काठमाडौं– नेकपा एमालेका लुम्बिनी प्रदेश सभा प्रमुख सचेतक भूमिश्वर ढकालले प्रदेश सभा सदस्य विमला खत्री ओलीले आफ्नो अपहरण गरिएको भनेर लगाएको आरोप सत्य नभएको बताएका छन्।
बिहीबार पत्रकार सम्मेलनमार्फत ओलीले एमाले प्रमुख सचेतक ढकाल समेतले आफूलाई अपहरण गरेको र मुख्यमन्त्री शंकर पोखरेलको सरकारी निवासमा बन्धक बनाएर राखेको आरोप लगाएकी थिइन्।
तर, ढकालले भने एमाले कमजोर बनाउन अपहरणको आरोप लगाइएको प्रतिक्रिया दिएका छन्। 'यो सबै कुरा राजनीतिक प्रपोगाण्डा हो। एमालेलाई कमजोर बनाउने माओवादीको खेल हो', नेपाल लाइभसँग कुरा गर्दै उनले भने।
ओलीले बिहीबार ढकाल र एमालेका स्थानीय नेता मानबहादुर रावतले साउन १५ गते मुख्यमन्त्री निवास पुर्याएको, मुख्यमन्त्री शंकर पोखरेलसँग छलफलपछि त्यहीँ बन्धक बनाइएको आशययुक्त वक्तव्य सार्वजनिक गरेकी छिन्। 'मुख्यमन्त्री पोखरेलसँग भेट भइ छलफल सुरु भयो। फेरि उही दबाब सुरु भयो, नेकपा एमालेमा आउनुपर्यो, पहिला हाम्रो गल्ती भयो, अब त्यस्तो हुँदैन, पार्टीमा आउनुस्, मन्त्री बन्नुस् भनेर विभिन्न प्रलोभन देखाइयो। मैले निरन्तर इन्कार गरिरहेँ। साउन १६, १७, १८ सम्म मुख्यमन्त्री निवासबाट बाहिर निस्किनै नदिइ निरन्तर दबाब दिइरहियो, मैले इन्कारी जारी राखिरहेँ। साउन १८ गते विज्ञप्ति लेखेर मलाई पढ्नै नदिइ हस्ताक्षर गराइयो, यति मात्र नभइ अर्को दुई तीनवटा माइनट जस्ता रजिस्टरमा पनि जबरजस्ती हस्ताक्षर गराइयो', बिहीबार ओलीद्वारा जारी विज्ञप्तिमा भनिएको छ।
ओलीले साउन २० गते सबै आराम गरिरहेको मौका हेरी ट्वाइलेटको चप्पल लगाएर नेपाल कम्युनिस्ट पार्टी (माओवादी केन्द्र) संसदीय दलको कार्यालयमा पुगेको उल्लेख गरेकी छिन्।
ओलीलाई जबर्जस्ती हस्ताक्षर गर्न नलगाइएको ढकालको भनाइ छ। 'उहाँ सांसद् हो, सांसद्लाई जबर्जस्ती हात समातेर हस्ताक्षर गर्न सकिन्छ र? उहाँले आफैं, राजीखुसीले विज्ञप्ति तयार गरेर, पढेर, हस्ताक्षर गर्नुभएको छ', उनले भने।
ढकालले पार्टीको केन्द्रीय अध्यक्षले स्पष्टीकरण पत्र बोकेर आफू ओलीको घर पुगेको बताए। 'बिहान ८ बजे म गएको हो। तीन घण्टा बसेर कुराकानी गरेपछि उहाँले त्यो स्पष्टीकरण पत्र हेर्नुभयो। त्यसपछि उहाँले यो विषयमा एकपटक मुख्यमन्त्रीसँग बसेर कुरा गर्न चाहन्छु भन्नुभयो। त्यसो भए ठीकै छ भनेर म गएकै गाडीमा उहाँलाई लिएर आयौं। उहाँ मात्रै होइन, उहाँको दिदी र भिनाजुको भाइ पनि सँगै आउनुभएको छ', उनले भने।
मुख्यमन्त्री पोखरेलसँगको छलफलपछि ओली कन्भिन्स भएको उनले बताए। 'त्यसपछि उहाँले नै 'ठीक छ, म माओवादी छाड्छु र एमालेमा फर्किन्छु' भन्नुभयो। सौहार्दपूर्ण वातावरणमा कुरा भयो। उहाँहरुलाई बस्न बाहिर होटलमा पनि व्यवस्थापन गरिएको थियो। तर उहाँले म बाहिर बस्दिनँ, यहीँ (मुख्यमन्त्री निवास) बस्छु भन्नुभयो। त्यसपछि गेस्टको हिसाबले उहाँ, उहाँकी दिदी र भिनाजुको भाइ बस्नुभयो। उहाँसँग मोबाइल थियो। त्यसबाट मान्छेहरुसँग सम्पर्क गर्नुभयो। तर पछि निस्केर हिँड्नुभयो', उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
