काठमाडौं– जनता समाजवादी पार्टी(जसपा)का नेता राजकिशोर यादव महन्थ ठाकुर–राजेन्द्र महतोपक्ष छोडेर उपेन्द्र यादव–बाबुराम भट्टराईपक्षतिर खुलेर लागेका छन्।
यादवले शनिवार उपेन्द्र–बाबुरामपक्षको बालकुमारीमा बसेको कार्यकारिणी समिति बैठकमा सहभागी भएर समर्थन जनाएका हुन। यसअघि राष्ट्रिय जनता पार्टी(राजपा)का अध्यक्ष मण्डलका एक सदस्यको भूमिका समेत निर्वाह गरेका यादव लामो समय महन्थपक्षमै रहेर क्रियाशिल थिए। जसपामा विवाद हुन थालेपछि एक बनाउन क्रियाशील समेत रहेका यादव अन्ततः उपेन्द्र–बाबुरामतिरै खुलेका हुन्।
‘कार्यकारिणी समिति बैठकमा आएर राजकिशोर जीले आफ्नो कुरा राखेर जानुभयो। पार्टीमा विवाद प्रारम्भ भएदेखि उतापनि (महन्थ–राजेन्द्रपक्ष) बैठकको निर्णयमा हस्ताक्षर गरेको छैन। जसपाको मुल हाँगो जता रहन्छ त्यतै रहन्छु,’ यादवको भनाइ उद्धृत गर्दै बैठकमा सहभागी एक कार्यकारिणी सदस्यले भने, ‘निर्वाचन आयोगले बोलाएको ११ गते तपाईंहरुसँग रहनेछु।’
उपेन्द्र–बाबुरामपक्षको कार्यकारिणी समितिको बैठकमा सहभागी भएर यादवले महन्थ ठाकुरलाई साथ दिननसक्ने जानकारी गराएका थिए। बैठकपछि यादव शनिवार बेलुका ठाकुरलाई भेट्न उनकै निवास हात्तिवन पुगेका थिए।
राजकिशोर यादवले आफू उपेन्द्र बाबुरामपक्षको बैठकमा सहभागी भएको स्वीकार गरे। निर्वाचन आयोगले सनाखद गर्नेक्रममा तपाईंहरुसँगै रहनेछु भन्ने बचनसमेत दिएको उनले बताए। ‘मेरो प्रयास दुईपक्षलाई एक बनाउने भन्ने थियो। दुबै समुहलाई मिलाएर एक बनाउने भन्ने थियो। त्यो सम्भव भएन त्यसमा सफल हुन सकिन,’ यादवले भने, ‘अब ११ गते निर्वाचन आयोगले सनाखद गर्नेक्रममा तपाईंसँगै रहनेछु भनेको छु।’
यसअघि यादव केपी शर्मा ओली नेतृत्वको सरकारमा उद्योग मन्त्रीको रुपमा १३ दिन मन्त्रीसमेत भएका थिए। सर्वोच्च अदालतले ओलीको मन्त्रिपरिषद विस्तारलाई खारेज गरेपछि मन्त्री पदबाट हटेका थिए। जसपा विवादमा पछिल्लो समय उपेन्द्र–बाबुरामपक्षले आधिकारिकता पाउने संकेत पाएपछि यादवले महन्थ–राजेन्द्रपक्षलाई छोडेका हुन्।
यसअघि चक्रीय प्रणालीअन्तर्गत ६ जना अध्यक्षले नेतृत्व गर्नेक्रममा यादवले पार्टीको नेतृत्व सम्हाल्ने अवसर पाएका थिए। यादव पहिलो संविधान सभा निर्वाचनमा मधेसी जनाअधिकार फोरमबाट सिराहबाट प्रत्यक्ष निर्वाचित भएका थिए। बाबुराम भट्टराई नेतृत्वको सरकारमा सूचना तथा सञ्चारमन्त्री जयप्रकाशप्रसाद गुप्ता भ्रष्टाचारको आरोपमा जेल गएपछि राजकिशोरले सञ्चारमन्त्री हुने अवसर पाएका थिए।
तत्कालीन फोरम गणतान्त्रिकबाट अर्को शीर्ष नेता नभएकाले यादवले मन्त्री हुने अवसर पाएका थिए। यस्तै दोस्रो संविधान सभा निर्वाचन २०७० माभने उनी पराजित भए।
यादव गत २०७४ सालको निर्वाचनमा सिराह क्षेत्र नम्बर ४ बाट प्रत्यक्ष निर्वाचित भएका थिए। तत्कालीन फोरमबाट उपेन्द्र यादवसँग सम्बन्ध विच्छेद गरेका राजकिशोर यादव पुनःउनलाई नै साथ दिनेगरी उभिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
