ज्ञानेन्द्र मल्ल, शरद भेषवाकर र आरिफ सेख
काठमाडौं- पारस खड्काका नाममा नेपाली क्रिकेटमा बग्रेल्ती कीर्तिमान छन्। त्यही कारण सन्यासपछि नेपाली क्रिकेटले उनलाई ‘मिस’ गर्नेछ। त्यसभन्दा महत्वपूर्ण चाहिँ अब नेपाली क्रिकेटमा उनको स्थान कसले लिन सक्छ भन्ने प्रश्न छ।
उनी एकदिवसीय अन्तर्राष्ट्रिय (ओडीआई) मा नेपालका तर्फबाट सबैभन्दा बढी रन बनाउने खेलाडी हुन्। १० ओडीआईमा उनले ३१५ रन बनाएका छन्।
पहिलो १० ओडीआईमा ३०० रन कटाउने उनी एक्ला ब्याट्स्म्यान हुन्। ओडीआईमा शतक हान्ने पनि उनी एक्ला ब्याट्स्म्यान हुन्। उनको नाममा ओडीआईमा एक शतक र एक अर्धशतक छन्। डेब्युमा सबैभन्दा धेरै चार विकेट लिने बलरको कीर्तिमान पनि उनकै नाममा छ।
नेपालले अहिलेसम्म खेलेका सबै १० ओडीआईमा उनी संलग्न थिए। अघिल्ला ६ ओडीआईको कप्तानी गरे। र, अर्को प्रमुख विषय– उनले नौ वटा ओडीआईमा मध्यक्रममा ब्याटिङ गरेका थिए। केही खेलमा त उनी एक्लैको प्रदर्शनको भरमा नेपालले जित हासिल गरेको छ।
पारसले १० ओडीआई खेल्दा आठ पटक तेस्रो नम्बरमा ब्याटिङ गरेका छन्। एक पटक ओपनिङमा र एक पटक चौँथो नम्बरमा खेलेका छन्। उनले युएईविरुद्ध दुबईमा २८ जनवरी २०१९ मा भएको खेलमा पनि तेस्रो नम्बरमा नै ब्याटिङ गरेर शतक बनाएका थिए।
ओपनिङमा भने उनी जमेनन्। विश्व क्रिकेट लिग–२ अन्तर्गत ५ फेब्रुअरी २०२० मा कीर्तिपुरमा नै भएको खेलमा उनी ज्ञानेन्द्र मल्लसँग ओपनिङमा आएका थिए। तर, उनले १४ बलमा ३ रन मात्र बनाउन सके। १९८ रनको लक्ष्य पछ्याएको नेपाल पारस र ज्ञानेन्द्र चाँडै बाहिरिँदा १७९ रनमै समेटिएको थियो। ज्ञानेन्द्रले पनि २ रन मात्र बनाएका थिए।
पारस कतिसम्म महत्वपूर्ण खेलाडी थिए भने उनी बाहिरिँदा पूरा टिम मनोवैज्ञानिक दबाबमा पर्ने गर्थ्यो। राष्ट्रिय क्रिकेट टोलीका पूर्वसदस्य सन्जम रेग्मी तेस्रो स्थानको ब्याट्स्म्यान अनुभवी हुनुपर्ने बताउँछन्। ‘वान डाउन आउने ब्याट्स्म्यान दबाब थाम्न सक्ने र रन पनि बनाउन सक्ने हुनुपर्छ। भारतमा राहुल द्रविड, विराट काेहली र अष्ट्रेलियाका रिकी पाेन्टिङले वान डाउन ब्याटिङ गरेको हामीले देखेका हौँ, पर्याप्त अनुभव नभएका खेलाडीलाई वान डाउन पठाउन मिल्दैन,’ सन्जम भन्छन्।
पारसले एउटा ओडीआईमा चौँथो नम्बरमा ब्याटिङ गर्दा भने अर्धशतक बनाएका थिए। ३ अगष्ट २०१८ मा नेदरल्यान्ड्सविरुद्ध भएको खेलमा उनले ६९ बलमा ५१ रन बनाएका थिए। उनको यो पहिलो अर्धशतक थियो र नेपालले पनि ओडीआईमा पहिलो जित दर्ता गरेको थियो।
उनले अन्य खेलाडीसँग गरेको साझेदारीले पनि मध्यक्रममा उनको महत्व कति थियो भन्ने देखाउँछ। युएईविरुद्ध दुबईमा २८ जनवरी २०१९ मा भएको खेलमा ज्ञानेन्द्र मल्लसँगको ६२ रनको साझेदारी दोस्रो विकेटका लागि नेपालको अहिलेसम्मको उच्च हो। त्यही खेलमा पारस र रोहितकुमार पौडेलबीच भएको ५४ रनको साझेदारी पनि पाँचौँ विकेटका लागि अहिलेसम्मको उच्च हो।
आज पपुवा न्युगिनीसँगको खेल पारसविनाको नेपालको पहिलो ओडीआई हुनेछ। १० मध्ये आठपटक तेस्रो स्थानमा ब्याटिङ गरेका पारसको स्थान अब कसले लिन सक्छ?
तेस्रो स्थानमा ज्ञानेन्द्र, शरद कि आरिफ?
पारस टिममा हुँदा उनले तेस्रो स्थान छोडेको दुई खेलमा एक–एक पटक शरद भेषवाकर र अनिल साहले ब्याटिङ गरेका थिए। ओमानविरुद्ध २०० रनभन्दा कमको योगफल पछ्याएको अवस्थामा शरदले तेस्रो नम्बरमा आएर अर्धशतक बनाएका थिए। तर, उनले सुस्त गतिमा ब्याटिङ गर्दा नेपाल विजयी हुन सकेन। उनले १०८ बलमा ५५ रन बनाएका थिए।
त्यस्तै नेदरल्यान्ड्सविरुद्ध भएको खेलमा अनिल साह क्रिजमा टिक्नै सकेनन्। उनले ३ बलमा एक चौकाको मद्दतमा ४ रन मात्र बनाउन सके। यद्यपि, उक्त खेलमा पारस र सोमपालको अर्धशतकको मद्दतमा नेपाल विजयी भएको थियो। अनिल अहिले राष्ट्रिय टोलीबाट बाहिरिसकेका छन्।
अहिलेको टिम युवा र अनुभवीको मिश्रित छ। पारससँगै १ अगष्ट २०१८ मा डेब्यु गर्ने ११ मध्ये सात खेलाडी अहिले पनि टिममा छन्। त्यस बेलाका ‘टिम मेट’ ज्ञानेन्द्र मल्ल, शरद भेषवाकर, दीपेन्द्रसिंह ऐरी, आरिफ सेख, सोमपाल कामी, करण केसी, सन्दीप लामिछाने ओमान भ्रमणमा छन्। नेपालको डेब्यु खेलमा बेञ्चमा बसेका रोहितकुमार पौडेल पनि टिममा छन्। सोमपाल, करण र सन्दीप बलर हुन्।
दीपेन्द्रले चौँथो स्थानमा नै ब्याटिङ गर्ने लगभग पक्का जस्तै थियो। तर, उनी अभ्यासका क्रममा घाइते भएको क्यानका मेनेजर विनोद दासले बताएका छन्। चोटका कारण दीपेन्द्रले पहिलो ओडीआई गुमाउँदा चौँथो स्थानमा आरिफ वा शरदले ब्याटिङ गर्न सक्छन्। यसपटक ओपनिङमा नयाँ जोडी आउने निश्चित जस्तै छ। त्यसकारण ज्ञानेन्द्र, शरद र आरिफमध्येबाटै तेस्रो नम्बरमा ब्याटिङ गराउने सम्भावना छ।
सन्जम रेग्मी भने अनुभवको हिसाबले शरदलाई तेस्रो नम्बरमा ब्याटिङ गराउनु उपयुक्त मान्छन्। त्यसो भए ज्ञानेन्द्रले चौँथो नम्बरमा पनि ब्याटिङ गर्न सक्ने उनको भनाइ छ। ‘तर, ओपनिङमा दुई जना नै नयाँ खेलाडी ल्याउनु उचित हुन्न, संसारमै यस्तो हुन्न। कुशल भुर्तेल वा आसिफलाई मौका दिँदा एउटा एन्डमा ज्ञानेन्द्र मल्ल हुनुपर्छ’, सन्जम भन्छन्।
यसपटक कुशल भुर्तेल र आसिफ सेखलाई ओपनिङ ब्याटिङ जोडीको रुपमा हेरिएको छ। यसो हुँदा कप्तान ज्ञानेन्द्रले तेस्रो, आरिफले चौँथो र शरदले पाचौँ स्थानमा ब्याटिङ गर्ने संभावना बलियो छ।
ज्ञानेन्द्र ‘क्लासिकल’ ब्याट्स्म्यान हुन्। उनलाई नेपालको सबैभन्दा राम्रो ‘टेक्निकल’ ब्याट्स्म्यान मानिन्छ। नेपालले खेलेका धेरै ‘लिष्ट ए’ मा उनले तेस्रो नम्बरमा नै ब्याटिङ गर्ने गरेका थिए। तर, नेपालको ओपनिङ लगातार ‘फ्लप’ हुन थालेपछि उनलाई इनिङको सुरुआतमा नै पठाउन थालिएको थियो।
उनले सबै १० ओडीआईमा ओपनिङ गर्दै दुई वटा अर्धशतक बनाएका छन्। नेपालका तर्फबाट ओडीआईमा दुई अर्धशतक बनाउने उनी एक्ला ब्याट्स्म्यान हुन्।
आरिफ सेखले पनि केही ‘लिष्ट ए’मा तेस्रो नम्बरमा ब्याटिङको मौका पाएका थिए। उनलाई पनि प्राविधिक रुपमा राम्रो ब्याट्स्म्यान मानिन्छ। उनी आवश्यकताअनुसार क्रिजमा टिकेर रन अगाडि बढाउन सक्ने ब्याट्स्म्यान हुन्। यदि कुशल र आसिफमध्ये एक जनाले मात्र ओपनिङमा मौका पाए ज्ञानेन्द्र माथिल्लो क्रममा नै यथावत् रहनेछन्। त्यो अवस्थामा शरद र आरिफले तेस्रो र चौँथो नम्बरमा मौका पाउन सक्छन्।
आरिफले अहिलेसम्म १० ओडीआईमा नौ इनिङ ब्याटिङ गर्न पाएका छन्। जसमा १३० रन बनाएका छन्। ओडीआईमा उनको उच्च रन २९ हो।
युवा खेलाडीमा भरोसा
पारस खड्काले सन्यास लिनुअघि घरेलु मैदानमा नै नेदरल्याण्ड्स र मलेसियासँग भएको त्रिकोणात्मक टी२० अन्तराष्ट्रिय श्रृङ्खला पनि खेलेनन्। तर, उक्त प्रतियोगितामा युवा खेलाडीले पारसको अभाव हुन दिएनन्।
खासगरी ओपनिङ जोडीको रुपमा दुई युवा ब्याट्स्म्यान कुशल भुर्तेल र आसिफले गतिलो प्रदर्शन गरे। नेपालका पछिल्ला पाँच खेलमा सर्वाधिक रन बनाउने खेलाडी यी दुई नै हुन्। यद्यपि, ती पाँच खेल नै टी२० आई हुन्।
कुशलले पछिल्ला पाँच खेलमा सर्वाधिक २७८ रन बनाएका छन्। त्यसैगरी आसिफले १५४ र पाँच खेलमा चार इनिङ ब्याटिङ गरेका उपकप्तान दीपेन्द्रले १४७ रन बनाएका छन्। कुशलको औसत ६९.५०, आसिफको ३८.५० र दीपेन्द्रको ७३.५० छ।
अहिले टिममा यीबाहेक रोहितकुमार पौडेल, सन्दीप लामिछाने, पवन सर्राफ, सुसन भारी, कुशल मल्ल, गुल्सन झाजस्ता युवा खेलाडी समावेश छन्। तीमध्ये रोहित ब्याट्स्म्यान तथा कुशल र पवन अलराउन्डर हुन्।
प्रशिक्षक यसपटक युवा खेलाडीमा भर परे शरद भेषवाकरजस्ता भेट्रानले बेञ्चमा पनि बस्नुपर्ने हुनसक्छ। उनको स्थानमा रोहित पौडेलले खेल्न सक्छन्। रोहितले ओडीआईमा एक अर्धशतक बनाइसकेका छन्।
त्यस्तै कुशल मल्ल र पवनमध्ये एक जनाले सातौँ नम्बरमा मौका पाउन सक्छन्। कुशल मल्लले पनि ओडीआईमा एक अर्धशतक बनाएका छन्। कुशल र पवन दुवै ‘फिनिसर’को भूमिका निभाउन सक्छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
