फाइल तस्वीर
काठमाडौं– कोभिड–१९ का कारण थलिएको नेपालको पर्यटन प्रवर्द्धन गर्न नयाँ रणनीतिक ‘प्रडक्ट’ र कार्यनीति आवश्यक रहेको विभिन्न मुलुकका राजदूतहरुले बताएका छन्।
विभिन्न देशका राजदूतसँग निरन्तर छलफल गरिरहेको बोर्डले मंगलबार भारत, बंगलादेश, पाकिस्तान र श्रीलंकाका राजदूत तथा राजदूतावासका अन्य अधिकारीसँग भर्चुअल अन्तक्र्रिया गरेको हो।
बोर्डले यसअघि कोभिड महामारीबीच पनि नेपालको पर्यटन प्रवर्द्धनका लागि के कसरी सहकार्य गर्न सकिन्छ भन्ने विषयमा केन्द्रित रहेर अमेरिका मध्यपूर्व, उत्तरपूर्वी एशिया र युरोपका विभिन्न देशका राजदूतसँग पनि अन्तक्र्रिया सम्पन्न गरिसकेको छ।
कार्यक्रममा सहभागी राजदूतहरुले कोभिडको कारण थलिएको पर्यटनलाई चलायमान बनाउन नयाँ कार्यक्रम ल्याउनुपर्नेमा जोड दिएको बोर्डका कार्यकारी प्रमुख डा धनञ्जय रेग्मीले बताए।
कोभिडको समयमा सबैतिर समस्या रहेको बताउँदै कार्यक्रमका सहभागीले अहिलेदेखि नै तयारी आवश्यक रहेकोमा जोड दिएका थिए। खोपको विकास र विस्तारसँगै अन्तर्राष्ट्रिय पर्यटन चलायमान भएको भन्दै उनीहरुले नेपालका लागि छिमेकी देश नै ठूलो स्रोत बजार भएकाले त्यसतर्फ ध्यान दिई प्रवर्द्धनात्मक कार्य गर्न बोर्डलाई सुझाव दिएका थिए।
यस्तै नेपालको हवाई भाडा महँगो भएकाले पर्यटक आगमनमा समस्या पर्ने गरेकाले त्यसलाई समायोजन गर्न आवश्यक रहेको समेत सहभागीहरुको भनाइ थियो ।
कार्यक्रममा बंगलादेशका लागि नेपाली राजदूत डा वंशिधर मिश्रले नेपालका लागि बंगलादेश ठूलो बजार रहे पनि काम हुन नसकेको बताए। बंगलादेशमा करिब डेढ करोड हिन्दू र ८० लाख बुद्धिष्ट भएकाले केही प्रवद्र्धनात्मक काम तथा कनेक्टिभिटीमा जोड दिन सके ठूलो संख्यामा पर्यटक नेपाल लैजान सकिने उनको भनाइ थियो।
यस्तै पाकिस्तानका लागि नेपाली राजदूत तपस अधिकारी सीमा पर्यटनलाई जोड दिनु आवश्यक रहको बताए। विश्वमा अहिले पनि अंग्रेजी नबुझ्नेको संख्या ठूलो रहेकाले स्थानीय भाषामा प्रवर्द्धनका सामग्री तयार पार्न बोर्डलाई सुझाव दिए।
यस्तै भारतस्थित नेपाली दूतावासका मिनिष्टर इकोनोमिक्स नीता पोखरेलले नेपालको लागि भारत प्रमुख स्रोत बजार भएकाले भारतमा थप प्रवर्द्धनात्मक कार्यक्रम आवश्यक रहेकोमा जोड दिइन्।
श्रीलंकास्थित नेपाली दूतावासका सेकेण्ड सेक्रेटरी विश्वास भट्टले श्रीलंकाका लागि प्रमुख आकर्षण लुम्बिनी भए पनि साहसिक पर्यटनको लागि पनि श्रीलंकन पर्यटकलाई नेपाल लैजान सकिने बताए।
नेपालको पर्यटन प्रवर्द्धनका लागि बोर्डले गरेका कामका सम्बन्धमा जानकारी गराउँदै बोर्डका प्रमुख कार्यकारी अधिकृत रेग्मीले नेपाललाई सबै सिजन र सबै उमेर समूहको गन्तव्यका रुपमा विकास गर्न र प्रचार गर्न आवश्यक रहेको बताए। बोर्डले दूतावासहरुसँग सहकार्य गरी पर्यटन प्रवर्द्धनका काम गर्ने रेग्मीको भनाइ थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
