कीर्तिपुरमा धान भित्र्याउने चटारो [तस्बिरहरू]

अर्थ समाचार

अनुराग लम्साल शनिबार, कात्तिक १३, २०७८ १२:२४

सबै तस्बिर : अनुराग लम्साल।

काठमाडौं– नेपाली समाजमा एउटा भनाइ प्रचलित छ– असारमा मानो रोप्ने, मंसिरमा मुरी भित्र्याउने। अर्थात् जेठ–असारमा नेपालको धानबाली हुने बहुक्षेत्रमा धान रोपिन्छ। अनि, असोजदेखि मंसिरसम्म भित्र्याइन्छ।

तर, यसपटकको बेमौसमी वर्षाले किसानलाई मुरी भित्र्याउन दिएन। कृषि तथा पशुपन्छी विकास मन्त्रालयका अनुसार बेमौसमी वर्षाले यसवर्ष ८ अर्ब भन्दा बढीको धानबाली नष्ट भएको छ।

कतिले काट्न नपाउँदै धान बाढीले हुरीले क्षति गर्‍यो भने कतिले काटेर बारीमै छोडेको धान भित्र्याउन पाएनन्। मन्त्रालयका अनुसार सबैभन्दा धेरै लुम्बिनी प्रदेशमा ४ अर्ब ५९ करोड रुपैयाँ बराबरको १ लाख ६१ हजार २ सय २३ टन धान क्षति भएको छ ।

सुदूरपश्चिम प्रदेशमा–१ अर्ब ९१ करोड रुपैयाँ बराबरको ६८ हजार ४ सय मेट्रिक टन, प्रदेश १ मा ८० करोड रुपैयाँ बराबरको २८ हजार ४ सय ६९, प्रदेश–२ मा ५६ करोड रुपैयाँ बराबरको २० हजार ३ सय ५०, गण्डकी प्रदेशमा १३ करोड रुपैयाँ बराबरको ४ हजार ५ सय ३० र कर्णाली प्रदेशमा १३ करोड रुपैयाँ बराबरको ४० हजार २ सय १९ मेट्रिक टन धानमा क्षति पुगेको छ।

यता, काठमाडौंको कीर्तिपुर क्षेत्रका किसानले भने धान भित्र्याउन थालेका छन्। तिहारअघि नै धान भित्र्याउने तयारीसाथ उनीहरु काममा जुटिरहेका छन्।