काठमाडौं- न्यूरोडस्थित पिपुल्स प्लाजा अगाडि ड्युटीमा रहेका प्रहरीलाई मुक्का हान्ने व्यक्तिको पहिचान भएको छ। बर्दीका प्रहरीलाई प्रहरीकै गाडीभित्र मुक्का हानेको भिडियो सार्वजनिक भएपछि अनुसन्धानमा खटिएको प्रहरी टोलीले प्रहरीलाई कुटपिट गर्ने व्यक्तिको समूह पहिचान गरेको हो।
प्रहरी उच्चस्रोतले प्रहरीलाई मुक्का हान्ने घटनामा कांग्रेसका कार्यकर्ता कमल शाहीसहित ८/९ जना संलग्न रहेको जनाएको छ। प्रहरीमाथि अभद्र व्यवहारको कसूरमा जिल्ला प्रशासन कार्यालयबाट उनीहरूविरुद्ध पक्राउ पूर्जी समेत जारी भइसकेको प्रहरी उच्चस्रोतले बताएको छ।
पक्राउ पूर्जी जारी भएपनि अहिलेसम्म कोही पक्राउ परेका छैनन्। प्रहरी स्रोत भन्छ, ‘कुट्ने मान्छेको पहिचान भइकन पनि पक्राउ पूर्जी जारी भइसकेको छ। तर, दबाबकै कारण अहिलेसम्म पक्राउ नपरेका हुन्।’
सो समूहले गत शुक्रबार राति पिपुल्स प्लाजा अगाडि रोकिराखेको प्रहरी गाडीभित्र बसेका प्रहरीसँग विवाद गर्दै कुटपिटसमेत गरेका थिए। सार्वजनिक भएको ४ मिनेट २७ सेकेन्डको भिडियोमा फिल्डमा खटिएका कमाण्डर भने युवा जमातलाई रोक्ने प्रयास गर्छन्, कुनै बल प्रयोग गर्दैनन्। बरु त्यो समूहका केहीले ठेलमठेल गर्दै प्रहरीको मास्क खोलिदिने र मुक्का हान्ने काम गर्छन्। प्रहरीले मोबाइलबाट उनीहरुको भिडियो खिचेको देखिन्छ।
ठूला कुरा गर्ने? फोटो खिच्ने? भन्दै उनीहरु प्रहरीमाथि आक्रामक बनेको देखिन्छ। भिडियोमा एक जनाले समूहलाई छुट्याएर बाहिर लैजान प्रयास गरेको देखिन्छ। कुटपिट गरिसकेपछि केही पर गएका उनीहरु फेरि फर्केर आएर प्रहरीमाथि कुटपिट गर्न खोज्छन्। यति हुँदासम्म फिल्ड कमाण्डर भने त्यो समूहलाई सम्झाउन मात्रै खोज्छन्।
‘सिपाही भएर बढ्ता हुने, जे पायो त्यही बोल्ने?’ भन्दै उनीहरुले प्रहरीलाई हकारिरहेको भिडियोमा देखिन्छ। त्यसको केही समयमा प्रहरीको थप टोली पनि घटनास्थल आइपुग्छ। उनीहरु पनि त्यो समूहको अगाडि निरीह भएको देखिन्छ।
उक्त भिडियो सार्वजनिक भएपछि पूर्वडीआईजी पूर्णचन्द्र जोशीले प्रहरीमाथि हातपात गर्नेलाई हदैसम्मको कारबाही हुनुपर्ने बताएका छन्। जोशीले भने, ‘प्रहरी आफैंले कुनै गल्ती गर्नु हुँदैन। आफू सही हुँदाहुँदै कसैले अति गर्छ भने त्यस्तालाई नियम सिकाउनु पर्छ।’
यो पनि पढ्नुहोस् :
को हुन् बर्दीको प्रहरीलाई न्यूरोडमा गाडीभित्रै मुक्का हान्ने युवा?
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768049575.png)
-1764146706.png)
