काठमाडौं- कोरोना संक्रमणको जोखिमसँगै बन्द भएका धार्मिक आस्थाका केन्द्रहरुमा विस्तारै खुल्न थालेका छन्। बौद्धमार्गीहरुको आस्था र श्रद्धाको केन्द्र रहेको लुम्बिनीमा आन्तरिक र बाह्य पर्यटकको विस्तारै चहलपहल सुरु भएको छ।
गएको साउनदेखि नै लुम्बिनी क्षेत्र खुला गरिए पनि सरकारले 'अन-अराइभल' भिसा खुला नगरेका कारण विदेशी पर्यटक आउन सकेका थिएनन्। अहिले आन्तरिक पर्यटकका साथै विदेशी पर्यटक आउन थालेका छन्। लुम्बिनी विकास कोषका सदस्यसचिव सानुराजा शाक्यले लुम्बिनी भ्रमणमा आउने पर्यटकको संख्या अहिले न्यून भए पनि सरकारले 'अन-अराइभल' भिसा दिन सुरु गरेकाले अब पर्यटकको आगमन बढ्ने विश्वास व्यक्त गरे। सरकारले तय गरेको स्वास्थ्य मापदण्ड पालना गराउने गरी भ्रमणमा आउनेको व्यवस्थापन गरिने सदस्यसचिव शाक्यले बताए।
लुम्बिनी विकास कोषले विश्व पर्यटन दिवसको दिन लुम्बिनी क्षेत्र खुला रहेको सन्देश विश्वभरि पठाएको जानकारी दिएको छ। लुम्बिनीलाई कोरोना संक्रमणको जोखिमबाट मुक्त गराउँदै पर्यटकलाई आकर्षित गर्नका लागि कोषले कोरोना विकास निर्माण, सरसफाइ र मर्मत सम्भारको काम निरन्तररुपमा गरिरहेको सदस्यसचिव शाक्यले बताए।
कोषले अहिले नहर पोखरीमा पानी राख्ने, बगैंचाहरुको मर्मत तथा सरसफाइको काम गरिरहेको छ। पर्यटकलाई आकर्षित गर्न लुम्बिनी विकास कोषमात्र नभइ यहाँका होटल व्यवसायीहरु पनि काम गर्नुपर्नेछ। पर्यटकहरुको लागि होटल व्यवसायीहरु र लुम्बिनी विकास कोषको संयुक्त कार्यक्रम प्याकेज आउनसके कोरोनाले थलिएको व्यवसाय माथि उठ्ने पर्यटन व्यवसायीहरूको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
