काठमाडौं– थरुन रत्नायकेको अर्धशतकमा सुदूरपश्चिम रोयल्सले चितवनमाथि तीन विकेटको रोमाञ्चक जित निकालेको छ । १९ दशमलव ५ ओभरमा जित निकाल्दै सुदूरपश्चिम एनपीएल सिजन ३ को फाइनलमा पुगेको छ र गत सिजनको च्याम्पियनसँग फेरि उपाधि भिडन्त पक्का गरेको हो । चितवनले दिएको १३४ रनको लक्ष्य अन्तिम बल बाँकी छँदा सुदूरले ७ विकेटको क्षतिमा पूरा गर्यो ।
सुदूरपश्चिमको जितमा रत्नायकेले अविजित ५३ रनको अर्धशतकीय पारी खेले । विनोद भण्डारीले २३, दीपेन्द्र सिंह ऐरीले १५, डा इशान पाण्डेले १० र आरिफ शेखले पनि १० रन बनाए ।
चितवनका लागि बलिङमा रन्जित कुमारले २ विकेट लिँदा कमल सिंह ऐरीले २, सलाउद्दिन खान, उम्मा मिर र रिजन ढकालले एक/एक विकेट हात पारे ।
त्यसअघि टस जितेर पहिला ब्याटिङ गरेको चितवनले निर्धारित २० ओभरमा ८ विकेट गुमाउँदै १३३ रन बनाएको थियो ।
चितवनका लागि मलानले सर्वाधिक ७१ रनको अविजित पारी खेले । उनले ५१ बलमा ९ चौका र २ छक्का हिर्काए । सलाउद्दिन खानले १८ रन बनाउँदा कमलसिंह ऐरीले १० रन बनाए । अन्य कुनै पनि ब्याटरले दोहोरो अंकमा रन बटुल्न सकेनन् ।
यता सुदूरपश्चिमका लागि स्कट कुग्लेइनले सर्वाधिक ३ विकेट लिँदा थरिन्दु रत्नायकेले २, हेमन्त धामी, दीपेन्द्रसिंह ऐरी र डा इशान पाण्डेले एक/एक विकेट लिए ।
आजको खेलमा विजेता हुने टोली सिधै फाइनलमा पुग्नेछ । पहिलो क्वालिफायरमा सुदूरपश्चिम लुम्बिनी लायन्ससँग पराजित भएको थियो भने चितवनले इलिमिनेटरमा काठमान्डू गोर्खाजलाई हराउँदै दोस्रो क्वालिफायरमा पुगेको थियो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।