काठमाडौं- संविधान दिवसको अवसरमा विभिन्न कसुरमा कैद भुक्तान गरिरहेका ५२३ जनाको बाँकी कैद सजाय मिनाहा हुने भएको छ। यसैगरी अदालतबाट कैद सजायको आदेश भएका आठ जनाले माफी पाउने भएका छन्।
मन्त्रिपरिषद्को सिफारिसबमोजिम राष्ट्रपति विद्यादेवी भण्डारीले उनीहरुको कैद सजाय मिनाहा तथा माफी गरेको राष्ट्रपति कार्यालयले शनिबार छुट्टा-छुट्टै विज्ञप्तिमार्फत् जानकारी दिएको छ। मन्त्रिपरिषद्को भदौ २९ गतेको बैठकले ५२३ जनालाई बाँकी कैद सजाय मिनाहा गर्ने र आठ जनालाई माफी दिने निर्णय गर्दै राष्ट्रपतिसमक्ष सिफारिस गरेको थियो।
'सम्माननीय राष्ट्रपति श्रीमती विद्यादेवी भण्डारीज्यूबाट नेपालको संविधानको धारा २७६, फौजदारी कसुर (सजाय निर्धारण तथा कार्यान्वयन) ऐन, २०७४, ज्येष्ठ नागरिकसम्बन्धी ऐन, २०६३, श्री सर्वोच्च अदालतबाट रिट नं. ०७६-WO-०९३९ को मुद्दामा मिति २०७७/४/१९ मा भएको परमादेशको आदेश, मुलुकी अपराधसंहिता, २०७४ तथा बालबालिकासम्बन्धी ऐन, २०७५ र फौजदारी कसुर (कैदकट्टा) नियमावली, २०७६ बमोजिम नेपाल सरकार, मन्त्रिपरिषद्को मिति २०७८/५/२९ गतेको सिफारिसमा मिति २०७८/६/३ गतेबाट लागू हुने गरी हर्कबहादुर राईसमेत ५२३ (पाँच सय तेइस) जना कैदीहरुको भुक्तान हुन बाँकी कैद कट्टा गरी संविधान दिवस, २०७८ को अवसरमा माफी मिनाहाा भएको छ,' राष्ट्रपति कार्यालयको विज्ञप्तिमा उल्लेख छ।
यस्तै मुलुकी फौजदारी कार्यविधि संहिता, २०७४ को दफा १५९ को प्रावधानअनुसार पूर्णबहादुर भन्ने किशोर भण्डारीसमेतका आठ जनालाई विभिन्न अदालतबाट विभिन्न मितिमा भएका फैसलाबमोजिम लागेको कैद सजाय संविधान दिवस २०७८ को अवसरमा माफी भएको राष्ट्रपति कार्यालयले जानकारी दिएको छ।
वर्तमान संविधान जारी भएको दिन असोज ३ गते (भोलि) संविधान दिवस मनाइँदै छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
