काठमाडौं– भारतविरुद्धको दोस्रो मैत्रीपूर्ण खेलसँगै नेपाली राष्ट्रिय फुटबल टिमका कप्तान किरण चेम्जोङले नयाँ कीर्तिमान बनाएका छन्।आइतबार साँझ दशरथ रंगशालामा सुरु भएको खेलसँगै चेम्जोङ नेपालका लागि सर्वाधिक खेल खेल्ने खेलाडी बनेका हुन्।
गत बिहीबार भारतविरुद्धको पहिलो मैत्रीपूर्ण खेलसँगै किरणले पूर्वकप्तान विराज महर्जनको नाममा रहेको सर्वाधिक खेल खेल्ने कीर्तिमान बराबरी गरेका थिए। विराजले नेपालका लागि ७३ खेल खेलेका छन्। आइतबार साँझको खेलसँगै किरणले नेपालका लागि खेलेका खेलको संख्या ७४ पुगेको छ।
किरणले सन् २००८ मा कम्बोडियामा भएको एएफसी च्यालेन्ज कप छनोटमा नेपालका लागि डेब्यूको अवसर पाएका थिए। उनलाई जर्मन प्रशिक्षक थोमस फ्लाथले अवसर दिएका थिए।
लाओसविरुद्धको खेलमा पहिलो क्याप जितेका उनी लामो समय टिक्न सकेनन्। विपक्षी खेलाडीसँग जुध्दा उनको बङ्गारा फुस्केपछि उनी घाइते हुँदै मैदान छाड्न बाध्य रहे। त्यसपछि काठमाडौं फर्केयता ललितपुर मंगलबजारस्थित एक निजी डेन्टल क्लिनिकमा उनको उपचार भएको थियो। त्यसपछि उनी लामो समय मैदान फर्किन सकेनन्।
करिब १३ वर्ष राष्ट्रिय टोलीबाट खेलिरहेका किरणले आफू यो अवसरसम्म आइपुग्नेमा आशावादी नभए पनि मिहिनेतका कारण यो उपलब्धि हासिल गरेको बताए।‘डेब्यू खेलमा नै घाइते भएपछि यहाँसम्म आइपुग्छु भन्ने लागेको थिएन। निरन्तर मिहिनेतले नै यहाँसम्म आइपुगेको छु,’ किरणले भने।
व्यक्तिगत कीर्तिमान बनाउँदा खुसी भएपनि आफूले कीर्तिनका लागि कहिल्यै नखेलेको उनले बताए । उनले भने, ‘देशका लागि खेल्न पाउनु ठूलो कुरा हो। कीर्तिमान त्यसपछि मात्र आउँछ। जति खेलिन्छ राम्रो प्रदर्शन गर्ने प्रयास गरिरहनेछु।’
गत वर्ष भएको घरेलु मैदानमा आयोजना भएको थ्री नेसन्स कपपछि विराजले सन्यास लिएसँगै नेपाली टिमको पूर्णकालीन कप्तान बनेका हुन्, किरण।
तर, विराटको अनुपस्थितिमा यसअघि सन् २०१८ मा बंगलादेशमा भएको साफ च्याम्पियनसिपमा भुटानविरुद्ध पहिलोपटक किरणले कप्तानी सम्हालेका थिए।
किरणले घरेलु लिगमा मछिन्द्र, थ्रीस्टार, मनाङ मर्स्याङ्दी र मोफसलमा नेपाल पुलिसबाट समेत खेलेका छन्। पहिलो नेपाल सुपर लिगमा उपविजेता धनगढी एफसीको आइकोनिक खेलाडीको रुपमा खेलेका थिए।
किरणले माल्दिभ्सको टिसी स्पोर्टस् क्लब र भारतको आई लिग मिनर्वा पञ्जाबबाट लिग उपाधि हात पारेका छन्। भारत र माल्दिभ्समा किरण लिगमै सर्वोत्कृष्ट गोलरक्षक चुनिएका थिए।
किरण र विराजपछि रोहित चन्द र पूर्वकप्तान राजुकाजी शाक्य नेपालका लागि सर्वाधिक खेल खेल्ने खेलाडी हुन्। रोहितले नेपालका लागि ६९ पल्ट खेलिसकेका छन्। तर, उनी व्यवसायिक फुटबल खेल्ने क्रममा इन्डोनेसियामा छन्।
इन्डोनेसिया आएपछि ८ दिन अनिवार्य क्वारेन्टिन बस्नु पर्ने नियमका कारण प्राविधिक रुपमा नेपाल आउन सम्भव नभएको उनले बताएका छन्।यता, शाक्यले ६८ क्याप जितेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
