काठमाडौं- विश्व चर्चित अर्जेन्टिनी स्ट्राइकर लिओनल मेसीको क्याट्लान क्लब बार्सिलोनासँगको २१ वर्षे लामो सहयात्रा सकिएको छ।
आइतबार उनले बार्सिलोनाको घरेलु मैदान क्याम्प क्याप नाउबाट आफू अब क्लबमा नरहने निर्णय सुनाउँदै थिए।
उनले बिदा लिएकै दिन बार्सिलोनाले ‘जोआन गाम्पेर ट्रफी’मा इटालियन क्लब युभेन्टसको सामना गर्यो । त्यस खेल बार्सिलोनाले ३-० गोलले सहजै जित्यो।
स्टाडियो योहान क्रुफमा भएको खेलमा क्रिस्टियानो रोनाल्डो, अमाथिस डे लिग्ट र ल्भारो मोराटा जस्ता स्टार खेलाडीहरु भएको युभेन्टसविरुद्ध बार्सिलोनाले तेस्रो मिनेटमै मेम्फिस डिपाएको गोलबाट अग्रता लिएको थियो।
दोस्रो हाफमा मार्टिन ब्रेथवेइट र रिकार्ड पुईगले गोल गरेपछि बार्सिलोनाले सहज जित हात पारेको थियो।
खेल अगाडि बार्सिलोनाका प्रशिक्षक रोनाल्ड कोम्यान उत्साहित देखिए। मेसी नभए पनि आफ्नो टिम नयाँ सिजनका लागि तयार रहेको उनको भनाइ थियो।
‘मेसीको बिदाइका बाबजुद पनि हामी नयाँ सिजनका लागि उत्साहित छौं। हामीसँग प्रतिभावान युवा खेलाडीहरु छन्। हामीले नयाँ सिजनमा राम्रो गर्नेछौं भन्नेमा म विश्वास्त छु,’उनले भने।
मेसीको बर्हिगमनसँगै सर्जियो बुस्क्वेट्स बार्सिलोनाको कप्तानी सम्हालेका थिए। यसअगाडि उनले मेसीको अनुपस्थितिमा कप्तानी भूमिका निर्वाह गर्दै आएका थिए।
‘बार्सिलोनाको कप्तान हुन पाउनु गर्वको विषय हो। बार्सिलोनाले एक सय एक कप्तान पायो। कार्लोस पुयोल। जाभी अनि त्यसपछि मेसी। उनको योगदान हामी कहिल्यै भुल्ने छैनौँ,’ उनले भने।
यस्तै उनले बार्सिलोनाले अहिलेसम्मकै सर्वश्रेष्ठ खेलाडी गुमाएको बताए। ‘बार्सिलोनालाई मेसीले उच्च विन्दुमा पुर्याए। हामीले अहिलेसम्मकै सर्वश्रेष्ठ खेलाडी गुमाएका छौं। यसले हामीलाई र उनलाई चोट पुर्याएको छ।,’ उनले भने।
यता, जेरार्ड पिकेले आगामी सिजनमा धेरै आशा नरहेको बताए। ‘मेसीको बिदाइको कारण टिम साँच्चिकै बिग्रेको छ, हामी आक्रमणमा जादू गुमाउनेछौं, तर हामी अगाडि बढ्नुपर्छ, प्रशंसकहरुले हामीबाट धेरै आशा गर्दछन्,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
