काठमाडौं– नेपाली कांग्रेसको संस्थापन पक्षले अधिवेशन सकिएका १३ जिल्लाबाट आफ्नो पक्षमा बहुमत प्रतिनिधि छानिएको दाबी गरेको छ। जिल्ला सभापति र महानगरको नेतृत्व आफ्नो पक्षमा बहुमत नआएपनि प्रतिनिधि आफ्नो समूहबाट बहुसंख्यक हुने संस्थापन पक्षले दाबी गरेको छ।
हालसम्म अधिवेशन सकिएका १३ जिल्लामा आफ्नो पक्षका प्रतिनिधि बहुमत चयन भएको सभापति शेरबहादुर देउवा समूहको दाबी छ। मनाङ, मुस्ताङ, गोरखा, ताप्लेजुङ, मुगु, संखुवासभा, रामेछाप, दोलखा, कालीकोट, हुम्ला, रुकुमपूर्व, बाजुरा र बझाङ जिल्लाको अधिवेशन सकिएको छ। अधिवेशन सकिएका १३ जिल्ला मध्ये गोरखामा मात्रै दुई प्रतिनिधि सभा क्षेत्र छन्।
दसैंअघि २१ हिमाली जिल्लाको अधिवेशन सक्ने पूर्व निर्धारित कार्यतालिका भने कार्यान्वयन हुन सकेको छैन। २१ हिमाली जिल्लाध्ये अधिवेशन हुन नसकेका आठ जिल्लामा सोलुखुम्बु, सिन्धुपाल्चोक, रसुवा, डोल्पा, जुम्ला, दार्चुला, धादिङ र म्याग्दी छन्। सिन्धुपाल्चोकमा तीन वडाको अधिवेशन नै रोकिएको छ। रसुवामा क्रियाशील सदस्यताको विवाद साम्य हुन नसक्दा अधिवेशन प्रक्रिया सुरु हुन सकेको छैन।
निर्वाचन समितिका अनुसार हालसम्म ३६२ जना महाधिवेशन प्रतिनिधि छनोट भएका छन्। छनोट भएका महाधिवेशन प्रतिनिधिमा आफ्नो पक्षका दुई सय बढी रहेको देउवा पक्षको दाबी छ। पौडेल निकटका १२१ छनोट भएको बताइएको छ। हालसम्म छानिएका प्रतिनिधिमा २५ जना भने कुनै पनि पक्षमा खुलेका छैनन्। सिटौला समूहका करिब दुई दर्जन प्रतिनिधि छनोट भएका छन्। देउवा निकट एक नेताले भने, ‘महाधिवेशन सकिएका जिल्लाबाट हाम्रो पक्षमा बहुमत छ। अरु समूहका प्रतिनिधि हाम्रो तुलनामा धेरै कम छन्।’
पौडेल पक्षले आफ्नो भनि दाबी गरेका निर्वाचित दुई जिल्ला सभापतिलाई देउवा खेमाले आफ्नो निकट रहेको दाबी गरेको छ। देउवा निकट एक नेताले रुकुम पूर्वका केशरमान रोका र गोरखाका नन्दप्रसाद न्यौपाने संस्थापन निकट रहेको दाबी गरे। उनले भने, ‘रुकुम पूर्व र गोरखाका जिल्ला सभापतिले हाम्रो सहयोगमा विजयी भएका हुन्। अर्को पक्षका जिल्ला सभापति भन्न मिल्दैन।’
जिल्ला सभापतिमा पौडेल पक्ष बहुमतमा देखिएको छ। पौडेल पक्षबाट समूहबाट संखुवासभामा दीपक खड्का, कालीकोटमा अम्मबहादुर शाही, दोलखामा बर्मा लामा, मुस्ताङमा रोमी गौचन, रुकुम पूर्वमा केशरमान रोका र बाजुरामा रामसिंह रावल चुनिएका छन्। गोरखामा निर्वाचित सभापति नन्दप्रसाद न्यौपाने नेता गगन थापा निकट हुन्।
देउवा निकटका ताप्लेजुङमा गजेन्द्रप्रसाद तुम्याहाङ, हुम्लामा मोहनविक्रम सिंह, रामेछापमा पूर्णबहादुर तामाङ (कान्छाराम), मुगुमा ऐनबहादुर शाही, बझाङमा खडक बोहरा र मनाङमा शंकर गुरुङ जिल्ला सभापति निर्वाचित भएका छन्।
हालसम्म ५५० स्थानीय तहमा नेतृत्व चयन गरिएको छ। क्रियाशील सदस्यता विवादले २०३ स्थानीय तहको अधिवेशन हुन सकेको छैन। रौतहट, बारा र रसुवाको क्रियाशील सदस्यता अहिलेसम्म पनि सार्वजनिक गरिएको छैन। प्रदेश २ का ८ जिल्लासहित बाँके सुर्खेत,रसुवा,डोल्पा र कैलालीको वडा अधिवेशन हुन सकेको छैन। ती जिल्लाको वडा अधिवेशन दशैंपछि मात्रै सुरु हुने निर्वाचन समितिले जनाएको छ।
महानगरपालिकाको नेतृत्वमा भने संस्थापन पक्षले एक स्थानमा मात्रै जीत निकालेको छ। ६ महानगरपालिकामध्ये ललितपुरमा संस्थापन पक्षका शुभाननरत्न धाख्वा सभापतिमा विजयी भएका छन्। महानगरमा सभापतिमा विजयी अन्यमा संस्थापनइतरका नेताहरु निकट छन्। काठमाडौं महानगरमा विजयी नीलकाजी शाक्य नेता प्रकाशमान निकट हुन्। विराटनगरमा विजयी दीपक चापागाईं नेता डा शेखर कोइराला निकट हुन्। पोखरामा सुरेन्द्रमान बिजुक्छे र भरतपुरमा विजयी चित्रसेन अधिकारी वरिष्ठ नेता रामचन्द्र पौडेल पक्षका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764508750.jpg)
-1764146706.png)
-1763721444.png)
-1763559424.jpg)
-1764080971.png)
