काठमाडौं– राष्ट्रिय सभाका सदस्य (सांसद)हरुले महाकालीमा बेपत्ता भएका जयसिंह धामीका परिवारलाई क्षतिपूर्ति दिन माग गरेका छन्। बुधबार राष्ट्रिय सभा बैठकको शून्य समयमा बोल्दै सांसदहरुले कोभिड–१९ विरुद्धको खोप, मेलम्चीका बाढीपीडितलाई क्षतिपूर्ति, दार्चुलामा तुइन तर्ने क्रममा बेपत्ता भएकाका परिवारलाई न्याय तथा सुकुम्बासीका समस्या चाँडो समाधान गर्न सरकारसँग माग गरे।
सांसद्हरुले कोरोना महामारी बढ्दै गएकाले सबैलाई खोपको व्यवस्था गर्नुपर्ने, भूमिहीनलाई जग्गाको व्यवस्था गर्नुपर्ने, यात्रा गर्दा ट्याक्सी चालकले ठग्ने गरेकाले त्यसप्रति ध्यान दिन सरकारसँग माग गरे।
सांसद खिलकुमार विकले खोप आपूर्ति गरी सबैलाई व्यवस्थितरूपमा लगाउन सरकारसँग माग गरे। वृद्धवृद्धाले लामो समयसम्म लाइनमा बस्नुपरेको भन्दै उनले त्यसलाई सहज बनाउन सुझाव दिए।
सांसद उदय शर्मा पौडेलले काठमाडौं उपत्यकामा ट्याक्सी चालकले ठग्ने गरेकाले उनीहरुलाई कारबाहीको दायरामा ल्याउनुपर्ने बताइन्। ट्याक्सीमा यात्रा गर्दा मिटरमा भाडादर निर्धारण गर्न उनले माग गरिन्।
सांसद कविता बोगटीले दार्चुलामा भारतीय सीमा सुरक्षा बल (एसएसबी)ले तुइन काटेका कारण जयसिंह धामी बेपत्ता भएको घटनामा सरकारले भारतीय पक्षको पक्षपोषण गरेको आरोप लगाइन्। बेपत्ता धामीको परिवारलाई उचित क्षतिपूर्ति उपलब्ध गराउन पनि उनले सरकारसँग माग गरिन्।
सांसद कोमल वलीले राष्ट्र निर्माणमा कलाकारको उल्लेख्य भूमिका रहेको भन्दै कलाकारलाई पीर, मर्का परेका बेला राज्यले ध्यान दिनुपर्ने बताइन्। कलाकार पल्पसा डङ्गोलको स्वास्थ्योपचारका लागि पहल गरिदिन उनले सरकारसँग माग गरिन्।
सांसद खिमलाल देवकोटाले सिन्धुपाल्चोकको मेलम्चीलगायत स्थानमा बाढीले अत्यधिक क्षति गरेकाले उनीहरुलाई सुरक्षित ठाउँमा बसोबासको व्यवस्था गर्न सरकारसँग माग गरे।
सांसद चक्रप्रसाद स्नेहीले देशभर लाखौँ सुकुम्बासी रहेको भन्दै उनीहरुलाई जग्गाको व्यवस्था गर्न सरकारलाई सुझाव दिए। सांसद जगप्रसाद शर्माले शैक्षिक मजदुर समस्यामा परेकाले उनीहरुको समस्या समाधान गर्न सरकारले पहल गर्नुपर्ने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764508750.jpg)
-1764146706.png)
-1763721444.png)
-1763559424.jpg)
-1764080971.png)
