काठमाडौं- नेकपा एमालेका वरिष्ठ नेता माधवकुमार नेपालले एमालेको एकता प्रयासमा अध्यक्ष केपी शर्मा ओलीकै कारण समस्या उत्पन्न भएको बताएका छन्। उनले आफूहरुले भने अझैं पनि एकताका निम्ति अन्तिम प्रयत्न गर्ने बताए।
बिहीबार काठमाडौंमा सुरु भएको आफूपक्षका केन्द्रीय कमिटी सदस्यहरुको बैठकलाई सम्बोधन गर्दै नेपालले आफूहरु होसियारीपूर्वक अघि बढ्नुपर्ने बताएका हुन्।
पार्टी एकता प्रक्रिया निर्णायक तहमा पुगेको बेला ओलीकै कारण समस्या उत्पन्न भएकोसमेत नेपालले केन्द्रीय सदस्यहरुलाई सुनाए।
‘वार्ताले उपलब्धि हासिल गर्दैछ, तर केपी ओली आफूले पहिले भनेका कुराबाट पछि हट्दा समस्या सिर्जना भएको छ,’ नेपालले बैठकमा भनेको कुरा उद्धृत गर्दै एक केन्द्रीय सदस्यले नेपाल लाइभसँग भने,‘हामीलाई एकता प्रिय छ। हामी सम्मानजनक एकताको पक्षमा छौं। त्यसकारण हामीले एकपटक अन्तिम प्रयास गर्नुपर्छ भनेका छौं।’
त्यसक्रममा नेपालले अध्यक्ष ओलीको समूहमा समस्या रहेकाले आफूहरु सोचविचार गरेर अघि बढ्नुपर्ने बताएका थिए। ‘केपी ओलीको समूहमा पनि समस्या छन्, विवादहरु छन्,’ उनको भनाइ थियो, ‘त्यसकारण हामीले ढोका बन्द नगरी अगाडि बढ्नुपर्दछ।’
उनले यो सबैलाई विचार गरेर विघटित एकता कार्यदलका आफ्नोतर्फका सदस्यहरुले ‘स्टेपवाइज’ कदम चाल्नुपर्ने बताए। ‘हाम्रो पूर्ववार्ता टोलीले स्टेपवाइज, समग्रमा प्रस्ताव तयार गर्नुपर्दछ,’ नेपालले भने,‘त्यसमा पनि महाधिवेशन, अधिवेशन, सदस्यतालगायतको कुरा छ, हामीले त्यसमा विशेष ध्यान दिनुपर्छ।’
‘हाम्रो समूह एकमत छ’
बैठकमा नेपालले आफ्नो समूह यतिबेला एकढिक्का रहेको र एकमतसाथ अघि बढ्न तयार भएको बताए। ‘अहिले पार्टी पंक्ति समग्र रुपमा विभाजित छ, केन्द्रदेखि वडा तहसम्म, जनसंगठनदेखि प्रवाससम्म विभाजित छ। मनोविज्ञान पनि विभाजित छ,’ बैठकमा नेपालले भने, ‘तर, हाम्रो समूहमा अहिले एकमत छ। वार्तालगायतमा अहिलेसम्म जे भएका छन्, त्यो हाम्रो स्थायी कमिटीमा एकमतका साथ भएको छ।’
कतिपय व्याख्याका सन्दर्भमा धारणा फरक रहे पनि आफूहरु एकमत बनाउनकै लागि स्थायी कमिटी बैठकमा ठूल्ठूलो स्वरमा बाझेको समेत नेपालले केन्द्रीय सदस्यहरुलाई सुनाए। ‘फेरि पनि हामी एक ठाउँमा आएका छौं, हामी अन्तिसम्म एकताको प्रयास जारी राख्ने छौं,’ नेपालले बैठकमा भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
-1765273665.jpg)
