काठमाडौं– संगठित ठगीको आरोपमा हिरासतमा रहेका सिभिल ग्रुपका अध्यक्ष इच्छाराज तामाङको काठमाडौं उपत्यकाका विभिन्न ठाउँमा रहेको ९८ रोपनीभन्दा बढी जग्गा रोक्का राख्न माग गरिएको छ।
प्रहरीको केन्द्रीय अनुसन्धान ब्यूरो (सीआईबी)को अनुसन्धानपछि जिल्ला सरकारी वकिल कार्यालय काठमाडौंले जिल्ला अदालत काठमाडौंमा दायर गरेको अभियोग पत्रमा काठमाडौं उपत्यकाका विभिन्न ठाउँमा रहेको इच्छाराजको ९८ रोपनी जग्गा रोक्का राख्न माग गरिएको छ।
अभियोगपत्रमा भनिएको छ, ‘मुलुकी फौजदारी कार्यविधि नियमावली, २०७५ को नियम ९२ बमोजिम प्रतिवादीहरुको नाममा रहेको सम्पत्ति कुनै व्यहोराले हक हस्तान्तरण गर्न नपाउने गरी यथास्थितिमा रोक्का राख्न आदेश गरी पाऊँ।’
अभियोग पत्रमा गरिएको मागअनुसार जिल्ला अदालतले आदेश गरेको अवस्थामा इच्छाराजको सम्पत्ति रोक्काको प्रक्रिया सुरु हुने सीआईबीले जनाएको छ। ‘अहिले नै सम्पत्ति रोक्का भइसकेको छैन। रोक्का गर्नेका लागि मागदाबी भएको हो। सोही बमोजिम अदालतले आदेश गरेको अवस्थामा रोक्को प्रक्रिया अघि बढ्छ,’ सीआईबी स्रोतले भन्यो।
इच्छाराजको आफ्नै तथा उनकी श्रीमती सृजना शाक्य तामाङ र छोरीद्वय प्रतिक्षा र प्रतिष्ठाको नाममा मात्रै कीर्तिपुरका ३२ ठाउँमा जग्गा रहेको खुलेको छ। तीमध्ये २ ठाउँमा घरसहितका जग्गा रहेको सीआईबीको अनुसन्धानबाट खुलेको छ।
आफ्नो परिवारका सदस्यका नाममा कीर्तिपुरमा मात्रै इच्छराजको ६ हजार १६२.८९ बर्गमिटर अर्थात १२ रोपनी ३ पैसा २ दामभन्दा बढी जग्गा रहेको छ।
त्यस्तै, इच्छाराजको कम्पनी सिभिल होम्स प्रालिको नाममा ४४ हजार १५२.९७ बर्गमिटर अर्थात ८६ रोपनी १२ आना २ पैसा २.९१ दाम जग्गा रहेको खुलेको छ। परिवार र संस्थागत गरी काठमाडौं उपत्यकामा मात्रै इच्छाराजको ९८ रोपनी १३ आना २ पैसा १ दाम जग्गा रहेको पाइएको छ।
सिभिल सहकारीमा निक्षेपकर्ताले जम्मा गरेको रकम नतिरेपछि इच्छाराजविरुद्ध पीडितले सीआईबीमा उजुरी दिएका थिए। पीडितको उजुरीका आधारमा सुरुमा सीआईबीले उनीसहित १२ जनालाई पक्राउ गरेर अनुसन्धान थालेको थियो।
अनुसन्धानका क्रममा इच्छाराजले आफ्ना विभिन्न कम्पनीका नाममा बिना धितो ऋण लिएर नतिरेपछि सिभिल सहकारीका निक्षेपकर्ताको रकम फसेको पाइएको थियो। सिभिल सहकारीबाट बिना धितो अर्बौं ऋण लिएर सिभिल होम्समा इच्छाराजले लगानी गरेको र सहकारीको रकम नर्तिदा निक्षेपकर्ताको रकम फसेको प्रहरी अनुसन्धानबाट खुलेको थियो।
हालसम्म १५ सय ३ जनाको मात्रै ५ अर्ब ३७ करोड ५५ लाख २४ हजार ९३७ रुपैयाँ इच्छाराजलगायतको समूहले ठगी गरेको खुलेको थियो।
ठगी भएको रकम बराबरको बिगो माग दाबी गर्दै इच्छाराजसहित ४२ जनालाई प्रतिवादी बनाउँदै जिल्ला सरकारी वकिल कार्यालयले गत शुक्रबार अदालतमा मुद्दा दर्ता गरेको छ। बिगोबापत ५ अर्ब ३७ करोड ५५ लाख २४ हजार ९३७ रुपैयाँ जरिवाना मागदाबी गरिएको छ।
ठगीसँगै ७५ वर्षभन्दा बढी उमेरका व्यक्तिहरुलाई ठगी गरेको पुष्टि हुन आएकाले मुलुकी अपराधसंहिताको दफा २४९ को उदफा (३) को (ग) बमोजिमको सजाय र सङ्गठित ठगी भएको पाइएकाले सङ्गठित अपराध निवारण ऐन, २०७० अनुसार कसुरमा सजाय मागदाबी गर्दै उनीहरुविरुद्ध मुद्दा दायर गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
