काठमाडौं- २१ वर्ष बार्सिलोना फुटबल क्लबमा बिताएका अर्जेन्टिनी स्टार लिओनल मेसी फ्रेन्च क्लब पेरिस सेन्ट जर्मेन (पीएसजी) जाने चर्चा चलिरहेका बेला अर्का युवा स्ट्राइकर किलियन एम्बाप्पेको भविष्यबारे भने स्पष्ट भएको छैन।
मेसी पीएसजी जाने तयारी गरिरहँदा अर्को स्पेनिस क्लब रियल मड्रिडले भने एम्बाप्पेलाई भित्र्याउने मौका हेरिरहेको छ। पछिल्लो एक वर्षदेखि रियलले उनलाई आफ्नो प्राथमिकतामा राखे पनि भित्र्याउन सफल भएको छैन।
अहिलेको सम्झौता अनुसार अब एम्बाप्पेको पीएसजीमा १२ महिनाको सम्झौता बाँकी रहेको छ।
एकातर्फ मेसी, नेयमार र एम्बाप्पे विश्वका तीन ठूला खेलाडीले पीएसजीलाई नयाँ उचाईमा पुर्याउने विश्लेषण भइरहेको छ। अर्कोतिर तीन महँगा खेलाडीलाई ‘फाइनान्सियल फेयर प्ले’ अन्तर्गत निरन्तरता दिन नसक्ने बताइएको छ।
पीएसजीले मेसीलाई वार्षिक करिब ४० मिलियन डलर दिने प्रस्ताव गरेको बताइएको छ। एक वर्ष सम्झौता थप्न सकिने विकल्पसहित पीएसजीले मेसीलाई अफर गरेको बताइएको छ।
अहिले मेसी पीएसजी जाने निश्चित भएको बताइएको छ। उनले मंगलबारसम्म मेडिकलका लागि पेरिस पुग्ने समाचार फ्रेन्च मिडियाहरुले प्रकाशित गरेका छन्।
मेसीको पीएसजीमा औपचारिक घोषणा गर्न पेरिसको आइफल टावरसमेत बुक गरिसकिएको बताइन्छ। तर, पीएसजीसँग सम्झौताको नजिक पुगेका मेसीलाई रोक्न बार्सिलोनाले अहिले पनि प्रयास गरिरहेको बताइएको छ।
स्पेनिस मिडिया मार्काले प्रकाशित गरेको एक रिपोर्टमा बार्सिलोनाले पीएसजीको मेसीलाई भित्र्याउने कदमविरुद्ध युरोपियन कमिसनमा उजुरी गरेको उल्लेख छ।
आफूले ‘फाइनान्सियल फेयर प्ले’कै कारणले मेसीलाई गुमाएको बार्सिलोनाले आफ्नोभन्दा पीएसजीको अवस्था कमजोर रहेको दाबी पेस गरेको छ।
युरोपियन कमिसनको कोर्ट अफ अपिलमा पेस गरिएको उजुरीमा २०१९/२० मा पीएसजीले आफ्नो कमाइको ९९ प्रतिशत पारिश्रमिकमा खर्च गरेको तर बार्सिलोनाले केवल आफ्नो कमाइको ५४ प्रतिशत मात्र खर्च गरेको उल्लेख छ।
बार्सिलोनाले मेसी र पीएसजीको सम्झौता हुनुअघि नै यस विषयको निर्णय हुनुपर्ने माग राखेको छ। यसैलाई आधार बनाएर एम्बाप्पे रियल जाने अनुमान र विश्लेषण सुरु भएको छ।
पीएसजीले मेसी, नेयमार र एम्बाप्पे जस्ता ग्लोबल सुपरस्टारलाई निरन्तरता दिन यूईएफए आफ्नो नियममा लचक हुने अपेक्षा राखेको समाचारमा जनाइएको छ।
पीएसजीलाई तिनै सुपरस्टार राख्न फ्रेन्च फुटबल फेडेरेसन र फ्रेन्च सरकारकोसमेत समर्थन र सहयोग रहेको समाचारहरु प्रकाशित भइरहेका छन्।
पीएसजीले मेसीको सम्झौताको टुंगो लागेपछि मात्र एम्बाप्पेको सम्झौता नवीकरणबारे छलफल गर्ने बताइएको छ।
यही घटनाक्रमलाई नजिकबाट हेर्दै आइरहेको रियलले पीएसजी र एम्बाप्पेबीच सम्झौता नवीकरणबारे कसरी छलफल हुन्छ भन्ने विशेष चासो राखिरहेको छ।
२०१७ मा मोनाकोबाट पीएसजीमा आएदेखि एम्बाप्पेले अहिलेसम्म १७२ खेल खेल्दै १३२ गोल गरेका छन्।
त्यस्तै, उनले ६२ गोल असिस्टसमेत गरेका छन्। यस अवधिमा एम्बाप्पेले तीनपटक लिग वान उपाधि जितेका छन् भने एक पटक च्याम्पियन्स लिगको फाइनलसम्म पुर्याएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1768395492.png)
