काठमाडौं– भारतीय सिनेमाका हस्ती मिथुन चक्रवर्तीको जीवनमाथि लेखिएको पुस्तक ‘मिथुन चक्रवर्तीः द दादा अफ बलिउड’ सार्वजनिक भएको छ।
भारतस्थित रुपा प्रकाशनले सार्वजनिक गरेको उक्त पुस्तकलाई राम कमल मुखर्जीले लेखेका हुन्। पुस्तकमा नायक चक्रवर्तीको व्यक्तिगत जीवनसँगै सिनेमा क्षेत्रको यात्राको बारेमा चर्चा गरिएको छ।
उक्त पुस्तकमा चक्रवर्तीका जीवनका थुप्रै रोचक किस्साहरु समावेश गरिएका छन्। चक्रवर्ती आफू कलाकार बन्न एक निर्माता सामु जाँदा उनको अनुहारलाई लिएर भएको टिप्पणीदेखि नाँच्ने कुरालाई लिएर बंगाली समुदायमाथि गरिएको टिप्पणीमा चक्रवर्तीले जनाएको प्रतिक्रियालगायतका थुप्रै रोचक प्रसंगहरु पुस्तकमा संग्रहित छन्।
पुस्तकमा लेखिएअनुसार चक्रवर्तीलाई एक निर्देशकले नृत्य गर्न भनेका थिए। जसअनुसार गीत बजाएर उनी नाँच्न थाले। तर, उनको असामान्य नृत्यलाई देखेर ती निर्देशकले भने, ‘मलाई थाहा थियो बंगालीहरु नाँच्न सक्दैनन्। उनीहरुले धोती लगाउँछन्। तर, नाँच्न सक्दैनन्। गीत, संगीत र नृत्य तिमीहरुको लागि होइन।’
आफूलाई नृत्य गर्न नआएकोमा चक्रवर्तीलाई कुनै दुखेसो थिएन। तर, निर्देशकले उनीसँगै उनको समुदायमाथि नै टिप्पणी गर्दा भने उनलाई रिस उठ्यो। उनी निर्देशकको सामुन्ने उभिएर भने, ‘यदि बंगालीबारे थप एक शब्द बोलेमा म तपाईंको अनुहारको बनोट नै फेरिदिन्छु’
पुस्तकमा चक्रवर्तीको अभिनय यात्राको प्रारम्भिक समयका धेरै किस्साहरु समेटिएका छन्।
अभिनयमा भर्खर प्रवेश गरेका चक्रवतीले आफ्नो सुरुवाती समयमा निर्मातालाई आफ्नो लागि काम माग्न गएका थिए। तर, निर्देशकले उनलाई रोल दिनुको सट्टा उनलाई हेय भावले टिप्पणी गरे।
‘आफ्नो अनुहार कहिल्यै ऐनामा हेरेको छ? कुन कोणबाट कलाकार बन्ने अनुहार छ तिम्रो?’ निर्देशकले भनेको कुरा पुस्तकमा चक्रवर्तीलाई उदृत गर्दै लेखिएको छ।
चक्रवर्तीले सन् १९७६ मा हिन्दी फिल्म ‘म्रिगया’मार्फत् डेब्यू गरेका थिए। त्यसयता उनले कहिल्यै फिल्म क्षेत्रबाट टाढा जानु परेन। पछिल्लो पटक राम गोपाल बर्माको फिल्म ‘ट्युबेल ओक्लक’मा देखिएका उनले हालसम्म तीन वटा राष्ट्रिय अवार्ड हात पारिसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1769827973.png)
-1764146706.png)
