काठमाडौं– पूर्ण खोप लगाएका पर्यटकलाई क्वारेन्टाइन बस्नु नपर्ने व्यवस्था गरेसँगै नेपालमा विदेशी पर्यटकको संख्या बढ्न थालेको छ। विदेशीलाई नेपाल खुला गरेपछि अक्टोबरमा २३ हजार २ सय ८४ जना विदेशी पर्यटक नेपाल भित्रिएकोमा नोभेम्बरमा यो संख्या २६ हजार १ सय ३५ पुगेको छ।
नोभेम्बरमा नेपाल भित्रिएका पर्यटकमध्ये सबैभन्दा बढी भारतीय छन्। नोभेम्बर महिनामा भारतबाट मात्रै १० हजार ४ सय २१ जना भित्रिएको तथ्यांक छ। भारतीय पछि सबैभन्दा बढी पर्यटक अमेरिकाबाट भित्रिएका छन्। नेपाल पर्यटन बोर्डका अनुसार नोभेम्बरमा अमेरिकाबाट मात्रै ३ हजार ७ सय ८२ जना नेपाल भित्रिएका छन्।
नोभेम्बरमा सबैभन्दा बढी पर्यटक भित्रिने तेस्रो ठूलो देशमा बेलायत रहेको छ। बेलायतबाट नोभेम्बरमा २ हजार २६ जना पर्यटक नेपाल भित्रिएका छन्। नोभेम्बरमा युरोपबाट ५ हजार ७ सय १८ जना पर्यटक नेपाल भित्रिएका छन्। युरोपेली मुलुकमध्ये सबैभन्दा बढी स्वीडेनबाट २ हजार २६ जना पर्यटक नेपाल भित्रिएको बोर्डको तथ्यांक छ।
सन् २०२१ को जनवरीमा ८ हजार ८ सय ७४, फेब्रुअरीमा ९ हजार १ सय ४६, मार्चमा १४ हजार ९ सय ७७, अप्रिलमा २२ हजार ४ सय ५०, मेमा १ हजार ४ सय ६८, जुनमा ११ सय ४३, जुलाईमा २९ सय ९१, अगस्टमा ५ हजार ९ सय १७, सेप्टेम्बरमा ९ हजार ९ सय ९८, अक्टोबरमा २३ हजार २ सय ८४ र नोभेम्बरमा २६ हजार १ सय ३५ जना गरी २०२१ भरी कुल १ लाख २६ हजार २ सय ८३ जना पर्यटक नेपाल भित्रिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
