राजविराज– राजविराजस्थित महेन्द्र विन्देश्वरी बहुमुखी क्याम्पसमा तीन महिना अघिदेखि लगाइएको ताला हालसम्म पनि खुलेको छैन। क्याम्पसलाई त्रिभुवन विश्व विद्यालयवाट अलग गरी राजर्षि जनक विश्वविद्यालयमा गाभ्ने निर्णयविरुद्ध आन्दोलनरत संघर्ष समितिले गत फागुन १३ गते क्याम्पसमा अनिश्चितकालीन तालाबन्दी गरेको थियो।
राजर्षि जनक विश्वविद्यालयमा गाभ्ने निर्णयको विरुद्धमा प्राध्यापक तथा कर्मचारीहरुले संघर्ष समिति गठन गर्दै आन्दोलन थालेपछि क्याम्पसको सम्पूर्ण कामकाज ठप्प हुनेगरी तालाबन्दी गरिएको हो। करिब तीन सातापछि क्याम्पस प्रमुख डा सर्वेशचन्द्र मिश्रको अनुरोधमा पठनपाठन सुचारु गरिए पनि फागुन २७ गते क्याम्पस प्रमुखको कार्यकक्षमा लगाइएको ताला भने खुलेको छैन।
तालावन्दीका कारण महत्वपूर्ण अभिलेख कोठामै थुनिएको, प्रशासकीय गतिविधि प्रभावित भएको र पत्राचार लगायतका काम अवरुद्ध भएको क्याम्पस प्रमुख मिश्रले बताए।
त्रिभुवन विश्वविद्यालय भन्दा पनि जेठो २०१४ सालमा स्थापित मविव क्याम्पसलाई ऐनद्वारा राजर्षि जनक विश्वविद्यालयमा गाभिए पनि त्रिविले विधिवत हस्तान्तरण नगरेका कारण क्याम्पसमा कार्यरत प्राध्यापक, कर्मचारी र विद्यार्थी समेतको भविष्य अन्यौलमा परेको संघर्ष समितिका संयोजक सिंहेश्वर प्रसाद यादवको भनाइ छ। पुराना क्याम्पसलाई सेवा र सर्तहरु नै अस्पष्ट रहेको विश्वविद्यालयमा गाभेर प्राध्यापक, कर्मचारी र विद्यार्थीको भविष्य अन्यौलमा पार्न खोजिएको उनले बताए।
जनकपुरधाममा स्थापना हुने भनिएको उक्त विश्वविद्यालयमा प्राविधिक, सांस्कृतिक, कृषि लगायतका विषयमा पठनपाठन हुने विधेयकमा जनाइएको छ।
प्रदेश २ का चार आंगिक क्याम्पसमध्ये ठाकुरराम बहुमुखी क्याम्पस वीरगञ्जबाहेक जनकपुरस्थित रामस्वरुप रामसागर बहुमुखी क्याम्पस, सिरहास्थित सूर्यनारायण सत्यनारायण मोरवैता क्याम्पस र राजविराजस्थित महेन्द्र विन्देश्वरी बहुुमुखी क्याम्पसलाई राजर्षि जनक विश्वविद्यालयमा गाभ्ने गरी ऐन आएको छ।
संसदले गत असोज २६ गते राजर्षि जनक विश्वविद्यालय सम्बन्धी विधेयक पारित गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
