काठमाडौं– नेकपा (एमाले)का प्रतिनिधि सभाका केही सदस्यहरूले एकता अभियान सञ्चाल गरेका छन्। त्यो अभियानमा नेतृत्वदायी भूमिका निर्वाह गरिरहेकामध्ये एक हुन् यज्ञराज सुनुवार। पार्टीमा फरक मत सिर्जना गर्ने विषय (प्रतिनिधि सभा विघटन) किनारा लागिसकेकाले अब आगामी दिनमा एउटै विचारका साथ सँगै अघि बढ्नुपर्ने उनी बताउँछन्।
एमालेको एकताका लागि बनेको कार्यदलले तयार पारेको १० बुँदेलाई त्यसको कडी बनाउनुपर्ने उनको धारणा छ। आफूले निर्माण गरेको उक्त सहमतिमा शीर्ष नेतृत्वलाई ल्याउनुपर्ने चुनौती कार्यदलमा रहेको १० जनामै रहेको उनी बताउँछन्।
उनको भनाइ छ, ‘कार्यदलमा रहेका १० जनालाई पनि यो चुनौती छ। पहिलो पुस्तालाई गाली गरेर मात्रै भएन, तपाईंहरूले त्यो तयार गर्नुभयो, अडिनुहोस्। सहमत गराउनुहोस्। अझै नथाक्नुहोस्। तपाईंहरूको कार्यक्षमताको मूल्यांकन हुने बेला हो।’
नेपाल लाइभको समय संवादमा कुरा गर्दै उनले शीर्ष नेतृत्वलाई उत्तेजित बनाउन सक्रिय केही व्यक्तिका कारण पनि एकताको माहोल बिग्रिएको बताए। पार्टीलाई फुटबाट जोगाउन भन्दै प्रधानमन्त्री शेरबहादुर देउवाले विश्वासको मत लिँदा भोट नहाल्ने १० जना नेतामा सुनुवार पनि थिए। उनीसँग गरिएको संवादको सारसंक्षेप उनकै शब्दमा:
एकता अभियान किन?
तत्कालीन प्रधानमन्त्री तथा पार्टी अध्यक्ष केपी शर्मा ओलीले प्रतिनिधि सभा विघटन गरेपछि हामी संसद् जोगाउनुपर्छ, व्यवस्था जोगाउनुपर्छ भन्ने लाइनमा उभियौं। अर्को सरकार बन्ने आधार थिएन, त्यसैले विघटन स्वभाविक हो भनेर केही साथीहरू त्यता उभिए। अहिले संसद् जोगिएको अवस्था छ। अब पार्टी जोगाउनुपर्छ भन्ने उद्देश्यसहित सुदृढ एकताका लागि यो भूमिका खेल्न आवश्यक छ। त्यसैले हामीले आफ्नो तहबाट एकता अभियान थालेका हौं। अहिले सुदृढ एकतासहितको एमाले बनाउन सकेनौं भने ठूलो असर राष्ट्रिय राजनीतिमा पर्छ।
यो युगिन आवश्यकता हो। पार्टी सदस्य र सांसद भएका हिसाबले यो हाम्रो कार्यभर पनि हो। एकताका पक्षमा हामी बिहीबार १५ जना जम्मा भयौं। पर्सि संख्या बढ्नेछ। हामी एकता कार्यदलका संयोजकद्वय भीम रावल र सुवासचन्द्र नेम्वाङलाई बोलाएर छलफल गर्दछौं। त्यही १० बुँदेलाई आधार बनाएर एकता अगाडि बढाउनुपर्छ भनेर लागिरहेका छौं।
नेकपा (एमाले)को जीवनमा जुन समस्या देखापर्यो, त्यो राजनीतिक कारण संसदमा त्यसको असर परिरहेको छ। एकता सबैको मनमा छ, हुनुपर्छ भन्ने भावना पनि छ। ९५ प्रतिशत भन्दा बढी एमालेका कार्यकर्ता एकता चाहन्छन्।
दोस्रो पुस्ताको मूल्यांकन
नेकपा (एमाले)लाई एकठाउँ ल्याउन कार्यदल बनेको छ। त्यसमा दोस्रो पुस्ताका १० जना नेताहरू हुनुहुन्छ। कार्यदलमा रहेका १० जनालाई पनि अहिले चुनौती छ।
तपाईंहरूले पहिलो पुस्तालाई गाली गरेर मात्रै भएन, तपाईंहरूले त्यो तयार गर्नुभयो, अडिनुहोस् र सहमत गराउनुहोस्। अझै नथाक्नुहोस्। तपाईंहरूको कार्यक्षमताको मूल्यांकन हुने बेला हो। त्यसैले यसलाई पूरा गर्नुहोस्।
दशबुँदेको व्याख्या आ–आफ्नो तरिकाले नहोस्। अहिले १० जना एक ठाउँ उभिने कि नउभिने तपाईंहरूमाथि पनि प्रश्न छ। सहमति भएपछि त्यसको स्वमित्व नलिने कुरा पनि गलत हो र एकपक्षीय बैठक राखेर अघि बढ्ने कुरा पनि गलत हो।
समृद्धिको नेतृत्व अर्को पुस्तालाई
पहिलो पुस्ताले राजनीतिक परिवर्तनको नेतृत्व गर्यो, त्यसका लागि सलाम छ। अझै पनि तपाईंहरू मिल्नुहुन्छ भने हामी तपाईं अन्तर्गत रहेर काम गर्न तत्पर छौं। तपाईंहरूमा त्यो खालको तात्पर्यता, तयारी, इच्छाशक्ति देखिएन भने दोस्रो वा तेस्रो पुस्तालाई हस्तान्तरण गर्न तया हुनुहोस्।
तपाईंहरूले राजनीतिक क्रान्तिको नेतृत्व गर्नुभयो, अब समृद्धिको नेतृत्व गर्न अर्को पुस्तालाई दिनुहोस्। तपाईंहरूलाई सर्वोच्च ठाउँमा राखौंला। तपाईंकै छत्रछायाँमा कार्यकारी नेतृत्व अर्को पुस्ताका नेताहरूल गर्छन्। यसरी भएपनि पार्टीलाई एकताबद्ध बनाउनुपर्छ।
एकताका लागि सवभन्दा लचकता नेतृत्व तहमा चाहिन्छ। पार्टी अध्यक्ष ओली र वरिष्ठ नेता माधवकुमार नेपालले जनता र कार्यकर्ताको भावनालाई मध्यनजर गरेर एकताका लागि तयार हुनुपर्छ।
उत्तेजित पार्ने र अनेकतामा रमाउनेहरू
हामी विगत डेढ वर्षदेखि हामी चयनले सुत्न पाएका छैनौं। कतिपय यसैमा रमाइरहेका छन्। अनेकतामा रमाउने तुच्छ भावना भएकाहरू अनेक स्वार्थ लिएकाहरू हुन्। उनीहरूले नेतृत्व मिल्दा अवसर पाउँदैनन्। उनीहरूसँग प्रतिष्पर्धा गर्न आँट छैन।
मिल्दा आफूभन्दा प्रतिभाशाली र क्षमतावानसँग प्रतिष्पर्धा गर्नुपर्छ, पछि परिन्छ भन्ने डर छ। त्यसैले नेतृत्वलाई उत्तेजित बनाउने काम गरिरहेका छन्। उनीहरू गलत रिर्पाेटिङ गरिरहेका छन्। त्यसले पनि असर पारिरहेको छ।
आत्मसमीक्षा गरौं, एकतातर्फ लागौं
नेताहरू फरक–फरक ठाउँमा उभिँदा त्यसको क्षति जनता र कार्यकताले ब्यहोरेका छन्। त्यसैले अब नेतृत्व तहले एकपल्ट आत्मसमीक्षा गर्नुपर्छ। बार्दलीबाट बर्बराउनु उपयुक्त थिएन, दुर्भाग्यपूर्ण हो। देशको नेतृत्व गरेको व्यक्तिले त्यस्तो मञ्चमा एकताको सन्देश दिँदा हाइट बढ्थ्यो। बार्दली वक्तव्यले राजनीतिक हाइट बढाएको छैन। यता माधव नेपालसँग पनि हाम्रा कयौं असन्तुष्टि छन्।
ओली र नेपालबीच सम्बन्ध ४० वर्ष लामो छ। सँगै हिँड्दा उतारचढाव आए होलान्, आक्रोशित भएर वा कुण्ठा पालेर समस्या समाधान हुँदैन। पार्टी एकताका लागि सकरात्मक हुँदा उहाँहरू दुवैको मान बढ्छ। मन मिल्दा सकारात्मक नै सका
रात्मक देखिने भिन्नता आउँदा नकरात्मक नै नकरात्मक देख्ने प्रवृत्ति गलत हो। हामी अझै एकतको सम्भावना देखिरहेका छौं। तपाईंहरूले पनि देख्नुपर्छ।
सुनुवारसँग गरिएको पूरा संवाद हेर्नुहोस्:
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
