काठमाडौं– कैलालीको लम्कीचुहा नगरपालिका–१ का २२ वर्षीय युवक भुपेन्द्र बडुवालको हत्या घटनाको जिम्मा एक जनाले लिएर बाँकीलाई उन्मुक्ति दिने योजना हत्याराको समूहले बनाएको खुलेको छ। गत कात्तिक २७ गते कैलालीमा खुकुरी प्रहारबाट मारिएका बडुवालको हत्याको जिम्मा एक व्यक्तिले लिएर बाँकी २० जनालाई उन्मुक्ति दिने योजना समूहले बनाएको प्रहरी अनुसन्धानबाट पुष्टि भएको हो।
जिल्ला प्रहरी कार्यालय कैलालीका प्रहरी उपरीक्षक (एसपी) विश्व अधिकारीका अनुसार खुकुरी प्रहारबाट बडुवालको मृत्यु भएपछि एक जनाले मात्रै हत्याको जिम्मा लिने र बाँकी फरार भइ हत्या जिम्मा लिनेलाई केही आर्थिक सहयोग दिने योजना बनाइएको पत्ता लागेको हो।
सोमबार पत्रकार सम्मेलनमा जानकारी दिँदै एसपी अधिकारीले भने, ‘२१ जनाको समूह मिलेर बडुवालको हत्या भएको अनुसन्धानबाट खुलेको छ। तर, हत्या गर्ने समूहले भने १ जनाले मात्रै जिम्मा लिएर बाँकीलाई सफाइ दिने योजना बनाएको खुल्यो।’
बडुवालको हत्यापछि उक्त समूहले विष्ट आयल स्टोर नजिक पुगेर भाग्ने योजना बनाएको थियो। सोही अनुसार हत्यामा प्रयोग गरिएको खुकुरीसमेत फालिएको थियो। त्यसपछि अभियुक्त रोहित आले आफ्नो घरतर्फ लागेका थिए।
त्यसपछि नवीन रावल, हेमन्त शाही, हिमाल शाही, रोशन शाही, चिरञ्जीवी शाही र आर्यन देवकोटा पशु हाट बजारको बाटो हुँदै जोशीपुर पुगी एक जनाले अपराध स्वीकार्ने र अरु भागी फरार रहने योजना बनाएको अनुसन्धानबाट खुलेको प्रहरीले जनाएको छ।
हत्याको भोलिपल्ट कात्तिक २४ गते बिहान बौनिया बजारमा पुगी अपराध आफूले मात्रै गरेको हो भन्ने पार्न आर्यन देवकोटा बौनिया बजारमै बसेका थिए।
नवीन रावल, हेमन्त शाही, हिमाल शाही, रोशन शाही, र चिरञ्जीवी शाही भने लोकजंग शाहीले बनाएको योजना अनुसार हत्यामा संलग्न प्रतिवादीहरु नजिकै रहेको विष्ट आयल स्टोर नजिक पुगी भाग्ने योजना अनुसार खुकुरी सोही स्थानमा फालेको र रोहित आलेलाई आफ्नो घर तर्फ जान भनी पठाएको पाइएको प्रहरीले जनाएको छ।
२४ गते बिहान बौनिया बजारमा पुगी अपराध आफूले मात्रै गरेको हो भन्ने पार्न आर्यन देवकोटा बौनिया बजारमै बसेको र अन्यलाई लोकेन्द्र कुँवरले बौनिया बजार भन्दा उत्तर तर्फको चायाँभावर गाउँमा लगेर एक स्थानीयको घरमा राखेका थिए।
लोकजंग कै योजना अनुसार उनीहरुलाई भगाउन कात्तिक २५ गते सविन जंग शाहीले कार भाडामा लिइ कैलालीको जुगेडा हुँदै भारतको ढकिया गाउँसम्म पुर्याएको एसपी अधिकारीले बताए।
हत्यामा प्रयोग भएको खुकुरी
कालिमाटी खुकुरी प्रहारको बदलामा बडुवालको हत्या!
प्रहरीका अनुसार बडुवालको हत्यामा दुई समूहबीचको झगडा कारण भएको पाइएको छ। कैलालीको लम्की, चिसापानी क्षेत्रमा नदीजन्य पदार्थ र वनजन्य पैदावरको ठेक्का पट्टामा आफ्नो वर्चश्व जमाउन लोकजंग शाहीले विगत ३/४ वर्षदेखि युवाहरुको समूह बनाएर आपराधिक गतिविधि गर्दै आएको पाइएको छ।
यो समूहलाई अशोक रावल समेतले संरक्षण गरेको एसपी अधिकारीले बताए। सुरुमा जयन्द्र शाह र नवीन रावल एउटै समूहमा रहेर गुण्डागर्दी गर्दै आएका थिए। उनीहरुबीच पछि विवाद भएपछि समूह छुट्टिएको थियो। एउटा समूहको नेतृत्वको नवीनले गरेका थिए भने अर्को समूहको जयन्द्रले।
त्यसपछि दुई समूहबीच झै–झगडा र आक्रमण सुरु हुन थालेको प्रहरीको भनाइ छ। यो समूहका सदस्यहरुविरुद्ध कैलालीमा मात्रै ६ वटा ज्यान मार्ने उद्योग र २ वटा हातहतियार तथा खरखजनाको मुद्दा चलेको थियो।
बडुवालको हत्याको कारण भने गत भदौ १८ मा काठमाडौं कालिमाटीमा भएको खुकुरी प्रहारको बदला लिने क्रममा भएको अनुसन्धानबाट खुलेको छ। कालिमाटी तरकारी बजार पछाडिको क्लब गल्लीमा जयन्द्र शाहको समूहले नवीन रावल समूहको हिमाल भनिने हेमराज शाहीलाई आक्रमण गरेको थियो।
शाहीमाथि खुकुरी आक्रमणको घटनापछि त्यसको बदला लिन जयन्द्र समूहका कपिल श्रेष्ठले नवीन रावलको समूहमाथि आक्रमण गर्ने योजना बनाएर कात्तिकको १७ गते काठमाडौंबाट मोटरसाइकलमा कैलाली गएका थिए। कपिलको समूह २० गते लम्की पुगेर होटलमा एक रात बसेको देखिएको प्रहरीले जनाएको छ। २१ र २२ गते अर्को एक होटलमा कोठा लिएर नवीनलाई आक्रमण गर्ने योजना उनीहरुले बनाएका थिए।
२३ गते नवीन रावलको समूह लम्कीमा भएको फुटबल खेल हेर्न आउने सूचना पाएपछि कपिल श्रेष्ठले आफ्नो समूहलाई खबर गरेर आक्रमणको योजना बनाएका थिए।
‘कपिलको समूह टिकापुरमा भएकाले तत्कालै लम्की पुग्न नसकेकाले त्यो योजना सफल भएन’ एसपी अधिकारीले भने, ‘पछि कपिलको समूहले खेल हेरेर डुढेझारी हुँदै टिकापुरतर्फ जान लागेको नवीनको समूहलाई आक्रमण गर्न हातहतियारसहित ढुकेर बसेको देखिन्छ।’
अभियुक्तहरुले प्रयोग गरेको मोटरसाइकल
त्यसपछि नवीन रावल समूहको मदन शाहीलाई डुढेझारीको बाटो टीकापुर जाँदै गर्दा कपिलको समूहले भेटेर आक्रमण गर्न लखेट्दै गर्दा प्रहरी पुगेको थियो। त्यसपछि कपिलको समूह तितरवितर भएको थियो। कपिल भने एक्लै परेका थिए। मदन शाहीले कपिलको समूहको बाटो परिवर्तन गरेको भन्ने बुझेर नवीन रावललाई खबर गरी जयन्द्रको समूह हातहतियारसहित आक्रमणमा आएको भन्दै खबर गरेका थिए।
एसपी अधिकारी भन्छन्, ‘नवीनले आफ्नो समूहका आर्यन, हिमाल, हेमन्त, मदन, चिरन्जीवी, रोशन, निशान, रोहित, धिरज, सोहन, विकासलाई रोड साइड क्याफे भन्ने ठाउँमा जम्मा हुन लगाएर जयन्द्रको समूह जहाँ भेटिए पनि आक्रमण योजना बनाएको देखिन्छ।’
नयाँ टिकापुर क्षेत्रमा एक्लै रहेका कपिल श्रेष्ठले पहिल्यै चिनजान भएका लम्कीमा रहेका भुपेन्द्र बडुवाललाई (हाल मृतक) फोन गरेर ‘मलाई तुरुन्त मोटरसाइकलमा लिन आउनु’ भनेर बोलाएका थिए।
त्यसपछि भुपेन्द्र कपिललाई लिन टिकापुर गए। यता नवीनको समूह जयन्द्रको समूहका व्यक्तिलाई आक्रमण गर्न खोजीमा हिँडिरहेको थियो। भुपेन्द्रलाई मोटरसाइकलमा आउँदै गरेको देखेपछि जयन्द्रको समूहका व्यक्ति भन्दै नवीनको समूहले उनलाई लखेट्दै सिद्धार्थ होटल नजिक पुर्याएर नियन्त्रण लिन सफल भएका थिए।
राति ८ बजेर ५२ मिनेटमा बडुवालमाथि आक्रमण भएको सीसी टीभी फुटेजमा देखिएको एसपी अधिकारी बताउँछन्। बडुवालको पेट, छाती, टाउकोमा खुकुरी र चक्कु प्रहार गरी उक्त समूह फरार भएको थियो। त्यसको ६ मिनेटमै प्रहरी घटनास्थलमा पुगेको थियो। गम्भीर घाइते बडुवाललाई टीकापुर अस्पताल पठाइएको थियो। तर, राति साढे ९ बजे डाक्टरले उनलाई मृत घोषणा गरे।
१२ पक्राउ, ९ अझै फरार
बडुवाल हत्याको आरोपमा हालसम्म प्रहरीले १२ जनालाई पक्राउ गरेको जनाएको छ। पक्राउ पर्नेहरूमा लम्कीचुहा नगरपालिका–३ बस्ने २० वर्षीय आर्यन देवकोटा, २४ वर्षीय महेश रावल, २० वर्षीय धिरज दिपेन्द्र शाही, लम्कीचुहा नगरपालिका–१ बस्ने २२ वर्षीय कपिल श्रेष्ठ र १८ वर्षीय दीपक भनिने निशान मल्ल, लम्कीचुहा नगरपालिका–३ का १९ वर्षीय मदन शाही, लम्कीचुहा नगरपालिका–५ का २८ वर्षीय विकास खड्का रहेका छन्।
यस्तै, टिकापुर नगरपालिका–१ बस्ने २३ वर्षीय प्रविन रिमाल, २१ वर्षीय रोहित आले र २६ वर्षीय सोहन शाह, बर्दगोरिया गाउँपालिका–२ का २५ वर्षीय लोकेन्द्र कुँवर, बर्दियाकै ठाकुरबाबा नगरपालिका–३ का सन्तोष भनिने सविनजगज शाहीसहित १२ जना पक्राउ परेका छन्। उनीहरुलाई सुर्खेत, अछाम, बर्दिया, काठमाडौं, नेपालगञ्जबाट पक्राउ गरिएको हो।
लम्कीुचहा–३ का २७ वर्षीय नवीन रावल, २६ वर्षीय अनोज भनिने चिरन्जीवी विक्रम शाही, २६ वर्षीय हिमाल शाही, जानकी गाउँपालिका–६ का २८ वर्षीय जयन्द्र शाह, टीकापुर १ का २७ वर्षीय विकास शेरचन, लम्कीचुहा–४ का २४ वर्षीय रोशनबहादुर शाही, टीकापुर–६ का ३५ वर्षीय अशोक रावल, लम्कीचुहा– ३ का ३८ को लोकजंग शाही, बर्दियाको गरुवा गाउँपालिका–५का २२ वर्षीय हेमन्त शाही गरी ९ जना भने हालसम्म फरार रहेको प्रहरीले जनाएको छ। उनीहरु भारत पुगेको हुनसक्ने प्रहरीले आशंका गरेको छ।
उनीहरुले आफ्नो समूहको दबदबा देखाउन सामाजिक सञ्जालमा भरुवा बन्दुक र अन्य हतियार समेतका फोटाहरु राख्ने गरेको समेत खुलेको छ। लोकजंग र नवीनले आफ्नो समूहका युवाहरुलाई प्रशिक्षण दिने गरेको भिडियोसमेत पाइएको एसपीको अधिकारीले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
