अर्थमन्त्री शर्मा भन्छन्– अर्थतन्त्रको यथार्थ विवरण सार्वजनिक गरिनेछ, बजेट अध्यादेशबारे सदनले निर्णय गर्ला

अर्थ समाचार

नेपाल लाइभ शुक्रबार, साउन १, २०७८ १४:१३

काठमाडौं– अर्थमन्त्री जनार्दन शर्माले अध्यादेशबाट ल्याइएको आगामी आर्थीक वर्षको बजेटबारे सदनले नै निर्णय गर्ने बताएका छन्।

सरकारले बजेट अध्यादेशलाई सदनमा प्रस्तुत गर्ने जानकारी दिँदै मन्त्री शर्माले सम्पूर्ण बजेट अध्यादेश वा त्यसका केही प्रावधान स्वीकार गर्ने वा अस्वीकार गर्ने विषयमा सदनले निर्णय गर्ने बताए।

मन्त्री शर्माले देशको अहिलेको समग्र आर्थिक अवस्थाको मार्गचित्र सार्वजनिक गर्ने पनि बताएका छन्। शुक्रबार अर्थ मन्त्रालयमा सञ्चारकर्मीसँगको अन्तर्कियामा बोल्दै मन्त्री शर्माले अहिले आफू अध्ययनकै क्रममा रहेको पनि बताए।

'भर्खर आएर अध्ययन गर्दै छु।अध्ययनका लागि केही समय दिनुहोस्,' मन्त्री शर्माले भने, 'अध्ययन गरेर आफ्नो भिजन राख्ने छु भने सरकारको समग्र योजनाका बारेमा पनि त्यो निर्माण भइसकेपछि अर्थ मन्त्रालयको भावी योजना त्यसमा समावेश गरिने छ।'

मन्त्री शर्माले वर्तमान अर्थतन्त्रको यथार्थ अवस्था अवस्थाको विवरण तयार पारेर सार्वजनिक गरिने बताए। 'अहिलेसम्मको यथार्थ अवस्था के छ त अर्थतन्त्रको? यथार्थ विवरण तयार गरेर सार्वजनिक गरिने छ,' मन्त्री शर्माले भने।

मन्त्री शर्माले कोभिड प्रभावित अर्थतन्त्रलाई कसरी पुनरुत्थान गर्ने भन्ने विषयमा छलफल भइरहेको पनि जानकारी दिए। यस्तै, अघिल्ला वर्षहरुमा भएका कमि–कमजोरीको समीक्षा पनि भइरहेको उनको भनाइ छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

गुडिरहेको गाडीबाट हामफाल्दा एक जनाको मृत्यु

सभ्य भएर होली खेल्न रौतहट प्रशासनको आग्रह

समाजवादी मोर्चाको बैठक जारी