काठमाडौं– एनआरएन जापानको चुनावमा प्रविधिको दुरुपयोग भएको आसन्न विश्वसम्मेलनका अध्यक्षका प्रत्यासी डा बद्री केसीले स्वीकारेका छन्।
वर्तमान कार्यसमितिमा उपाध्यक्ष रहेका केसीले एशिया प्यासेफिकको भर्चुअल संवादमा बोल्ने क्रममा परराष्ट्र मन्त्रालयको निर्णय स्वीकार्ने बताएका छन्। एनआरएनको चुनावमा अनलाइन प्रणाली एमआइएस मार्फत मतदाताको ‘फेस रिडिङ’ गरेर मात्रै भोट दिनुपर्ने व्यवस्था हुनुपर्ने उनले विकल्प राखे।
जापानमा भएको एनआरएनएको निर्वाचनले गर्दा गैरआवासीय नेपाली दुई ध्रुवमा बाँडिएका छन्। संस्थापनपक्ष निर्वाचन निष्पक्ष भएको दाबी गर्दै आइरहेको छ भने अर्को पक्षले निर्वाचनमा धाँधली भएको बताउँदै आएको छ।
‘आइटीको चरम दुरुपयोग भएको हो।एमआइएस सिस्टममा फेस रिडिङ गरेको भए यो समस्या आउँदैनथ्यो,' उनले भने, ‘१७ सय व्यक्तिको इमेलको दुरुपयोगको कुरा आएको छ’ उनले भर्चुअल संवादमा भने।
जुन पक्ष विजयी भएपनि विवाद आउने सम्भावना रहेको उनले बताए। त्यहाँको निर्वाचनका विषयमा परराष्ट्र मन्त्रालयले अध्ययन गरिरहेको छ।
विवादको विषय परराष्ट्रमा पुगेकाले मन्त्रालयको निर्णय स्वीकार्ने उनले बताए। एक व्यक्तिको मेल आइडी, फोन नम्बर अर्कोले प्रयोग गर्न नसक्नेगरी ‘फेस रिकोग्निसन’ प्रणालीको व्यवस्था गर्नुपर्ने उनको राय छ।
आसन्न विश्व सम्मेलनमा हुने अनलाइन मतदानमा प्रयोग हुने प्रविधिको जानकारी गराउँदै उनले, ‘भौतिक उपस्थिति भएर निर्वाचन हुन नसके फेस रिडिङ गर्ने सिस्टम ल्याउँछौं। त्यसमा पनि विश्वास नभएमा अन्तर्राष्ट्रिय मान्यताप्राप्त सिस्टम ल्याउनुपर्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
