काठमाडौं- सरकारका कामलाई प्रभावकारी बनाउनका लागि सत्ता गठबन्धनका तीन दलले बनाएको कार्यदलले आफ्नो कार्यलाई तिव्रता दिएको बताइएको छ। कांग्रेस–माओवादी र जनता समाजवादीका नेता सम्मिलित कार्यदलले न्यूनतम साझा कार्यक्रमको खाकालाई आइतबार अन्तिम रुपमा दिने तयारी गरेको छ। न्यूनतम साझा कार्यक्रममा समेटिने मोटामोटी विषयको छनोट भइसकेको कार्यदलका एक सदस्यले जानकारी दिए।
उक्त विषयलाई आइतबार लिपिवद्ध गर्ने बताइएको छ। ‘आइतबारको बैठकबाट न्यूनतम साझा कार्यक्रमको खाका तयार भएर आउन सक्छ’, उनले भने।
सरकार सञ्चालनका क्रममा सरकारका प्राथमिकताका क्षेत्रमा कार्यदलले सुझाव दिने भएको छ। न्यूनतम साझा कार्यक्रममा कोभिडलाई पहिलो प्राथमिकतामा राखिएको छ। कोभिडको सम्भावित तेस्रो लहरको रोकथाम तथा नियन्त्रणका लागि सरकारी तयारीका सन्दर्भमा सुझाव कार्यदलले दिने भएको छ।
ठूला आयोजनाको काम ढिलो हुनुका कारण र आयोजना सम्पन्न गर्न सरकारको पहलकदमीका लागि आवश्यक सुझाव दिने बताइएको छ। ‘आयोजनालाई समयमा सम्पन्न गर्न भएका समस्या र निराकरणका उपाय कार्यदलले सुझाउने छ’, कार्यदलका एक सदस्यले भने।
गठबन्धनको सरकारले गरेका निर्णयले जनतामा पार्ने प्रभावका सन्दर्भमा समेत सुझाव दिइने भएको छ। सरकारले गर्ने नियुक्तिमा विवादरहित र सक्षम व्यक्तिलाई स्थान दिनुपर्ने सुझाव साझा न्यूनतम कार्यक्रममा समेटिने भएको छ।
राजनीतिक नियुक्ति गर्दा निश्चित मापदण्ड तय गर्न सुझाव दिइने भएको छ। गठबन्धन भएकाले एकलौटी निर्णयलाई मान्यता दिन नहुने न्यूनतम साझा कार्यक्रम बन्ने भएको छ। संयुक्त सरकारले गर्ने निर्णय विवाद नपर्ने गरी कार्य गर्न सुझाव पेश गरिने भएको छ।
पछिल्लो समय कार्यदलको बैठक नियमित जस्तै बस्दै आएको छ। बिहीबार र शुक्रबार बसेको बैठक आइतबार ४ बजेका का लागि पनि बोलाइएको छ। कार्यदलले तयार गरेको न्यूनतम साझा कार्यक्रम प्रधानमन्त्रीसहित गठबन्धनका प्रमुख नेताहरुलाई बुझाउने बताइएको छ।
नवगठित कार्यदलले मुख्य रुपमा सरकारको न्यूनतम साझा कार्यक्रम तयार गर्ने एक जना सदस्य महेन्द्र राय यादवले बताए। ‘अहिले दिइएको ‘टिओआर’ न्यूनतम साझा कार्यक्रम तयार गर्ने हो। त्यसपछि पनि आवश्यकता पर्यो भने कार्यदल रहिरहन्छ’, उनले भने।
शीर्ष तहका नेताहरु नै खटिएर न्यूनतम साझा कार्यक्रमको खाका तयार गर्न समयाभावले दोस्रो तहका नेताहरुलाई जिम्मेवारी दिएको बताइएको छ।
कार्यदलको संयोजकमा कांग्रेस महामन्त्री पूर्णबहादुर खड्का छन्। कार्यदलका अन्य सदस्यमा तीन दलबाट २/२ जना तोकिएको छ। कांग्रेसबाट रमेश लेखक र मिनेन्द्र रिजाल, माओवादी केन्द्रबाट वर्षमान पुन र देव गुरुङ छन् भने जनता समाजवादीबाट राजेन्द्र श्रेष्ठ र महेन्द्र राय यादव छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
