काठमाडौं– ‘चपली हाइट’ फिल्म शृङ्खलाका निर्माता अर्जुन कुमारले आफ्नो पछिल्लो फिल्म ‘चपली हाइट ३’को प्रदर्शन तोकिएको मितिमै दक्षिण भारतीय फिल्म ‘पुष्पा’ प्रदर्शन हुने भएपछि सारेका थिए। पुस २ गते प्रदर्शन हुने फिल्म पुष १५ गतेका लागि सरेको थियो। निर्माता कुमारले आफ्नो फिल्मसँगै हिन्दी डब फिल्म रिलिज गर्न लागिएको भन्दै सामाजिक सञ्जलमा व्यापक हल्ला पनि गरेका थिए।
पुस १५ मा प्रदर्शन तोकिएको ‘चपली हाइट ३’ दक्षिण भारतीय सिनेमा ‘पुष्पा’भन्दा ठूला ब्यानरको फिल्महरुको चेपुवामा परेको छ। पुस ९ गते कमेडी/रोमान्स विद्याको बलिउड फिल्म ‘अतरंगी रे’ प्रदर्शन हुँदै छ। अक्षम कुमार, सारा अलि खान र धनुस मुख्य भूमिकामा रहेको यो फिल्मले नेपाली दर्शकलाई आकर्षित गर्नेमा कुनै दुई मत छैन। अक्षयका फिल्मलाई दर्शकले दिने चासो पछिल्लो पटक ‘सूर्यवंशी’मा पनि देखिएको थियो भने धनुसका लागि पनि थुप्रै नेपाली दर्शक मरिहत्ते गर्ने देखिएको छ।
‘अतरंगी रे’ मात्रै नभएर चपली हाइट प्रदर्शन हुनेभन्दा ६ दिनअघि पुस ९ गते नै हलिउड फिल्म ‘द मट्रिक्स रेजरेक्सन’ प्रदर्शन हुँदै छ। ‘मेट्रिक्स’ फिल्म शृङ्खला हलिउडमा निकै सफल फिल्म शृङ्खला हो। द मट्रिक्स रेजरेक्सनसँगको भिडन्तमा पनि ‘चपली हाइट ३’का दर्शकहरु बाँडिने देखिन्छ।
‘चपली हाइट ३’ प्रदर्शनमा आएको भोलि पल्टै २०१६ मा प्रदर्शनमा आएको फिल्म ‘गोस्टबस्टर्स’को पछिल्लो सिक्वेल ‘गोस्टबस्टर्सः आफ्टरलाइफ’ प्रदर्शनमा आउँदै छ। शृङ्खलाको पहिलो फिल्मले पनि राम्रो व्यापार गरेको थियो। दोस्रोले पनि व्यापारिक रुपमा सफलता नपाउँला भन्न सकिँदैन।
यीबाहेक १६ गते नै ‘द किंग्स मेन’ पनि प्रदर्शनमा आउँदैछ। सँगै बहुप्रतिक्षित नेपाली फिल्म ‘कठपुतली’को प्रदर्शन पनि सोही दिन छ। आफ्नो फिल्मसँग एउटा हिन्दी डब फिल्म जुँध्ने भयो भन्दै फिल्मको प्रदर्शन मिति नै सारेका अर्जुनलाई आफ्नै निर्णय ‘निल्नु न ओकल्नु’जस्तो भएको होला। एउटा फिल्मसँग बाँडिन दर्शक पाँच वटा फिल्मसँग बाँडिदा हलमा फिल्म हेर्ने दर्शक नै नआउने जोखिम त थप हुन्छ नै।
तर, के भर अर्जुनले यसपटक पनि फिल्मको प्रदर्शन मिति नै सार्लान कि?
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
