महाधिवेशन विशेष

एमाले महाधिवेशन : अध्यक्ष, उपाध्यक्ष र सचिवमा भोट गर्न विद्युतीय मेसिन तयार [तस्बिरहरु]

निमेष जंग राई सोमबार, मंसिर १३, २०७८ १३:२५

चितवन- नेकपा एमालेको जारी १० औं महाधिवेशनमा पदाधिकारीको १४ पदका लागि तय निर्वाचन विद्युतीय मेसिनबाट गर्ने तयारी गरिएको छ। त्यसका लागि मेसिनहरु तयारी अवस्थामा व्यवस्थापन गरिएको छ।

भोट खसाल्नका लागि मेसिनहरुको बुथ राखिएको छ। केही मेसिन बाहिर प्रतिनिधिहरुलाई भोट खसाल्न सिकाउनका लागि राखिएको छ।

चितवनस्थित सौराहामा जारी बन्दसत्र अन्तर्गत सोमबार उम्मेदवारी दर्ताको समय सकिएसँगै अब निर्वाचनको कार्यक्रम अघि बढेको हो।

एमाले बन्दसत्रमा विद्युतीय मतदानको व्यवस्था मिलाउने जिम्मा नेपालमै भोटिङ मेसिन बनाएका राम लक्ष्मण इनोभेसन्सले पाएको छ।

निर्वाचनका लागि प्राविधिक टोलीसँग १ सय वटा मेसिन रहेको विद्युतीय मेसिनका प्राविधिक सल्लाहकार डा. नन्दविक्रम अधिकारीले नेपाल लाइभलाई जानकारी दिए।

'त्यो सबै प्रयोग हुन पनि सक्छ, कम पनि प्रयोग हुन सक्छ। त्यसको निर्धारण कति पदमा निर्वाचन हुन्छ भन्नेमा निर्धारण हुने उनी बताउँछन्।

उम्मेदवारको अन्तिम नामावली प्रकाशित भएपछि उनीहरुको नाम यसमा राखिने छ र प्रतिनिधिहरुले 'टच स्कृन'का आधारमा मतदान गर्ने छन्। कुनै व्यक्तिले अन्तिममा मतदान सकियो भन्ने बटनमा नछोएसम्म मत सच्याउन सक्ने छन्। स्क्रिनमा सबै उम्मेद्वारको फोटो र नाम हुने र त्यसमा थिचेपछि मतदान हुने छ।

एमालेमा अध्यक्ष, उपाध्यक्ष र सचिवमा १८ जनाको उम्मेदवारी परेको छ। अध्यक्षमा केपी शर्मा ओली र भीम रावलले उम्मेदवारी दर्ता गराएका छन्।

ओलीको सूचीमा नपरेका निवर्तमान उपमहासचिव घनश्याम भुसालले उपाध्यक्षमा उम्मेदवारी दर्ता गराएसँगै उपाध्यक्षमा पनि निर्वाचन हुने भएको हो। एमालेमा ६ जना उपाध्यक्षको व्यवस्था छ।

उपाध्यक्षहरूमा युवराज ज्ञवाली, अष्टलक्ष्मी शाक्य, सुरेन्द्र पाण्डे, रामबहादुर थापा बादल, विष्णु पौडेल र सुवासचन्द्र नेम्वाङको नाम आइतबार राति घोषणा गरेका थिए। त्यस्तै सचिवमा पनि चुनाव हुने भएको छ।

एमालेमा सात जना सचिव छन्। ओलीले यसअघि टोपबहादुर रायमाझी, छविलाल विश्वकर्मा, रघुवीर महासेठ, लेखराज भट्ट, योगेश भट्टराई, गोकर्ण विष्ट र पद्मा अर्याललाई सचिव बनाएका थिए। तर, ओलीको सूचीमा नअटाएका भीम आचार्य र टंक कार्कीले उम्मेदवारी दिएपछि सचिवमा पनि चुनाव हुने भएको छ।

एमालेमा पदाधिकारीका १४ पदका लागि १८ जना चुनावी प्रतिस्पर्धामा उत्रिएका छन्।

एमाले महाधिवेशनमा कुल प्रतिनिधिको संख्या २ हजार १७५ रहेको छ। निर्वाचन आयोगले उम्मेदवारहरुलाई निर्वाचन आचारसंहितामा पालना गर्न अनुरोध गरेको छ। मतदाताले प्रचारप्रसार गर्दा निर्वाचन सामाग्री ठूलो प्रदर्शन गर्न पाइने छैन भने समूहगत छलफल पनि गर्न पाइने छैन। आचारसंहिता विपरीत काम भएमा आयोगले उम्मेदवारी वदर गर्नसक्ने जनाएको छ।