काठमाडौं- नेपाली कांग्रेसका वरिष्ठ नेता रामचन्द्र पौडेल पक्षबाट सभापतिका आकांक्षीले आसन्न महाधिवेशनमा एक भएर जाने निर्णय गरेका छन्।
मंगलबार पाैडेलनिवास बोहराटारमा बसेको सभापतिका आकांक्षी नेताहरूको बैठकले आफ्नो पक्षबाट एकल उम्मेद्वार बनाएर जाने निर्णय गरेको हो। यद्यपि, बैठकमा सभापतिमा एकल उम्मेद्वारको नाममा सहमति हुन भने सकेन। सभापतिको दाबीबाट नेताहरु पछि नहटेपछि बैठक पुनः बुधबार बस्ने भएको छ।
बुधबारको बैठकमा हरसम्भव एकल व्यक्तिको नाममा निर्णय गरिने नेता बलबहादुर केसीले बताए। भोलिको बैठकमा सहमति जुट्न नसकेको अवस्थामा महाधिवेशनमा एकसाथ जाने सामूहिक प्रतिवद्धता सार्वजनिक गरिने बताइएको छ।
सभापतिसँगै पदाधिकारीको प्यानल बनाउने विषयमा पनि आज छलफल भएको थियो। ‘एकल सभापति मात्रै होइन,पदाधिकारी उम्मेद्वार बनाउने बारेमा पनि छलफल भएको छ’, नेता केसीले भने।
एकल उम्मेद्वारीमा सहमति जुट्न नसके सभापतिका आकांक्षी सबै उम्मेद्वारले मिडियामार्फत् आसन्न महाधिवेशनमा एक भएर जाने सन्देश प्रवाह गर्ने तयारी गरिएको छ।
‘महाधिवेशनमा पौडेलपक्ष एकसाथ जाने प्रतिवद्धता सार्वजनिक हुन्छ। सभापतिमा उम्मेद्वार एक जना नै हुन्छन्। एक मात्रै नउठ्ने हो भने विकल्प पनि छैन’, नेता केसीले भने, ‘कांग्रेसको नेतृत्व देउवाबाट सही तरिकाले हुन नसक्नेमा सबै एकमत छौं। उनलाई नेतृत्वबाट हटाउनु पर्नेमा पनि सबै एकमत छौं।’
पाैडेल समूहबाट पौडेलसहित महामन्त्री शशांक कोइराला, नेताहरू प्रकाशमान सिंह, डा शेखर कोइरालाले सभापतिको दाबी गरेका छन्। सोही समूहबाट डा रामशरण महत, अर्जुननरसिंह केसी र सुजाता कोइरालाला पनि सभापतिको आकांक्षी छन्।
एक व्यक्तिको नाममा सहमति खोज्न नसके आफ्नो पनि उम्मेद्वारी रहने अर्जुन नरसिंह केसीले बताएका छन्। वरिष्ठ नेता पौडेल महामन्त्री शशांक र नेताद्वय सिंह र शेखर पछि हट्ने पक्षमा हालसम्म देखिएका छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
