काठमाडौं- नेपाल बार एसोसिएनसनका सल्लाहकारले वर्तमान प्रधानन्यायाधीश चोलेन्द्र शमशेर राणाले अविलम्ब राजीनामा दिनुपर्ने निष्कर्ष निकालेको छ। सल्लाहकार समितिको मंगलबार बसेको बैठकमा सहभागी सल्लाहकारहरुले यस्तो निष्कर्ष निकालेका हुन्।
वरिष्ठ अधिवक्ता शम्भु थापाले प्रधानन्यायाधीश राणा सर्वोच्चबाट नहटेसम्म बार (कानुन व्यवसायी)ले इजलासमा बहस गर्न नहुने बताएका छन्। नेपाल बार एसोसिएनसनका पूर्वअध्यक्ष समेत रहेका थापाले मंगलबार बसेको बार सल्लाहकार समितिको बैठकमा प्रधानन्यायाधीश राणाले राजीनामा नदिएसम्म कानुन व्यवसायीले बहस गर्न नहुने सुझाव दिएका हुन्। न्याय क्षेत्रमा गम्भीर विचलन देखिएको र यस्तो अवस्थामा बारले हेरेर मात्रै बस्न नहुने थापाको भनाइ छ।
‘न्याय क्षेत्रमा गम्भीर विचलन देखिएको छ। प्रधानन्यायाधीश राणा विवादमा आइसकेका छन्। आफैंले निकास दिने भनेको राजीनामा दिने हो,’ उनले भने, ‘अब प्रधानन्यायाधीश चोलेन्द्र शमशेर राणा पदमा रहेसम्म नेपाल बारले वकालत नै ठप्प पार्नेछ।’
बारका सल्लाहकारको बैठकपछि त्यही निर्णय हुने थापाले जानकारी दिए।
बारका पूर्वमहासचिव वरिष्ठ अधिवक्ता रमन श्रेष्ठले प्रधानन्यायाधीशले राजीनामा दिनुपर्छ भन्ने नै सबैको निष्कर्ष रहेको बताए। ‘राजीनामा दिनका लागि अल्टिमेटम दिनुपर्छ, नदिएमा आन्दोलनको कार्यक्रम बुझाउने भन्ने कुरा भएको छ,’ उनले भने, ‘देशभर कहिले गर्ने र सर्वोच्चमा कहिले गर्ने भन्ने विषयमा बारले दुई/तीन दिनमै आन्दोलनको कार्यक्रम सार्वजनिक गर्ला।’
पूर्वउपाध्यक्ष अधिवक्ता टीकाराम भट्टराईले बैठकमा सहभागी ९९ प्रतिशत सल्लाहकारले वर्तमान प्रधानन्यायाधीशले न्यायीक नेतृत्व दिन असफल भएको निष्कर्ष निकालेको जानकारी दिए। ‘उहाँ न्यायीक नेतृत्व दिन असफल हुनुभयो। उहाँको पालामा विकृति, विसंगति धेरै बढ्यो। आफ्नै सहकर्मीको पनि विश्वास जित्न सक्नुभएन,’ उनले भने, ‘त्यसैले अविलम्ब उहाँले राजीनामा गर्नुपर्छ।’
प्रधानन्यायाधीशले राजीनामा गर्न तयार नभएमा राजीनामा गराउन बाध्य पार्नका लागि आन्दोलनका कार्यक्रम नेपाल बारले ल्याउनुपर्ने आफूहरुको सुझाव रहेको उनको भनाइ छ।
सल्लाहकार समितिको बैठकमा वरिष्ठ अधिवक्ताहरू हरिहर दाहाल, बद्रीबहादुर कार्की, कृष्ण सापकोटा, सतिश खरेल, तुलसी भट्ट, मुक्ति प्रधान, विजयकान्त मैनाली, रमन श्रेष्ठ, कृष्ण भण्डारी, शम्भु थापा, अधिवक्ता टीकाराम भट्टराई लगायतले बैठकमा प्रधानन्यायाधीशले अहिलेको समस्या समाधानका लागि राजीनामा दिनुपर्ने धारणा राखेका हुन्।
सल्लाहकार समितिको बैठक सकिएपछि अहिले नेपाल बार एसोसिएनसनको पदाधिकारीको बैठक बसिरहेको छ। बैठकले सल्लाहकारहरुको समेत सुझावलाई ध्यानमा राखेर आवश्यक निर्णय लिने बताइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790064844.png)
-1786602170.png)
-1789631269.jpg)
