काठमाडौं– बंगलादेशमा जारी साफ यू–१९ महिला च्याम्पियनसिप फुटबलमा नेपाल भारतसँग पराजित भएको छ।
ढाकास्थित सहिद सिपाही मुस्तफा कमल स्टेडियममा आइतबार सम्पन्न खेलमा नेपाल भारतसँग १-० गोल अन्तरले पराजित भएको हो। जितसँगै भारत फाइनमा प्रवेश गरेको छ।
पहिलो हाफमा रक्षात्मक भएर खेले पनि दोस्रो हाफमा नेपालले कमजोर डिफेन्स खेल्दा गोल खाएको हो। भारतका लागि प्रियंकादेवी नाओरेमले गरेको गोल नै निर्णायक भयो।
पहिलो हाफमा दुवै टोलीले केही मौका बनाए पनि गोल भने गर्न सकेनन्। खेलको ६७औं मिनेटमा भारतले नेपालको कमजोर डिफेन्सको फाइदा उठायो। सुमति कुमारीले ५ यार्डबाट नेपाली डिफेन्डर विमला विश्वकर्मालाई छक्याउँदै दिएको पासलाई ओभर रनमा अनमार्क रहेकी प्रियंकाले गरेको प्रहार नेपाली गोलरक्षक अन्जना रानामगरको हातै नजिकबाट पोस्टभित्र छिर्यो।
त्यसपछि नेपालले खेलमा फर्किने कोसिस गरेपनि सफल हुन सकेन र सजिलै फाइनल पुग्ने अवसर गुमायो। नेपालले अब फाइनल पुग्न बंगलादेश र श्रीलंकाबीचको खेलको नतिजा प्रतीक्षा गर्नुपर्छ। आजै हुने यो खेलमा बंगलादेश पराजित भए नेपाल फाइनल पुग्न सक्ने छ। तर, त्यो अवस्थामा गोलअन्तर हेर्नुपर्ने हुन्छ। बंगलादेश साविक विजेता र नेपाल साविक उपविजेता हो।
५ टोलीको सहभागिता रहेको च्याम्पियनसिपमा नेपालले अघिल्ला ३ खेलमा २ जित र १ बराबरी खेलेको थियो। नेपाल अंक तालिकाको दोस्रो स्थानमा छ। जित निकालेको भारतको ३ जित र १ हारसहित ९ अंक छ। भारत शीर्ष स्थानमा उक्लिएको छ।
नेपालसँग समान अंक भएपनि गोलअन्तरमा पछि रहेको आयोजक बंगलादेश तेस्रो स्थानमा छ।
बंगलादेशसँग गोलरहित बराबरी खेल्दै च्याम्पियनसिपको सुरुआत गरेको नेपालले नेपालले दोस्रो खेलमा श्रीलंकालाई ६–० र तेस्रो खेलमा भुटानलाई ४–० ले हराएको थियो। सुरुवाती दुई खेलमा श्रीलंका र भुटानलाई हराएको भारत बंगलादेशसँग पराजित भएको थियो।
राउन्ड रोबिन पछि शीर्ष २ टोलीले पुस ७ गते उपाधिका लागि खेल्नेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
