काठमाडौं– नेकपा एमालेको एकता कार्यदलस्तरमा भएको १० बुँदे सहमतिलाई कार्यान्वयन गरी आन्तरिक एकता कायम गर्न एमालेका दुवै पक्षका सांसदहरुले दबाब अभियान सुरु गरेका छन्।
पार्टीलाई एकतावद्ध बनाउन विघटित एकता कार्यदलका नेताहरुसँग छलफल गरेर एमालेका अध्यक्ष केपी शर्मा ओली पक्ष र वरिष्ठ नेता माधवकुमार नेपाल पक्षका सांसदहरुले संयुक्त रुपमा दबाब अभियान सुरु गरेका हुन्। दबाब अभियानअन्तर्गत आइतबार भएको एउटा छलफलमा दुवै पक्षका गरी २७ जना सांसदको उपस्थिति थियो भने कार्यदलका ९ जना थिए।
आइतबार सिंहदरवारमा विघटित कार्यदलका संयोजक तथा सदस्यहरुसँग छलफल गरेपछि दुवै पक्षका सांसदहरुले १० बुँदे सहमति कार्यान्वयन गरेर पार्टीलाई एकतावद्ध बनाउन आफूहरुले पनि सक्दो सहयोग गर्ने प्रतिबद्धता जनाएका छन्। पार्टी एकतालाई बलियो बनाउन दबाब अभियान सुरु गरिएको ओली पक्षका सांसद कृष्णप्रसाद दाहालले जानकारी दिए। यो अभियानमा दाहाल उक्त पक्षका सांसदहरुको नेतृत्व समेत गरिरहेका छन्।
दाहालले भने, ‘पार्टी एकतालाई मजबुत बनाउनका लागि हामी दबाब दिन्छौं। त्यसका लागि सल्लाह पनि दिनेछौं। विघटित एकता कार्यदललाई विश्वास पनि गर्दछौं। शीर्ष तहमा समस्या समाधान छ भने त्यसलाई पनि मिलाउनुहोस्। हामी तपाईंहरुको साथमा छौं। पार्टी भित्रको समस्या समाधान भन्दा बाहिर, पार्टी एकताभन्दा बाहिर कसैलाई पनि जाने अनुमति छैन। हामी जान दिँदैनौं।’
सांसदहरुले देश, जनता, राष्ट्र र लोकतन्त्रका लागि पनि एमाले विभाजित हुन नहुने तर्क समेत गरेका छन्। उनीहरुले विघटित एकता कार्यदलका नेताहरुलाई पार्टी एकताभन्दा बाहिर जाने अनुमति नेताहरुलाई नभएको भनेर सचेत पनि गराएका छन्।
छलफलमा विघटित एकता कार्यदलका संयोजक तथा सदस्यहरुले १० बुँदे सहमतिको महत्व र त्यसको कार्यान्वयनका आवश्यक्ताबारे सांसदहरुलाई जानकारी गराएका थिए।
नेपाल पक्षका सांसदहरुको नेतृत्व गरिरहेका यज्ञराज सुनुवारले एकताको आधार तयार रहेकाले दबाबबाट नेताहरुलाई मनाउन सकिने बताए। उनले भने, ‘कार्यदलका सदस्यहरुले ठूलै मेहनत गरेर एकताको आधार तयार पार्नुभएको छ। यसलाई निष्कर्षमा लैजान सांसदहरु तयार छौं भन्नेमा लगभग सबै सांसदहरुको कुरा रह्यो।’
१० बुँदे सहमति कार्यान्वयन गर्दै पार्टीलाई एकतावद्ध बनाउन सांसदहरुले आफूहरुलाई आग्रह गरेका विघटित कार्यदलका माधव नेपाल पक्षका संयोजक भीम रावलले बताए। रावलले पार्टी एकतावद्ध हुनेमा आफू विश्वस्त रहेको पनि बताए। ‘हामीले १० बुँदे सहमतिको महत्व र त्यसको कार्यान्वयनको स्थितिबारे उहाँहरुलाई जानकारी गरायौं। र, उहाँहरुले पार्टीलाई एकमतले एकतावद्ध बनाएर अघि लैजान जोड दिनुभयो। त्यसका लागि उहाँहरुले संघीय संसद्का पार्टीका सबै सांसदहरु कटिवद्ध भएर लागिपर्ने बताउनुभयो। १० बुँदे सहमति कार्यान्वयनमा पनि भूमिका खेल्नुस् भन्नुभयो। हामीहरुले एमाले एकतावद्ध भएर अघि बढ्ने विश्वास दिलायौं।’
बैठकमा विघटित कार्यदलका माधव नेपाल पक्षका संयोजक रावल, अध्यक्ष ओली पक्षका संयोजक सुवास नेम्वाङसहित कार्यदलका सदस्यहरु सहभागी थिए। नेम्वाङले मतभिन्नता रहे पनि मिल्नका लागि सहमति भएको बताए। उनले भने, ‘समस्याहरु थिए, त्यसलाई घटाएर यहाँसम्म ल्याएको छौं।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
