काठमाडौं– मन्त्रिपरिषद्मा ‘कोटा मागेको’ भन्ने विषयमा प्रधानन्यायाधीश चोलेन्द्र शमशेर जबराको आलोचना भइरहेका बेला उनले मंगलबार फुलकोर्ट बोलाए। मन्त्रिपरिषद्मा कोटा मागेको विषयमा अघिल्लो दिन सोमबार प्रधानन्यायाधीश र सर्वोच्च अदालतले खण्डन गरेपनि मंगलबार बोलाएको फुलकोर्टलाई महत्त्वकासाथ हेरिएको थियो।
प्रधानन्यायाधीशले कोटामा मागेको विषय त्यहाँ उठ्ने र छलफल हुने अनुमान गरिएको थियो। तर, मंगलबारको फुलकोर्टमा यो विषयले प्रवेश नै पाएन। बैठकमा सहभागी एक न्यायाधीशले भने, ‘त्यो विषयमा छलफलै भएन।’
प्रधानमन्त्री शेरबहादुर देउवाले मन्त्रिपरिषद् विस्तार गर्न नसकिरहेका बेला प्रधानन्यायाधीश राणाले पनि दुई जना मन्त्रीको कोटा मागेको विषय सार्वजनिक भएको थियो। राणाले आफ्नो कोटाका लागि दीपक तिमिल्सिना र गजेन्द्र हमालको नाम दिएको सार्वजनिक भएको थियो। यस्ता कार्यले न्यायिक स्वतन्त्रता हनन् र शक्ति पृथकीकरणको सिद्धान्त विपरीत हुने भन्दै प्रधानन्यायाधीशको आलोचना भइरहेको छ।
बैठकमा सहभागी ती न्यायाधीशका अुनसार मंगलबारको बैठकमा दशैंका लागि रोस्टर तोक्ने विषयमा मात्र छलफल भयो। ‘आजको बैठकको अजेन्डा दशैंको विदा सम्बन्धी थियो’, उनले भने, ‘त्योबाहेक अरु विषयमा छलफल प्रवेश नै भएन।’
फुलकोर्टले यही असोज २१ गतेदेखि आगामी कात्तिक ३ गते कोजाग्रत पूर्णिका दिनसम्म सर्वाोच्चसहित देशभरका सबै अदालतमा विदा दिने निर्णय गरेको छ।
यस अवधिमा बन्दीप्रत्यक्षीकरणसहित र तत्काल सुनुवाइ नहुँदा असर पर्ने मुद्दा मात्र पेसी तोक्दै हेर्ने निर्णय भएको ती न्यायाधीशले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1772271039.png)
