काठमाडौं- नेपाली कांग्रेसका केन्द्रीय सदस्य प्रदीप पौडेलले छानबिन समितिले प्रतिवेदन बुझाएपछिको अवधिमा कुनै प्रगति नभएको भन्दै नेतृत्वसँग असन्तुष्टि व्यक्त गरेका छन्।
बिहीबार पहिलो दिनको बैठकमा बोल्ने क्रममा नेता पौडेलले साउन १२ मा क्रियाशील सदस्यता छानबिन समितिले प्रतिवेदन बुझाएपनि नेतृत्वले विवाद साम्य गर्न नसकेको आरोप लगाए।
‘महाधिवेशन नगर्ने हो तपाईंहरु? यस्तो असंवेदनशील हुन पाइन्छ? खै गम्भीरता ? यो स्थिति कसको कारणले आयो?,’ उनले नेताहरुलाई प्रश्न गरेका थिए।
भदौ २३ पछि पार्टीको वैधानिकता प्रश्न उठ्ने भन्दै उनले नेतृत्वलाई सचेतसमेत गराएका छन्।
यस्तै, क्रियाशील सदस्यता छानबिन समितिले प्रतिवेदन बुझाए लगत्तै आउनुपर्ने कार्यतालिका नआएको भन्दै उनले असन्तुष्टि पोखे। उनले नेतृत्वले विवाद समाधान गर्न नसके स्थानको स्थगित गरेर समयमा महाधिवेशन हुनुपर्ने धारणा प्रस्तुत गरेका थिए।
बैठकमा अर्का नेता कल्याण गुरुङले क्रियाशील सदस्यतामा भएको धाधली र आफ्नो फरक मतबारे बोलेका थिए। सभापति शेरबहादुर देउवा पक्षीय केन्द्रीय सदस्य मोहन बस्नेतले वरिष्ठ नेता रामचन्द्र पौडेलप्रति आक्रोश व्यक्त गरेका थिए।
यता, सुर्खेत जिल्लामा क्रियाशील सदस्यता वितरणमा संस्थापनले मनलाग्दी गरेको भन्दै केन्द्रीय सदस्य हृदयराम थानी बैठकमा कडकिएका थिए।
पहिलो दिनको बैठकमा उपसभापति विमलेन्द्र निधिले समायोजन,महामन्त्री पूर्णबहादुर खड्काले निर्वाचन निर्देशिका र रमेश लेखकले क्रियाशील सदस्यता छानविन प्रतिवेदन छलफलका लागि पेश गरेका थिए।
पहिलो दिनको बैठकमा पाँच जना केन्द्रीय सदस्यले बोलेका छन्। बैठक सभापति देउवा निवास बूढानिलकण्ठमा शुक्रबार पुन: बस्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
