काठमाडौं– सिभिल सहकारीका बचतकर्ताको ४६ करोड रुपैयाँ ठगी गरेको उजुरीका आधारमा व्यवसायी इच्छाराज तामाङ पक्राउ परेका छन्। तामाङलाई केन्द्रीय अनुसन्धान ब्युरो (सीआईबी)को टोलीले सोमबार सुन्धाराबाट पक्राउ गरेको हो।
सिभिल ग्रुपका अध्यक्ष तामाङ एमालेका तर्फकबाट संविधानसभा सदस्यसमेत बनेका थिए। तत्कालीन समयमा संसद्को अर्थसमितिमा बसेर उनले बैंक तथा वित्तीय संस्थासम्बन्धी विधेयक (बाफिया), २०७२ मा आफ्नो स्वार्थअनुकूल एक दर्जनबढी संशोधन हालेका थिए। आफैं बैक तथा वित्तीय संस्थाको सञ्चालक रहेर स्वार्थ बाझिने कानुन निर्माण गरेको भनी विवादसमेत भएको थियो। समितिले चलखेलका आधारमा पास भएको विधेयक फेरि फर्केर संसोधन भएको थियो।
सिभिल होम, सिभिल अपार्टमेन्ट, सिभिल क्यापिटल मार्केट, सिभिल बैंक, सिभिल रियल इस्टेट, सिभिल इन्टरनेशनल कन्सल्ट्यान्ट, सिभिल ट्रेडिङ, सिभिल बिजनेश कम्प्लेक्स र सिभिल सेभिङ एण्ड क्रेडिट सहकारी लिमिटेड तामाङकै नेतृत्वमा छ।
सिभिल ग्रुपका विभिन्न संस्था र कम्पनीमा बचत रकम जम्मा गरेका ३२ सय सर्वसाधारणको ७ अर्ब रुपैयाँभन्दा बढी रकम डुबाएर उनी फरार रहेका थिए। उनले सबैभन्दा धेरै ठगी सिभिल सहकारीबाटै गरेका थिए।
उनले सिभिल ग्रुपअन्तर्गतकै सिभिल होम्स प्रालिलाई सहकारीमार्फत ८ अर्ब १ करोड ३७ लाख ११ हजार २११ रुपैयाँ ३७ पैसाभन्दा बढी रकम प्रवाह गरेका थिए। सहकारीका बचतकर्तालाई उनले बाउन्स चेक दिँदै झुलाउने गरेका थिए। उनीमाथि सम्पत्ति शुद्वीकरण अनुसन्धान विभागले अनुसन्धान गरिरहेको छ। विभागले उनको सम्पत्तिसमेत रोक्का राखेको छ।
उनी सञ्चालक रहेको सिभिल बचत तथा ऋण सहकारी संस्था पछिल्लो दुई वर्षदेखि वित्तीय चुनौती र आर्थिक समस्याबाट गुज्रिरहेको छ।
बचतकर्ताको रकम फिर्ता गर्न नसकेपछि तामाङले २०७६ जेठमा सार्वजनिक कार्यक्रम गरेर अरु सहकारीलाई सहयोग गर्न आग्रह गरेका थिए। सिभिल समूहको स्वामित्वमा रहेको सिभिल सहकारी संस्थाको ऋण विवादमा काठमाडौं जिल्ला अदालत र उच्च अदालत पाटनमा अहिले पनि मुद्दा चलिरहेको छ।
सिभिल समूहको लगानीमा रहेको सहकारीले आफ्नै हाउजिङ कम्पनीलाई ८० प्रतिशतभन्दा बढी ऋण गैरकानुनीरुपमा प्रवाह गरी संस्थालाई धराशायी बनाएपछि बचतकर्ता र सेयर सदस्यह अदालत पुगेका हुन्। बचतकर्ताले आफ्नो रकम फिर्ता पाएका छैनन्। सिभिल सरकारीले राष्ट्रिय सहकारी बैंकबाट लिएको ३० करोड भन्दा बढी ऋण पनि लामो समयदेखि तिरेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
