काठमाडौं– साढे ३३ किलोसहित ३८ क्विन्टल सुन तस्करी प्रकरणमा मुद्दा लागेकामध्ये दुई प्रहरीले पुष्टि हुन नसकेको कसूरमा तीन वर्षसम्म जेल बस्नु परेको छ। एसएसपी श्याम खत्री र डीएसपी सञ्जय राउतले बिना कसुर तीन वर्ष जेल बस्नु गरेको हो।
तीन वर्ष जेल बसेपछि मोरङ जिल्ला अदालतले मंगलबार उनीहरुलाई निर्दोष ठहर गर्दै सफाइ दिएको छ। जिल्ला अदालतले पुर्पक्षमा राख्ने आदेश दिएसँगै त्यसको पुनरावेदन माग गर्दै उनीहरु उच्च अदालत विराटनगर पुगेका थिए।
विराटनगरले अन्य प्रहरी, पूर्वडीआइजी गोविन्द निरौला, तत्कालीन एसएसपी (हाल डीआइजी) दिवेश लोहनी, एसपी विकासराज खनाल, डीएसपी (हाल एसपी) प्रजित केसी, सई बालकृष्ण सञ्जेल, प्रहरी हवल्दार विष्णुबहादुर खड्का र जवान अम्मरबहादुर खड्कालाई साधारण तारेखमा रिहा हुन आदेश दिएको थियो। तर, एसएसपी खत्री र डीएसपी राउतलाई भने जिल्लाकै आदेश सदर गर्दै पुर्पक्षमै राख्न आदेश दिएको थियो।
जिल्ला र उच्चको आदेशसँगै उनीहरू तीन वर्षभन्दा बढी जेल बसेका थिए। तीन वर्ष जेल बसेपछि उनीहरु निर्दोष ठहर भएका छन्। बिना कसुर तीन–तीन वर्षसम्म प्रहरी अधिकारी नै जेल बस्नु परेको छ।
२०७४ माघको पहिलो साता थाई एयरलाइन्सबाट आएको साढे ३३ केजी सुन गायब भएपछि यो प्रकरण सुरु भएको थियो। उक्त सुन खोजी गर्ने क्रममा १८ फागुन २०७४ मा सुन तस्करीका नाइके चूडामणि उप्रेती (गोरे) का सहयोगी मोरङ उर्लाबारी नगरपालिका-७ का युवा सनम शाक्यको हत्या भएको थियो।
उनको अपहरणपछि हत्या गरिएको थियो। शाक्यको शव १९ फागुन २०७४ मा स्कार्पियो जिपभित्र विराटनगर-१ पोखरियामा फेला परेको थियो। घटनास्थलबाट टेकराज मल्ल ठकुरी, मोहन काफ्ले र कृष्ण कार्की पक्राउ परेका थिए।
उक्त्त हत्यापछि सरकारले उच्चस्तरीय छानबिन टोली गठन गरेर सुन तस्करीको छानबिन गरेको थियो। छानबिन समितिको प्रतिवेदनको आधारमा प्रहरीले विभिन्न चरणमा सरकारी वकिलको कार्यालय मोरङमार्फत मोरङ जिल्ला अदालतमा ७७ जनाविरुद्ध अभियोग दर्ता गराएको थियो।
उनीहरूमाथि आपराधिक समूह स्थापना गरी सुन चोरी पैठारी, निकासी गरी अवैध कारोबार गरेको र मानव अपहरण गरी हत्या गरेको अभियोग लगाइएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
