काठमाडौं- भारतको उत्तर प्रदेश प्रहरीले ‘ईद अल–मौलीद अन–नबी’मा पाकिस्तान समर्थित नारा लगाउने तीनजनाविरुद्ध देशद्रोहको मुद्दा दायर गरेको छ।
प्रहरीले २० अक्टोबरमा मोहम्मद जफर, समीर अली र अली रजालाई सामाजिक सञ्जालमा आएको भिडियोको आधारमा पक्राउ गरेको थियो। जसमा उनीहरूले र्यालीमा पाकिस्तान समर्थित नारा लगाएको देखिएको थियो।
बिहीबार धेरै दक्षिणपन्थी कार्यकर्ताहरूले नोएडाको सेक्टर २० प्रहरी स्टेशन बाहिर धर्ना दिएका थिए। उनीहरुले पक्राउ परेका ती व्यक्तिहरूविरुद्ध देशद्रोहको मुद्दा लगाउन माग गरेका थिए।
एक वरिष्ठ प्रहरी अधिकारीले समाचार एजेन्सी पीटीआईलाई भने, ‘भारतीय दण्ड संहिताको धारा १५३ ए पहिले आरोपीमाथि लगाइएको थियो। र, बिहीबार धारा १२४ ए (देशद्रोह) लगाइएको थियो।’
अहिले तीनै अभियुक्त न्यायिक हिरासतमा रहेको उनले जानकारी दिएका छन्।
उत्तर प्रदेशका मुख्यमन्त्री योगी आदित्यनाथले पनि बिहीबार यूपीमा पाकिस्तान समर्थित नारा लगाउनेहरूविरुद्ध देशद्रोहको मुद्दा चलाइने चेतावनी दिएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
