काठमाडौं- काठमाडौंको हाँडीगाउँमा होम स्टे (घरबास) पर्यटन प्रवर्द्धनसम्बन्धी तालिम सुरु भएको छ। संस्कृति, पर्यटन तथा नागरिक उड्डयन मन्त्रालयअन्तर्गतको तारा गाउँ विकास समितिले तालिम आयोजना गरेको हो।
तालिमको उद्घाटन गर्दै काठमाडौं महानगरपालिकाकी उपप्रमुख हरिप्रभा खड्गीले घरबास पर्यटनसँग पूर्वाधार, आर्थिक, सामाजिक र साँस्कृतिक विकासका पक्ष जोडिने भएकाले यसको प्रवर्द्धनका लागि काठमाडौं महानगरको सहयोग रहने बताइन्। घरबास पर्यटनले महिलाहरुको आर्थिक विकास र आत्मसम्मान बढाउन सघाउने उनको भनाइ थियो।
काठमाडौंको मौलिक खाना, काठमाडौंवासीको सत्कार र घुम्नका लागि सम्पदा क्षेत्र पर्यटकका लागि आकर्षण हुने उनले बताइन्। 'महानगरको वडा नम्बर ५ बाट थालिएको कार्यक्रम र यसको सिकाइ भित्री सहरी क्षेत्रमा विस्तार गर्न सकिन्छ,' उनले भनिन्, ‘हामीले काठमाडौंको सर्वाङ्गीण विकास गर्नुछ। यसभित्र महिलाहरुलाई लिने हैसियतबाट दिने हैसियतमा पुर्याउनुपर्नेछ। यसका लागि घरबास पर्यटन एउटा सम्भावना बोकेको कार्यक्रम हो।’
चार दिनसम्म सञ्चालन हुन् तालिममा दुई दिन सैद्धान्तिक र दुई दिन प्रयोगात्मक कक्षाहरु सञ्चालन हुने तालिम संयोजक घनश्याम ढकालले जानकारी दिए। उनका अनुसार सहभागीलाई पर्यटन र यसका पक्ष, होम स्टे प्रवर्द्धन र बजारीकरण, पर्यटन प्रवर्द्धनका साधन र उपयोग, नेपालको सन्दर्भमा होम स्टे, होम स्टेसम्बन्धी कानुनी प्रबन्ध, पर्यटकीय पूर्वाधार र सेवा लगायतका विषयमा सैद्धान्तिक ज्ञान दिइनेछ। त्यसैगरी सफल होम स्टेका व्यावसायिक सफलताका कथा, होम स्टे सञ्चालन र व्यवस्थापन, पाहुनाको स्वागत र बिदाइ सत्कार, स्थानीय पर्यटकीय स्थल र सम्पदासँग होम स्टेको सम्बन्धलगायत विषयलाई पनि सैद्धान्तिक ज्ञानको विषयमा राखिएको उनले बताए।
हाँडीगाउँमा अहिले पहिचान गरिएका ११ घरसहित ३० जनालाई पर्यटनसम्बन्धी आधारभूत तालिममा सहभागी गराइएको जानकारी दिइएको छ।
हाँडीगाउँ सामुदायिक घरबास समितिकी अध्यक्ष शकुन्तता घिमिरेले यहाँ ११ वटा होम स्टे रहेको जानकारी दिइन्। एउटा घरमा चार वटासम्म कोठा प्रयोग गर्न सकिने उनले बताइन्। 'एक दिनमा हाँडीगाउँ होमस्टेले करिब १५० जना पाहुनालाई व्यवस्थापन गर्नसक्ने क्षमता राख्छ,' उनले भनिन्।
२०७५ सालबाट सुरु भएको यहाँको होम स्टे कोभिड-१९ का कारण सुस्ताएको थियो। कोभिड-१९ को असर कम भएसँगै यसलाई उठाउने प्रयास थालिएको समितिकी अध्यक्ष घिमिरेले बताइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
