरणका प्रमुख कार्यकारी अनिल पोखरेलले जिम्मेवारीमा आएका कार्यहरु निर्देशक समितिको निर्णयअनुसार भूकम्प पुनर्निर्माण एकाइमार्फत् सम्पादन गरिने जानकारी दिए।
पुनर्निर्माण प्राधिकरणबाट हस्तान्तरण भइ विभिन्न मन्त्रालय, विभाग एवं निकायहरुमार्फत् सम्पादन भइरहेका पुनर्निर्माण तथा पुनर्स्थापनासम्बन्धी कार्यहरुको सहजीकरण, समन्वय तथा अनुगमनसम्बन्धी कार्यहरु अब राष्ट्रिय विपद् जोखिम न्यूनीकरण तथा व्यवस्थापन प्राधिकरणमार्फत् हुने छन्।
त्यसैगरी, पुनर्निर्माण प्राधिकरणअन्तर्गतको चालु र पुँजीगत खर्चको आव ०७८/७९ को एकीकृत आर्थिक विवरण तयार गर्ने कार्य तथा लेखापरीक्षणसम्बन्धी कार्यहरुको जिम्मेवारी पनि यसै प्राधिकरणलाई हस्तान्तरण भएको छ। यसका साथै विश्व बैँकसँगको सम्झौताबमोजिम कार्यान्वयन भइरहेका भूकम्पीय आवास पुनर्निर्माण आयोजना तथा एमडीटीएफसँग सम्बन्धित प्राविधिक सहयोग, सोधभर्ना र प्रतिवेदनसम्बन्धी कार्य पनि अब यही निकायले हेर्नेछ।
यीसम्बन्धी दस्तावेजहरु राष्ट्रिय पुनर्निर्माण प्राधिकरणका प्रमुख कार्यकारी अधिकृत ज्ञवालीले राष्ट्रिय विपद् जोखिम न्यूनीकरण तथा व्यवस्थापन प्राधिकरणका प्रमुख कार्यकारी पोखरेललाई हस्तान्तरण गरे।
त्यस्तै, पुनर्निर्माण प्राधिकरणले प्रत्यक्ष हेरिरहेको धरहरा, सिंहदरबार, रानीपोखरीको शान्तिवाटिका खण्ड, हरिहर भवन तथा नारायणहिटी संग्रहालयअन्तर्गतको रणोद्विप दरबारको भौतिक निर्माणको कार्य सहरी विकास मन्त्रालयअन्तर्गतको सहरी विकास तथा भवन निर्माण विभागलाई हस्तान्तरण गरिएको छ।
यी कार्यहरु राष्ट्रिय पुनर्निर्माण प्राधिकरणका सचिव सुशिलचन्द्र तिवारीले सहरी विकास सचिव मणिराम गेलाललाई हस्तान्तरण गरे। हस्तान्तरण तथा बहिर्गमन कार्यक्रममा गृहसचिव टेकनारायण पाण्डेको पनि उपस्थिति थियो।
बिहीबार नै भएको छुट्टै कार्यक्रममा पुनर्निर्माण सम्पन्न भएको रानीपोखरी काठमाडौं महानगरपालिकाको कार्यालयलाई हस्तान्तरण गरिएको छ। रानीपोखरीमा आयोजित कार्यक्रममा राष्ट्रिय पुनर्निर्माण प्राधिकरणका प्रमुख कार्यकारी अधिकृत ज्ञवालीले रानीपोखरीको सम्पूर्ण संरक्षण दायित्व काठमाडौं महानगरपालिकाका प्रमुख विद्यासुन्दर शाक्यलाई हस्तान्तरण गरे।
बुधबार बसेको निर्देशक समितिको बैठकले प्राधिकरणअन्तर्गत भइरहेका कार्य तथा हक, दायित्व, सम्पत्ति, श्रेष्ता, कागजात तथा विवरणको हस्तान्तरण सम्बन्धमा पनि निर्णय गरेको थियो।
केन्द्रीय आयोजना कार्यन्वयन एकाइ (भवन), केन्द्रीय आयोजना कार्यन्वयन एकाइ (शिक्षा) र केन्द्रीय आयोजना कार्यन्वयन एकाइ (अनुदान व्यवस्थापन तथा स्थानीय पूर्वाधार) अन्तर्गत सम्बन्धित श्रेष्ता तथा कागजात सम्बन्धित मन्त्रालय एवं विभागमा भदौ अन्तिम साता हस्तान्तरण भइसकेका छन्।
राष्ट्रिय पुनर्निर्माण प्राधिकरणको कार्यकाल आज (पुस ९) बाट सकिँदै छ।
पुनर्निर्माण तथ्यांक
पुनर्निर्माण लाभग्राही
अनुदान सम्झौता गरेका लाभग्राहीः ८,२९,६६७
पहिलो किस्ता लिएका लाभग्राहीः ८,२८,७६३
दोस्रो किस्ता लिएका लाभग्राहीः ७,५०,४५९
तेस्रो किस्ता लिएका लाभग्राहीः ७,०३,३०७
निजी आवास पुनर्निर्माण
पुनर्निर्माण सम्पन्न घरः ७,०३,३०७ (तेस्रो किस्ता लिएको आधारमा)
विद्यालय भवन
लक्ष्य– ७५५३, पुनर्निर्माण सम्पन्न– ६,६४७, पुनर्निर्माण जारी – ९३६
स्वास्थ्य संस्थाका भवन
लक्ष्य – ११९७, पुनर्निर्माण सम्पन्न – ७५१, पुनर्निर्माण जारी – ३५४
साँस्कृतिक सम्पदा
लक्ष्य– ९२०, पुनर्निर्माण सम्पन्न – ६०६, पुनर्निर्माण जारी – २८८
सरकारी भवन
लक्ष्य– ४१५, पुनर्निर्माण सम्पन्न – ३८८, पुनर्निर्माण जारी – २०
सुरक्षा निकायका भवन
लक्ष्य– २१६ (पुनर्निर्माण प्राधिकरणमार्फत्), पुनर्निर्माण सम्पन्न – २१६, पुनर्निर्माण जारी – ०
जोखिमयुक्त बस्तीका लाभग्राहीको व्यवस्थापन
जम्मा लाभग्राही– ४,७२०
सुरक्षित ठाउँमा जग्गा खरिद तथा व्यवस्थापन भएका – ३,४६२
सुरक्षित बस्तीका लागि सरकारी जग्गा प्राप्त गर्ने लाभग्राहीः ६२९
अन्य ढंगबाट जग्गा व्यवस्थापन गरेका – ६२९
भूमिहीन लाभग्राहीको व्यवस्थापन
जम्मा लाभग्राही– १२,७५७
साविककै स्थानमा घर बनाउन अनुमति पाएका – ११,५८०
जग्गा खरिद अनुदान उपलब्ध गराउने निर्णय भएका – १,१७७
जग्गा खरिद अनुदान उपलब्ध गराइएका – ७५७
निर्माणकर्मी तालिम
करिब १ लाख जना
अनुभवप्राप्त इञ्जिनियर
करिब ६ हजार जना
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768221200.png)
-1764146706.png)
